އަންނަ އަހަރު އިސްލާމިކް ބޭންކިންގެ ގާނޫނެއް އެކުލަވާލައި މަޖިލީހަށް ހުށަހަޅުއްވާނެ ކަމަށް މޯލްޑިވްސް މަނިޓަރީ އޮތޯރޮޓީގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
އެމްއެމް ޓީވީގެ "ބޮޑު ޚަބަރު" ޕްރޮގްރާމުގައި ވާހަކަފުޅު ދައްކަވަމުން ގަވަރުނަރު ވިދާޅުވީ، ރާއްޖޭގެ ބޭންކުތައް މުއްސަނދި ކުރުމަށް އެންމެ މުހިންމު ކަމަކަށް ކުރައްވަން ނިންމަވާފައިވާ ކަމަކީ ބޭންކިންގ ގާނޫނު އިސްލާޙު ކުރުން ކަމަށެވެ. އަދި އެކަން އަންނަ އަހަރުގެ ތެރޭގައި ކުރެވިގެންދާނެކަން ގަވަރުނަރު ފާހަގަކުރެއްވިއެވެ.
އެގެންނަ އިސްލާޙްތަކާއެކު ބޭންތަކުގެ ކެޕިޓަލް ބޮޑު ކުރެވި، ރާއްޖޭގެ ބޭންކު ތަކަށް، ފަތުރުވެރިކަމުގެ ދާއިރާއަށް ލޯނުތައް ދެވެންފަށާނެ ކަމަށް މުނައްވަރު ވިދާޅުވިއެވެ.
ދެވަނަ ކަމަކަށް ކުރައްވަން ނިންމަވާފައިވާ ކަމަކީ، އިސްލާމިކް ބޭންކުގެ ސެންޓާރއެއްގެ ގޮތުގައި ރާއްޖެ ހެދުމަށް، އަންނަ އަހަރު އިސްލާމިކް ބޭންކިންގެ ޤާނޫނެއް އެކުލަވައިލުން ކަމަށް ވެސް ގަވަރުނަރު ވިދާޅުވިއެވެ.
"ދިވެހި ރާއްޖޭގެ އިސްލާމިކް ބޭންކު އަދިވެސް މިއޮތީ ރެގިޔުލޭޝަނެއްގެ ތެރޭގައި. ރާއްޖެއަކި ސައްތައިން ސައްތަ އިސްލާމީ ގައުމަކަށް ވާއިރު، އަޅުގަނޑު ގަބޫލުކުރާ ގޮތުގައި، ރާއްޖެއަކީ، ސެންޓަރ އެއްގެ ގޮތުގައި ތަރއްގީ ކުރެވޭނެ ތަނެއް. މިހެން ކިޔާތާ ވަރަށް ދުވަސް ވެއްޖެ. ނަމަވެސް މިޔަށް ބޭނުންވާ ގާނޫނެއް ނެރެފައެއް ނެތް. އެއިގެ ތެރެއިން ބޭނުންވާ ފަސޭހަތަކެއް ބޭންކުތަކަށް ދީފައެއް. އެހެންވީމާ އިތުރު ބޭންކުތައް ރާއްޖެއަށް ނާންނާނެ ނޫންތޯ؟”
ގަަވަރުނަރު އަހުމަދު މުނައްވަރު
އެހެންވީމާ، އިރާދަކުރެއްވިއްޔާ މި އަންނަ އަހަރު ތެރޭގައި އަޅުގަނޑު ވަރަށް އިސްކަމެއް ދޭނަން އިސްލާމިކް ބޭންކިންގ ޤާނޫން، އަޅުގަނޑުމެން ވަރަށް އަވަހަށް ފަރުމާކޮށް ނިންމާލާފަ މަޖިލީހަށް ހުށަހަޅަން " ގަަވަރުނަރު އަހުމަދު މުނައްވަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
