މޯލްޑިވްސް ރިޓަޔަމަންޓް ޕެންޝަން ސްކީމް ފަންޑް 24.3 ބިލިއަން ރުފިޔާއަށް އަރައިފިއެވެ.

މޯލްޑިވްސް ޕެންޝަން އޮފީހުގެ ތަފާސްހިސާބުތަކަށް ބަލާއިރު، މޯލްޑިވްސް ރިޓަޔަމަންޓް ޕެންޝަން ސްކީމްގެ މެމްބަރުންގެ އަދަދު މިހާރު 190,458 އަރައެވެ. އޭގެ ތެރެއިން ފަންޑަށް ފައިސާ ޖަމާކުރަމުންދާ ފަރާތްތަކުގެ އަދަދަކީ 181,901 އެވެ.

ޕެންޝަން އޮފީހުން ލިބެންހުރި މައުލޫމާތަށް ބަލާއިރު، މިހާތަނަށް ފަންޑުގެ ޖުމްލަ އަދަދު 24.3 ބިލިއަން ރުފިޔާއަށް އަރާއިރު، މެމްބަރުންގެ ފަރާތުން ފަންޑަށް ޖަމާކުރި އަދަދު އުޅެނީ 15.2 ބިލިއަން ރުފިޔާގައެވެ. އެހެންކަމުން ފަންޑަށް އިތުރުވި 9.1 ބިލިއަން ރުފިޔާއަކީ ފަންޑުން ކުރި އިންވެސްޓްމަންޓްތަކުން މިހާތަނަށް ލިބުނު ފައިދާއެވެ.

ޕެންޝަން އޮފީހުން ގެންދަނީ ފަންޑުގެ ފައިދާ މެމްބަރުންނަށް ހޯދައިދިނުމަށް އެކި ދާއިރާތަކުގައި އިންވެސްޓްކުރަމުންނެވެ. މީގެ ތެރޭގައި ކުންފުނިތަކުގެ ހިއްސާގަތުމުގެ އިތުރުން ޓީބިލް އަދި ބޮންޑް ގައި އިންވެސްޓްކުރަމުންދާކަން ފާހަގަކޮށްލެވެއެވެ. ރިޓަޔަމަންޓް ޕެންޝަން ސްކީމް ފަންޑުގެ ތާރީހަށް ބަލާއިރު، އެ ފަންޑްގެ ފުރަތަމަ އަހަރު ޖަމާކޮށްފައިވަނީ، 165 މިލިއަން ރުފިޔާއެވެ. ނަމަވެސް މިހާރު، އަހަރަކު އެ ފެންޑަށް ޖަމާކުރާ ފައިސާގެ އަދަދު އުޅެނީ އެއް ބިލިއަނަށްވުރެ މަތީގައެވެ. ޕެންޝަން ފަންޑަށް މިހާތަނަށް އެންމެ ގިނައިން ފައިސާ ޖަމާކުރިކަމަށް ދައްކަނީ 2023 ވަނަ އަހަރެވެ. އެއަހަރު 1.6 ބިލިއަން ރުފިޔާ ޖަމާކޮށްފައިވާއިރު، މިއަހަރުގެ މިހާތަނަށް 1.5 ބިލިއަން ރުފިޔާ ވަނީ ޖަމާކޮށްފައެވެ.

މޯލްޑިވްސް ރިޓަޔަރމަންޓް ޕެންޝަން ސްކީމަކީ ވަޒީފާދޭ ފަރާތާއި ވަޒީފާ އަދާކުރާ ފަރާތުން ކަނޑައެޅިފައިވާ ވަކި އަދަދަކަށް ސްކީމަށް ފައިސާ ދައްކައި، އެ ފައިސާ އިންވެސްޓް ކޮށްގެން ރިޓަޔަރމަންޓަށް ފައިސާ ރައްކާކުރެވޭ ޕެންޝަން ނިޒާމެކެވެ. މި ފަންޑަށް ވަޒީފާދޭ ފަރާތުންނާއި ވަޒީފާއަދާކުރާ ފަރާތުން ޕެންޝަން ކޮންޓްރިބިއުޝަންގެ ގޮތުގައި ކޮންމެ މަހަކު މުވައްޒަފުގެ އަސާސީ މުސާރައިގެ %7 ޖަމާކުރެއެވެ.