މީގެ ކުރިން ބައިނަލްއަޤުވާމީ މާލީ އިދާރާތަކުން ރާއްޖެ ބަނގުރޫޓުވުމުގެ ހާލަތު އެބައޮތްކަމަށް ބުނި ނަމަވެސް މިހާރު އެފަދަ އިންޒާރުތައް ރިޕޯޓުތަކުގައި ނުހުންނާނެކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ޒަމީރު ހާޒިރުކޮށް ސުވާލުކުރުމަށް ހުޅުވާލެވުނު ފުރުސަތުގައި ފޭދޫ ދެކުނު ދާއިރާގެ މެމްބަރު އިބްރާހިމް ދީދީ (އައިބީ) ވަނީ ރައީސް މުޢިއްޒު ވެރިކަމާއި ހަވާލުވެވަޑައިގެންނެވި އިރު، ދައުލަތުގެ ދަރަނީގެ ގޮތުގައި އޮތް ވަރާއި، އެއީ ދައުލަތުގެ އާމްދަނީގެ ކިހާ އިންސައްތައެއްތޯ ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން، ޒަމީރު ވިދާޅުވީ ވެރިކަމާއި ހަވާލުވިއިރު ރާއްޖޭގެ ޖުމްލަ ދަރަނީގެ ގޮތުގައި 124 ބިލިއަން ރުފިޔާ އޮތް ކަމަށެވެ. އަދި އެ ދަރަނީގެ ގާތްގަނޑަކަށް ދެބައިކުޅަ އެއްބަޔަކީ ނިމިދިޔަ އެމްޑީޕީ ސަރުކާރުން އުފެއްދި ދަރަނިކަމުގައި ޒަމީރު ވިދާޅުވި އެވެ.
އެހެން ކަމުން، އަންނަ އަހަރުގެ ބަޖެޓު ފަރުމާކޮށްފައި ވަނީ ރައްޔިތުންނަށް ދޭން ޖެހޭ ހުރިހާ ހިދުމަތެއް ހިމަނައިގެން ކަމަށެވެ.
ޑިޔުވާ ހުރިހާ ދަރަންޏެއް ދައްކަން އުޅެ އަދި ރައްޔިތުންނަށް ޚިދުމަތް މަސައްކަތްކޮށްފި ނަމަ، އައިއެމްއެފްގެ ރިޕޯޓްގައި އޮތް ގޮތަށް ރާއްޖެ ބަނގުރޫޓް ވާނެ
މޫސާ ޒަމީރު
އެހެން ނަމަވެސް، ރައީސް މުޢިއްޒު ވެރިކަމާއި ހަވާލުވެވަޑައިގެން ކުރެވުނު މަސައްކުގެ ތެރެއިން، ރާއްޖެ ބަނގުރޫޓް ވުމުގެ ބިރުން ސަލާމަތްވެފައިވާ ކަމަށް ޒަމީރު ވިދާޅުވުއެވެ.
ރައީސް މުއިއްޒު މިހާރު މަސައްކަތް ކުރައްވައިގެން، ރައްޔިތުންނަށް ބޭނުންވާ ހިދުމަތްތައް ފޯރުކޮށްދެވޭ ގޮތަށް ބަޖެޓު ފޯމިއުލޭޓުކޮށް.. އަދި މިހާރު ހުރި ބައެއް ދަރަނި .. މިސާލަކަށް ޑިއުވާ ހުރިހާ ދަރަންޏެއް ދައްކަން އުޅެ އަދި ރައްޔިތުންނަށް ހިދުމަތް ދޭން މަސައްކަތްކޮށްފިއްޔާ އައިއެމްއެފްގެ ރިޕޯޓުގައި އޮތް ގޮތަށް އަޅުގަނޑުމެން ހަމަ ބަނގުރޫޓުވާނެ.. އެ ސިނާރިއޯއިން ރާއްޖެ ނެރެ، ރެވެނިއު ސްޓްރީމްތައް ރަނގަޅުކޮށް އަދި ހަރަދުތައް ރެޝަނަލައިޒްކޮށް ދަރަނީގެ މުއްދަތު އިތުރުކޮށް ބައިލެޓްރަލްކޮށް މަސައްކަތްކޮށް ރަހުމަތްތެރި ގައުމުތަކާއި އެކު މަސައްކަތް ކުރައްވައިގެން އެ ހުރިހާކަމެއް ހުރީ ހަމަޖެހިފައި.. ދަރަނި ތަކުން ސަލާމަތް ވުމަށް ރައީސް ހުރީ ގިނަ ޕްލޭންތަކެއް ކުރައްވައިގެން. އެހެންވީނާ ރާއްޖެ ބަނގުރޫޓް ވުމުގެ ހާލަތުން މިވަނީ ސަލާމަތް ވެފައި
މޫސާ ޒަމީރު
އެހެންކަމުން، ބައިނަލްއަޤުވާމީ މަލީ އިދާރާތަކުން މީގެ ކުރިން ރާއްޖެ ބަނގުރޫޓުވެދާނެކަމުގެ ބަސްތައް ބޭނުން ކުރަމުން ދިޔަ ނަމަވެސް، މިހާރު އެ ރިޕޯޓުތަކުގައި އެވާހަކަ ނުހުންނަކަމަށް ޒަމީރު ވިދާޅުވި އެވެ.
”މިސާލަކަށް އިއްޔެވެސް ރޭޓިންގ އެޖެންސީ ތަކުންވެސް ވާހަކަ ދެއްކި އިރު ބުނެފި، ހަރަދު ކުޑަކުރާށޭ ހަރަދު ކުޑަކުރާށޭ. އެކަމަކު ރާއްޖެ، ބަނގުރޫޓް ވުމުގެ ވާހަކަ ދެއްކުން މިހާރު ހުއްޓިއްޖެ. އެއީ ހަމަ ރައީސް މުޢިއްޒުގެ ހަރުދަނާ ސިޔާސަތުގެ ދަށުން“ ޒަމީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
