ޓައިވާނުގެ ރައީސް ލައި ޗިންގް-ޓޭ ޕެސިފިކްގެ ބައެއް ގައުމުތަކަށާއި އެމެރިކާއަށް ކުރެއްވުމަށް ހަމަޖެހިފައިވާ ދަތުރުފުޅާ ދިމާކޮށް، ޗައިނާއިން އަނެއްކާވެސް އަސްކަރީ ތަމްރީންތަކެއް ބާއްވަފާނެކަމަށް މުހައްލިލުން ބުނެފިއެވެ.

މާދަމާ ފައްޓަވާ މި ދަތުރުފުޅުގައި ލައި ވަޑައިގަންނަވާ ޕެސިފިކްގެ ޤައުމުތަކަކީ މާޝަލް އައިލެންޑްސް، ޓުވާލޫ އަދި ޕަލާއޯ އެވެ. ޕެސިފިކްގައި އޮންނަ ޖަޒީރާ މި ރަށްތަކަކީ ޓައިވާނާއެކު ޑިޕްލޮމެޓިކް ގުޅުން ގާއިމްކޮށްފައިވާ 12 ޤައުމުތަކުގެ ތެރެއިން 3 ޤައުމެވެ. އަދި މި ދަތުރުފުޅުގައި އެމެރިކާގެ ޓެރިޓަރީއެއް ކަމަށްވާ ގުއާމްގައި އެއް ރޭ އަދި އެމެރިކާގެ ހަވާއީގައި 2 ރޭ ލައި ހޭދަކުރައްވާނެއެވެ. މިއީ މިދިޔަ މެއި މަހު ވެރިކަމާ ހަވާލުވެވަޑައިގެންނެވި ފަހުން ލައި އެމެރިކާގެ ފަސްގަނޑުގައި މަޑުކުރައްވާ ފުރުތަމަ ދަތުރުފުޅެވެ.

ޓައިވާނާއެކު އެމެރިކާއިން ޑިޕްލޮމެޓިކް ގުޅުން ގާއިމްކޮށްފައިނުވާތީ ޓައިވާނުގެ ވެރިން އާއްމުކޮށް އެމެރިކާއަށް ކުރައްވަނީ ނުރަސްމީ ދަތުރުފުޅުތަކެވެ. އަދި ޓައިވާނުގެ ގާތް ގައުމުތަކަށް ދަތުރުކުރައްވާއިރު، ޓްރާންސިޓް ޕޮއިންޓެއްގެ ގޮތުގައި ޓައިވާނުގެ ވެރިން އާއްމުކޮށް އެމެރިކާގެ ސިޓީތައް ބޭނުންކުރައްވައެވެ.

ޗައިނާ ސަރުކާރުން ޓައިވާނާއެކު މަޝްވަރާކުރުމަށް އުފައްދާފައިވާ ޓައިވާން އެފެއަރޒް އޮފީހުންވެސް ވަނީ ލައިގެ މިދަތުރުފުޅަކީ މަސްރަހު ގޯސްކުރުމަށް ކުރައްވާ ދަތުރުފުޅެއްގެ ގޮތުގައި ސިފަކޮށްފައެވެ.

ލައިގެ ދަތުރުފުޅާ ދިމާކޮށް ޗައިނާއިން އަނެއްކާވެސް ޓައިވާނަށް އަރައިގަންނާނެ ގޮތްތަކުގެ އަސްކަރީ ފަރިތަކުރުންތަކެއް ބާއްވަފާނެކަމަށް މުހައްލިލުން އަންދާޒާކުރެއެވެ. އަދި ވަކިން ޚާއްސަކޮށް މިދުވަސްވަރަކީ އެމެރިކާގެ ރިޔާސަތުވެސް ބަދަލުވަމުން އަންނަ ދުވަސްވަރުކަމުން، މިމައްސަލައިގެ ހައްސާސްކަންވަނީ އިތުރުވެފައެވެ. ޗައިނާއިން ޓައިވާނަށް އަރައިނުގަނެ އޮންނަ އެންމެ ބޮޑު އެއް ސަބަބަކީ ޓައިވާނުގެ ދިފާޢުގައި އެމެރިކާއިން ތެދުވެދާނެކަމުގެ ބިރު އޮތުމެވެ. އެމެރިކާގެ ވެރިކަމާއި ޑޮނަލްޑް ޓްރަމްޕް އަލުން ހަވާލުވުމަށްފަހު ދެން ކަންތައް ކުރައްވާނެ ގޮތެއް މުހައްލިކުންވެސް އެނގެން ބޭނުންވެފައެވެ