ޗައިނާގެ ބެލްޓް އެންޑް ރޯޑް އިނީޝިއޭޓިވްގެ ދަށުން ޕެރޫގައި ޝެންކޭގައި ހުޅުވި ވިޔަފާރި ބަނދަރާއެކު އެމެރިކާއާއި ހުޅަނގުގެ ގައުމުތަކުގެ ލޯތައް އެދިމާލަށް ހުއްޓިއްޖެއެވެ.
ޗައިނާގެ ކޮސްކޯ ޝިޕިންގ ކުންފުނިން 3.6 ބިލިއަން އެމެރިކާ ޑޮލަރު ޚަރަދުކޮށްގެން ހެދި މި ބަނދަރަކީ ބޮޑެތި ކާގޯ ބޯޓުފަހަރު ބަނދަރުކުރެވޭ، ޑީޕްވޯޓަރ ޕޯޓެކެވެ. މި ސަރަހައްދަކީ ޕެސިފިކްގައި އެމެރިކާއިން ސްޓްރެޓީޖިކްކޮށް އެގައުމަށް މުހިއްމު ސަރަހައްދެއްކަށް ދެކޭ ސަރަހައްދެކެވެ. އެމެރިކާއިން ދެކޭ ގޮތުގައި ވިޔަފާރި ބަނދަރެއްގެ ގޮތުގައި ހުޅުވިނަމަވެސް، މި ބަނދަރަކީވެސް ސްރީލަންކާގެ ހަމްބަންތޯޓާ ބަނދަރުފަދައިން، ޗައިނާގެ އަސްކަރީ އުޅަނދުފަހަރަށް ޚިދުމަތް ދިނުމަށް ތައްޔާރުކޮށްފައިވާ ބަނދަރެކެވެ.
މި ބަނދަރުގެ 60 އިންސައްތަ ހިއްސާއަކީ ޗައިނާގެ ހިއްސާކަމުން، ބަނދަރުގެ ބޭނުންކޮށްގެން ބޯޓު ފަހަރުގެ މައުލޫމާތު އެއްކުރުމާއި، މުދަލުގެ މައުލޫމާތު ހޯދުމާއި އަދި ސަޕްލައި ޗެއިންއަށް ބުރޫއެރުވުމުގެ ބާރު ޗައިނާގެ އަތްމައްޗަށް ލިބިދޭތީ އެމެރިކާއިން ވަނީ ކަންބޮޑުވެފައެވެ. ހަމައެއާއެކު، ޝެންކޭއަކީ އެމެރިކާއާއި އެންމެ 5500 ކިލޯމީޓަރު ދުރުގައި އޮންނަ ބަނދަރަކަށްވުމަކީވެސް އެމެރިކާގެ ކަންބޮޑުވުމެކެވެ.
ޗައިނާއިން މި ޕްރޮޖެކްޓް ޕްރޮމޯޓްކުރަނީ ދެކުނު އެމެރިކާ ސަރަހައްދުގެ ވިޔަފާރީގެ ތަރައްގީގެ ބޮޑު ޕްރޮޖެކްޓެއްގެ ގޮތުގައެވެ.
Advertisement
This content is created and paid for by advertisers and does not involve Voice Journalists
