ދުނިޔޭގެ ނަން މަޝްހޫރު ޔުނިވަރސިޓީތަކުން ދިވެހިންނަށް ފުރުސަތު ހޯދައިދޭން މަސައްކަތްކުރަމުންދާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމްގެ "52 ހަފްތާ" ޕްރޮގުރާމްގައި ވާހަކަދައްކަވަމުން ނަޒީރު ވިދާޅުވީ، ރާއްޖޭގައި ދެވޭ އެންމެ މަތީ ފަންތީގެ ސްކޮލަރޝިޕް ކަމަށްވާ ރައީސުލްޖުމްހޫރިއްޔާ ދެއްވާ ސްކޮލަރޝިޕް މިއަހަރު 19 ދަރިވަރަކަށް ދީފައިވާކަމަށެވެ.

މި ސްކޮލަޝިޕަކީ ބޭނުން ޔުނިވަރސިޓީއަކުން އަދި ބޭނުން ދާއިރާއަކުން ކިޔަވަން ލިބޭ ފުރުޞަތެއް ނަމަވެސް ދުނިޔޭގެ ނަން މަޝްހޫރު ބޮޑެތި ޔުނިވަރސިޓީތަކަށް ވަންނަން ދަރިވަރުންނަށް ބައެއްފަހަރު ދަތިތައް ދިމާވާކަން ފާހަގަކުރައްވާ ނަޒީރު ވިދާޅުވީ އެފަދަ ޔުނިވަރސިޓީތަކުން ދިވެހިންނަށް ޖާގަ ލިބޭކަން ކަށަވަރުކުރުމުގެ މަސައްކަތް ކުރަމުންދާކަމަށެވެ.

މިގޮތުން ދުނިޔޭގެ މަޝްހޫރު ޔުނިވާސިޓީތައް ކަމަށްވާ އޮކްސްފޯޑާއި ހާވާޑާއި ކެމްބްރިޖްފަދަ ޔުނިވަރސިޓީތައް ހިމެނޭހެން ރައީސުލްޖުމްހޫރިއްޔާގެ ސްކޮލަރޝިޕް ލިބޭ ދިވެހިންނަށް ކޮންމެ ޔުނިވަރސިޓީއަކުންވެސް 1 ނުވަތަ 2 ޖާގަ ކަށަވަރުކުރުމުގެ މަސައްކަތް ކުރަމުންދާކަމަށް ނަޒީރު ވިދާޅުވިއެވެ. 

ނަޒީރު ވިދާޅުވީ، މި ޔުނިވަރސިޓީތަކުގައި ޖާގަތަކަކީ ކުރިން ކަނޑައެޅިފައި ހުންނަ އެއްޗަކަށް ނުވިނަމަވެސް، ޖާގަތައް ކުރިން ކަނޑައެޅި، ދިވެހިންނަށް ލިބޭނެކަން ކަށަވަރުކުރެވޭނެ ނިޒާމެއް ޤާއިމްކުރުމުގެ މަސައްކަތް ކުރަމުންދާކަމަށެވެ.