ހުޅުމާލޭ  ފަޔާ ސްޓޭޝަނާ ދިމާލު މޫދުން އިއްޔެގެ ވަގުތެއްގައި މަރުވެފައި އޮއްވާ ފެނިފައިވަނީ، އެހިސާބު ކަންނެލި ޖެޓީގައި އޮތް މަސްދޯންޏެއްގެ މީހެއްކަން ވޮއިސްއަށް އެނގިއްޖެއެވެ.

އިއްޔެ ހުޅުމާލޭ ފަޔާ ސްޓޭޝަނާ ދިމާލު މޫދުގައި މަރުވެފައި އޮތް މީހަކު ފެނިފައިވާކަމުގެ މައުލޫމާތު ފުލުހުން ވަނީ މީޑިއާތަކާ ހިއްސާކޮށްފައެވެ. އެއީ ފިރިހެނެއް ކަމަށާއި، އެމީހާ ހޮސްޕިޓަލަށް ގެންދިޔަ އިރުވެސް އޮތީ މަރުވެފައި ކަމަށް ފުލުހުން ބުންޏެވެ. ނަމަވެސް އެކަމާ ގުޅޭ އިތުރު މައުލޫމާތު ފުލުހުން ހާމަކޮށްފައެއް ނުވެއެވެ.

ވޮއިސް އިން ބެލިބެލުމުން އެނގުނު ގޮތުގައި އިއްޔެ މަރުވެފައި އޮއްވާ ފެނިފައިވަނީ، މ.މަޑުއްވަރިއަށް ނިސްބަތްވާ އިބްރާހިމް ޖިނާހެވެ. އުމުރުން 36 އަހަރުގެ ޖިނާހަކީ މަހަށްދާ ދޯންޏެއްގައި އުޅޭ މީހެކެވެ. މައުލޫމާތު ލިބިފައިވާ ގޮތުގައި ޖިނާހު ދޯނީގައި ހުރެފައި އެއްގަމަށް ފައިބާފައިވަނީ 29 ވަނަ ދުވަހުގެ ހަވީރުގެ ވަގުތެއްގައެވެ. އޭރު ދޯނި އަޅާފައި އޮތީ ޖެޓީގެ ބޭރުގައެވެ. ޖިނާހު ފޭބިކަމަށް ވަނީ ޑިންގީއެއްގައެވެ. މި މައުލޫމާތު ވޮއިސްއަށް ލިބުނީ ޖިނާހުގެ ގާތް މީހުންގެ ފަރާތުންނެވެ.

ޖިނާހު އެއްގަމަށް ފޭބުމަށްފަހު އަނބުރާ ދޯންޏަށް އަރަންވެގެން ޑިންގީއެއް ހޯދަން ދޯނީގެ ބައެއް މީހުންނަށް، އެ ރޭގެ 12 ޖަހަން ކައިރިވެފައި ހުއްޓައި ގުޅާފައިވާއިރު، ފަހުން ދޯނި މީހުން ގުޅިއިރު، އޭނާގެ ހަބަރެއް ވެފައެއް ނުވެއެވެ. ޖިނާހު ދޯނީގެ މީހުންނާ ގުޅިތާ ކުޑައިރުކޮޅެއްގެ ފަހުން އޭނާގެ ފޯނު އޮތީ ނިއްވާލާފައެވެ.

ހުޅުމާލެ ކަންނެލިޖެޓީ ސަރަހައްދު.މި ހިސާބުގައި ސީސީޓީވީ ކެމެރާ ހަރުކޮށްފައެއް ނުހުރޭ.. ފޮޓޯ/ވޮއިސް

ވޮއިސްއިން ހޯދި މައުލޫމާތުތަކުން އެނގުނު ގޮތުގައި ޖިނާހުގެ ހަބަރެއް އެންމެފަހުން ނުވަނީ، އޭނާ ދޯންޏަށް އެރުމަށް އެރޭ ދަންވަރު ޖެޓީއަށް އައި ހިސާބުންނެވެ. ޖިނާހު ޖެޓީއަށް އައިކަން އެނގެނީ އެހިސާބު މޫދުން އޭނާ ފެނިފައިވާތީއެވެ.

ވޮއިސް އިން މިހާތަނަށް ބެލިބެލުމުން އެނގުނު ގޮތުގައި ކަންނެލި ޖެޓީ ސަރަހައްދުގައި ސީސީޓީވީ ކެމެރާއެއް ނުހުރެއެވެ.