ހަކަތައިގެ ގޮތުގައި ބޭނުންކުރާ ތެލަށް ކުރަންޖެހޭ ހަރަދުތައް އަހަރުން އަހަރަށް ބޮޑުވެގެންދިއުމަކީ ރާއްޖޭގެ ބަޖެޓަށް އޮތް ބޮޑު ބުރައެކެވެ. މާލީ ވުޒާރާގެ ތަފާސްހިސާބުތަކުން ދައްކާގޮތުގައި ރާއްޖެއަށް ބޭނުންވާ ތެލުގެ ބާވަތްތައް އެތެރެކުރަން އެކަނިވެސް އަހަރަކަށް 750 މިލިއަނަށްވުރެ ގިނަ ޑޮލަރު ހޭދަކުރަން ޖެހެއެވެ. ރާއްޖެއަށް އެތެރެކުރާ ތެލުގެ ބާވަތްތަކުގެ ތެރެއިން ބޮޑު އަދަދެއް އަދަދެއް ބޭނުންކުރަނީ ކަރަންޓްގެ ހިދުމަތް ދިނުމަށް އިންޖީނުގޭތަކުގައި ހުންނަ ޖަނަރޭޓަރުތައް ހިންގުމަށެވެ. 

ތެލަށްކުރާ ހަރަދު ކުޑަކޮށް އިއާދަކުރަނިވި ހަކަތަ ބޭނުންކޮށްގެން ކަރަންޓްގެ ހިދުމަތްދިނުން ފުޅާކުރުމަކީ ސަރުކާރުގެ އަމާޒެކެވެ. މި އަމާޒަށް ވާސިލްވުމަށްޓަކައި ޤައުމީ ކަރަންޓް ކުންފުނިން އަތޮޅުތަކުގެ ރަށްތަކުގައި އިރުގެ ހޫނު ބޭނުންކޮށްގެން ކަރަންޓްގެ ހިދުމަތްދިނުމަށް ކުރިއަށްގެންދާ މަޝްރޫޢު ފާހަގަކޮށްލެވެއެވެ. މި މަޝްރޫޢުގެ ދަށުން ސްޓެލްކޯއިން މިހާރު ވަނީ ވ.ރަކީދޫގައި ކުރިއަށްގެންދިޔަ ހައިބްރިޑް ޕީވީ-ބީއީއެސްއެސް-ޑީޖީ ނިޒާމް ގާއިމްކޮށް ނިންމާފައެވެ. 

ރަކީދޫގައި ގާއިމްކުރެވިގެންދިޔަ މަޝްރޫޢުއާ ބެހޭގޮތުން ނޫސްވެރިންނާ ވާހަކަދައްކަވަމުން ސްޓެލްކޯގެ ޖެނެރަލް މެނޭޖަރު އިބްރާހިމް ނިޒާމް ވިދާޅުވީ އެކުންފުނިން ރަކީދޫގައި ކުރިއަށްގެންދިޔަ އިރުގެ އަލިން ހަކަތަ އުފެއްދުމުގެ މަޝްރޫޢު ވަރަށް ކާމިޔާބުކަމަށެވެ. މިގޮތުން މިހާރު މި ހިދުމަތް ގާއިމްކުރެވިފައިވާ ނިސްބަތަށް ބަލާއިރު، އިންޖީނު ހިންގަން ޖެހެނީ އެންމެ ދެ ގަޑިއިރަށްކަމަށް ނިޒާމް ފާހަގަކުރެއްވިއެވެ. ނަމަވެސް ކުރިއަށް ދުވަސްތަކުގައި ބަހައްޓާ އިތުރު ބެޓްރީތަކާއެކު ރަކީދޫ ވެގެންދާނީ 100 އިންސައްތަ އިއާދަކުރަނިވި ހަކަތަ ބޭނުންކޮށްގެން ކަރަންޓްގެ ހިދުމަތްދެވޭ މީހުން ދިރިއުޅޭ ފުރަތަމަ ރަށުގެ ގޮތުގައިކަން އޭނާ ފާހަގަކުރެއްވިއެވެ.

ނިޒާމް ވިދާޅުވީ މީގެ ކުރިންވެސް ރަކީދޫގައި އިއާދަކުރަނިވި ހަކަތަ ބޭނުންކޮށްގެން ކަރަންޓްގެ ހިދުމަތް ދިނުމަށް މަސައްކަތްކުރިކަމަށެވެ. ނަމަވެސް އެ ނިޒާމު ފުރިހަމަޔަށް ގާއިމްކުރެވިފައިނެތުމުން އެކަން ފުރިހަމަވެގެން ގޮސްފައިނުވާކަމަށް އޭނާ ވިދާޅުވިއެވެ.

މި މަޝްރޫޢުއާ ގުޅޭގޮތުން ނިޒާމް ވިދާޅުވީ ރަކީދޫގައި ސޯލާ ޕެނަލްތައް ގާއިމްކުރެވިގެންދިއުމުން އެރަށުގައި ދިރިއުޅެމުންދާ ރައްޔިތުންގެ ކަރަންޓް ބިލްތަކަށްވެސް ހެޔޮ ބަދަލުތައް އަންނާނޭކަމަށެވެ. މިގޮތުން ރަށުގެ 12 ގެއެއްގައި ސޯލާ ޕެނަލްތައް ހަރުކޮށްފައިވާއިރު، އޭގެ ބަދަލެއް ދިނުމުގެ ގޮތުން، ދެ ގެއަކުން ބިލުން ކެނޑޭގޮތަށް އަދި އަނެއްބައި ގޭތަކަށް ފައިސާ ދޭގޮތަށް ހަމަޖައްސާފައިވާކަން އޭނާ ފާހަގަކުރެއްވިއެވެ.

ރަކީދޫގައި ސްޓެލްކޯއިން ގާއިމްކޮށްފައިވާ އިރުގެ ހަކަތަ ބޭނުންކޮށްގެން ކަރަންޓްދެވޭ ނިޒާމުން އެރަށަށް ބޭނުންވާވަރަށްވުރެ އިތުރަށްވެސް ކަރަންޓް ދެވެއެވެ. މިހަރު ގާއިމްކޮށްފައިވާ ނިޒާމުން 270 ކިލޯވޮޓްގެ ކަރަންޓް އުފެއްދެއެވެ. ސްޓެލްކޯއިން ލަކީދޫގެ މަގުބައްތިތައް ދިއްލުމަށްވެސް ބޭނުންކުރަނީ އިދާދަކުރަނިވި ހަކަތައެވެ.