ޕެރައެތުލީޓުންނަށް ފުރުސަތުތައް ފަހިކޮށްދިނުމަށްޓަކައި ގާނޫނީ ބާރުވެރިކަން ލިބިދޭ ގޮތަށް މޯލްޑިވްސް ޕެރަލިމްޕިކް ކޮމިޓީ ގާއިމް ކުރުމަށް ކުޅިވަރު ގާނޫނަށް އިސްލާހު ހުށަހަޅައިފިއެވެ.

ސަރުކާރުގެ ފަރާތުން މި އިސްލާހު ހުށަހެޅުއްވީ ދިއްދޫ ދާއިރާގެ މެންބަރު އަބްދުއްލަތީފްއެވެ. 

މި އިސްލާހުގައި ބުނެފައިވަނީ މި ގާނޫނަށް އަމަލުކުރަން ފަށާ ތާރީޚުން ފެށިގެން މޯލްޑިވްސް ޕެރަލިމްޕިކްގެ ނަމުގައި މިޙާރު އޮތް ޖަމިއްޔާ ވަކި ގާނޫނީ ޝަޚްސެއްގެ ގޮތުގައި ބަދަލުވާނެ ކަމަށާ އެއާއެކު އެ ކޮމިޓީއަށް ގާނޫނީގޮތުން ގިނަ ބާރުތަކެއް ލިބިގެންދާނެ ކަމަށެވެ.

އޭގެ ތެރޭގައި، އަމިއްލަ ނަމުގައި ދައުވާ ކުރުމާއި، ދައުވާ ލިބިގަތުމާއި އެ ނޫންވެސް މުއާމަލާތްތައް ކުރުމުގެ ހައިސިއްޔަތު ލިބިގެންވާ ދަރަންޏަށް ޒިންމާވުމާއި، އުފުލޭ މުދަލާއި ނުއުފުލޭ މުދާ މިލްކު ކުރުމުގެ އިތުރުން، އެ މުދަލުން ތަސައްރަފް ކުރުމުގެ ހައްގު ލިބިގެންދާނެ ކަމަށް ބުނެފައިވެއެވެ:

މި ކޮމިޓީގެ މަސްއޫލިއްޔަތު ތަކުގެ ތެރޭގައި ޕެރަލިމްޕިކްސްގެ އަސާސްތައް ރާއްޖޭގައި ތަރައްގީކޮށް ދެމެހެއްޓުމަށް މަސައްކަތް ކުރުމާއި، ރާއްޖެއިން ބައިވެރިވާ ކުޅިވަރު މުބާރާތްތަކަށް ގައުމީ ޓީމުތައް ފޮނުވާނެ ގޮތް ކަނޑައަޅައި އެ މުބާރާތްތަކަށް ޓީމުތައް ފޮނުވުމުގެ އިންތިޒާމްތައް ހަމަޖެއްސުން ވެސް ގާނޫނުގައި ވަނީ ހިމަނާފައެވެ. 

އަދި ކޮމިޓީގެ މުސްތަގިއްލުކަން އަބަދުވެސް ދެމެހެއްޓުމަށާއި އިންޓަނޭޝަނަލް ޕެރަލިމްޕިކް ކޮމިޓީގެ ހޭންޑްބުކްއާ ޚިލާފުވެދާނެ އެއްވެސް ބާވަތެއްގެ ނުފޫޒެއް ކޮމިޓީގެ މައްޗަށް އެއްވެސް ބަޔަކަށް ފޯރުވުމުގެ ފުރުސަތު ނުދިނުމާއި އެ ބާވަތުގެ އެންމެހައި ފިއްތުން ތަކުން ނުވަތަ ގޮންޖެހުންތަކުން އެއްކިބާވެ ފިޔަވަޅު އެޅުންވެސް ހިމެނެއެވެ. 

މީގެ އިތުރުންވެސް ކުޅިވަރުގެ ގާނޫނަށް ގިނަ އިސްލާހުތަކެއް ވަނީ ބިލުގައި ހިމަނުއްވާފައެވެ.