ކޮވިޑް-19 ބަލިމަޑުކަމުގެ ފަހަތުގައިވާ ވައިރަސް ކަމުގައިވާ ސާރސް-ކޮވް-2، އިންފެކްޝަން ޖެހުމަށްފަހު އަހަރުތަކަކަށް ސިކުނޑިއާއި މެނިންޖަސްގައި ހުންނަކަމަށް ދިރާސާއަކުން ދައްކައިފިއެވެ.

ހެލްމްހޯލްޓްޒް މިއުނިކް އަދި ލުޑްވިގް-މެކްސިމިލިއަންސް-ޔުނިވަރސިޓޭޓް (އެލްއެމްޔޫ) ގެ ދިރާސާވެރިން ދެނެގަތް ގޮތުގައި، ސާރސް-ކޮވް-2 ގެ ސްޕައިކް ޕްރޮޓީން އަކީ އިންފެކްޝަން ޖެހުމަށްފަހު 4 އަހަރާއި ހަމައަށް ސިކުނޑީގެ ރައްކާތެރި ފަށަލަތަކުގައި، މެނިންޖަސް އަދި ބޮލުގެ ނާށިގަނޑުގައި މެދުގައި ހުންނަ އެއްޗެކެވެ.

މިކަމުގެ ސަބަބުން ސިކުނޑިއަށް ދިގު މުއްދަތަކަށް އަސަރުކުރާއިރު، މި ސްޕައިކް ޕްރޮޓީންތަކަކީ  ދިގު މުއްދަތަކަށް ދެމިގެންދާ އިންފްލަމޭޝަން އުފެދުމަށް މަގުފަހިކޮށްދޭ އަދި ނިއުރޯޑީޖެނެރޭޓިވް ބަލިތަކަށް ހުށަހެޅުމުގެ ފުރުޞަތު އިތުރުކުރާ އެއްޗެއްކަމަށް މި ދިރާސާއިން ދައްކައެވެ.

ހެލްމްހޯލްޓްޒް މިއުނިކްގެ އިންސްޓިޓިއުޓް ފޯ އިންޓެލިޖެންޓް ބަޔޯޓެކްނޮލޮޖީސްގެ ޑިރެކްޓަރ ޕްރޮފެސަރ އަލީ އެރްޓޫރްކް ވިދާޅުވި ގޮތުގައި، މީެ ސަބަބުން ދިގު މުއްދަތަކަށް އަސަރުތަކުގެ ތެރޭގައި ސިކުނޑި ދުޅަހެޔޮކަމާއިއެކު މަސައްކަތްކުރުމުގެ ޤާބިލުކަން 5 އިން 10 އަހަރާ ހަމައަށް ގެއްލިގެން ހިނގައިދާނެއެވެ.

ސެލް ހޯސްޓް އެންޑް މައިކްރޯބް ޖާނަލްގައި ޝާއިޢުކުރެވުނު މި ދިރާސާއިން ދައްކާގޮތުގައި، ކޮވިޑްގެ ނިއުރޮލޮޖިކަލް އަލާމާތްތަކުގެ ތެރޭގައި ބޮލުގައި ރިއްސުމާއި، ނިދުމުގެ މައްސަލަތަކާއި، އަދި "ބްރެއިން ފޮގް" ނުވަތަ ސިކުނޑީގެ މަސައްކަތް ދަށްވުން ހިމެނިދާނެއެވެ.

މީގެ އިތުރުންވެސް މި ދިރާސާއިން ދައްކާގޮތުގައި، ކޮވިޑް ޖެހޭ މީހުންގެ ތެރެއިން 5 އިން 10 އިންސައްތަ މީހުންނަކީ ދިގު މުއްދަތަށް ކޮވިޑް ތަޖުރިބާ ކުރަން ޖެހޭ މީހުންނެވެ. މާނައަކީ ގާތްގަނޑަކަށް 400 މިލިއަން މީހުންގެ ހަށިގަނޑުގައި ގިނަ އަދަދެއްގެ ސްޕައިކް ޕްރޮޓީން ހުރުމަކީ އެކަށީގެންވާކަމެކެވެ.

ފާހަގަކޮށްލެވޭ ގޮތެއްގައި، މި ނުރައްކާތެރި ވައިރަހަށް ދެވޭ ވެކްސިންތަކުން ސިކުނޑީގައި ސްޕައިކް ޕްރޮޓީން އެއްވުން ވަރަށް ބޮޑަށް މަދުކުރެއެވެ.

އެހެން ނަމަވެސް، މި ދިރާސާއަށް ބޭނުންކުރި މީދަލުގެ ކިބައިގައި ފާހަގަވާގޮތުގައި، ވެކްސިން ދިނުމުންވެސް މި ޕްރޮޓީން އެއްވުން މަދުކުރެވިފައި ވަނީ އެންމެ 50 އިންސައްތައާ ގާތްކުރާ މިންވަރަކަށެވެ. އެހެންކަމުން، ސިކުނޑިއަށް ނުރައްކާތެރި އަސަރެއް ކުރުމުގެ ފުރުޞަތު އޮތް ސްޕައިކް ޕްރޮޓީންގެ ބާކީބައި ހަށިގަނޑުގައި ދެމިހުރެއެވެ.

މި ދިރާސާއަށްޓަކައި، ޓީމުން ވަނީ ސާރސް-ކޮވް-2 ގެ ސްޕައިކް ޕްރޮޓީން ސިކުނޑިއަށް ކުރާ އަސަރު ދެނެގަތުމަށް އާ އޭއައި ބޭނުންކޮށްގެން އިމޭޖިންގ ޓެކްނިކެއް ތަރައްޤީކޮށްފައެވެ.

މި ވަސީލަތުން ވައިރަލް ޕްރޮޓީންތަކުގެ ތިންބުރި ވިޝުއަލައިޒޭޝަނެއް ދައްކުވައިދޭއިރު، މި ގޮތް ބޭނުންކޮށްފައިވަނީ ކޮވިޑް-19 ޖެހުނު މީހުންނާއި ދިރާސާއަށް ބޭނުން ކުރި މީދަލުގެ ޓިޝޫ ސާމްޕަލްތަކުގައި ކުރިން ނުފެންނަ ގޮތަށް ހުރި ސްޕައިކް ޕްރޮޓީންގެ ޑިސްޓްރިބިއުޝަން ހޯދުމަށެވެ.

މި ހޯދުންތަކުން ދައްކާގޮތުގައި އިންފެކްޝަން ޖެހުނުތާ އަހަރުތަކެއް ފަހުން ވެސް ބޮލުގެ ނާށިގަނޑުގައި އާއި މެނިންޖަސްގައި ސްޕައިކް ޕްރޮޓީން ވަރަށް މަތީ މިންވަރެއްގައި ހުރެއެވެ.

އެހެންކަމުން ދިރާސާ ކުރި ފަރާތްތައް ވަނީ މިކަމަށްޓަކައި އައު ތެރަޕީތަކެއް ހޯދުމާއި، މިކަން ދެނެގަނެވޭނެ ގޮތްތަކެއް ހޯދުމުގެ މުހިންމުކަން ފާހަގަކޮށްފައެވެ.