ވަކި މީހަކު އިސްތިސްނާކުރުމެއް ނެތި ބައިނަލްއަޤުވާމީ ކޯޓުތަކުގެ އަމުރުތައް ރާއްޖެއިން ތަންފީޒުކުރާނެ ކަމަށް ދާޚިލީ ސަލާމަތާ ބެހޭ ވުޒާރާ ވަޒީރު ޢަލީ އިޙްސާން ވިދާޅުވެއްޖެއެވެ.

އިސްރާއީލްގެ ބޮޑުވަޒީރު ރާއްޖެ އައިސްފިނަމަ ހައްޔަރުކުރާނެތޯ ވަޒީރާ ސުވާލުކުރެއްވުމުން، އެކަމަށް އެއްޗެއް ވިދާޅުނުވެ ހަނުހުންނެވިކަމަށް ބުނެ މީޑިއާއަކުން ލިޔެފައިވާ ޚަބަރަކާއި ގުޅިގެން އެކްސްގައި ކުރެއްވި ޕޯސްޓެއްގައި އިޙްސާން ވިދާޅުވީ، ރާއްޖެއަކީ ބައިނަލްއަޤުވާމީ ކޯޓުތަކުން ކުރާ އަމުރުތައް އެއްވެސް މީހަކު ތަފާތުކުރުމެއްނެތި ތަންފީޒުކުރާނެ ޤައުމެއްކަމަށެވެ.

”މިވާހަކަ ރޭގަވެސް އަޅުގަނޑުވާނެ ދަންނަވާފައި. އަދި ބައެއް ނޫސްތަކުން ގުޅުމުން މިވާހަކަ ވާނެ ތަކުރަާރުކޮށްފައި އަދި އިތުރު ސުވާލުތަކަށް ޖަވާބުވެސް ދީފަ.“ ވަޒީރު އަލީ އިހްސާން ވިދާޅުވިއެވެ.

ޒަޔަނިސްޓު އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫއާއި އޭނާގެ ކުރީގެ ދިފާޢީ ވަޒީރު ޔޯއަވް ގަލަންޓް ހައްޔަރުކުރުމުގެ އަމުރު ބައިނަލްއަޤުވާމީ ޖިނާޢީ ކޯޓު، އައިސީސީން ވަނީ ނެރެފައެވެ.

އައިސީސީން ނެރެފައިވާ އަމުރުގައި ވާގޮތުން، އެމީހުން ހައްޔަރުކުރަން އަމުރު ނެރެނީ އޮކްޓޯބަރު 8، 2023އާއި މިއަހަރުގެ މެއި މަހުގެ 20އާ ހަމައަށް ހިންގައިފައިވާ ހަނގުރާމައިގެ އާއި އިންސާނިއްޔަތާ ޚިލާފު ޖަރީމާތަކުގެ ތުހުމަތުގައި ކަމަަށެވެ. 

އެގޮތުން، ހަނގުރާމަ ކުރުމުގެ ނަމުގައި ބަނޑުހައިހޫނުކަން އުފައްދައި، އިންސާނީ އެހީގެ ސާމާނު ނުދިނުމާއި، އާންމުންނަށް އަމާޒުކުރުމުގެ ކުށުގެ ދައުވާ ކޮށްފައިވެއެވެ.

އައިސީސީއަކީ ޖަރީމާތަކާއި ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތައް ފަދަ ބޮޑެތި ކުށްތައް ބެލުމަށް އުފައްދާފައިވާ ދުނިޔޭގެ ހަމައެކަނި މިނިވަން ކޯޓެވެ. ނަމަވެސް އެ ކޯޓަށް ތަންފީޒީ ބާރުތަކެއް ލިބިފައެއް ނުވެއެވެ.

ނަތަންޔާހޫއާއި އޭނާގެ ކުރީގެ ދިފާޢީ ވަޒީރު ޔޯއަވް ގަލަންޓް ހައްޔަރުކުރުމުގެ އަމުރު އައިސީސީން ނެރުމާއި ގުޅިގެން އެކަމަށް ރާއްޖެއިން ވަނީ މަރުހަބާ ކިޔާފައެވެ.