ލުބްނާނުގެ ދެކުނުގައި އުޅޭ ރައްޔިތުން އެނބުރި އެމީހުންގެ ގެދޮރަށް ދިޔުމަށް ހައްދުފަހަނައަޅާފައިވާ އިސްރާއީލުން ހުރަސް އަޅަން ފަށައިފިއެވެ.

ލުބުނާނުގެ ދެކުނުގައިވާ 60 ސަރަހައްދަކަށް އެނބުރި ނުދިޔުމަށް ޔަހޫދީ ފައުޖުން ލުބުނާނުގެ ރައްޔިތުންނަށް އިންޒާރުދީފައިމިވަނީ، އިސްރާއީލުން ލުބުނާނުގައި ހިންގަމުން އައި އުދުވާން ހުއްޓާލުމަށް އެއްބަސްވުމަށްފަހުއެވެ.

މިއާއިއެކު، އިސްރާއީލާއި ލުބުނާނުގެ ބޯޑަރުގެ ދެފަރާތުގައިވާ ރަށްތަކުގެ ރައްޔިތުންނަށް އެމީހުންގެ ގެތަކަށް ނުދިޔުމަށް ޔަހޫދީ ފައުޖުން އިންޒާރުދީފައިވާއިރު، އެމީހުން ބުނާގޮތުގައި އެ ސަރަހައްދަށްދާ އާއްމުންގެ ފުރާނައަށް ނުރައްކާވާނެއެވެ.

Advertisement

އެހެންނަމަވެސް، ހަނގުރާމަ ހުއްޓާލުމުގެ އެއްބަސްވުމުގެ ދަށުން، އިސްރާއީލުގެ ސިފައިން ކުރިއަށް އޮތް 60 ދުވަހުގެ ތެރޭގައި ލުބުނާނުގެ ދެކުނު ސަރަހައްދު ދޫކޮށް ދާން ޖެހޭނެއެވެ.

ލުބުނާނުގެ ސަރުކާރުގެ ނޫސް އެޖެންސީން ރިޕޯޓުކުރި ގޮތުގައި، ނިރުބަވެރި ފައުޖުން ވަނީ، ލުބުނާނުގެ އެ ސަރަހައްދުތަކުގައި ދިރިއުޅޭ ރައްޔިތުން އެނބުރި އައުން ހުއްޓުވުމަށް ބަޑިޖަހާފައެވެ.

މީގެ އިތުރުންވެސް، ހަނގުރާމަ ހުއްޓާލުމާއި ގުޅޭ އެއްބަސްވުމާއި ޚިލާފުވެ، ނިރުބަވެރިންގެ ޓޭންކުތަކުން ލުބުނާނުގެ ދެކުނުގައިވާ ބުރުޖް-އަލް-މޫލޫކްގައިވާ އިމާރާތަކަށް ހަމަލާދީފައިވާކަމަށް ވެސް ލުބުނާނުގެ ނޫސްތަކުން ރިޕޯޓްކުރެއެވެ.