ކ. ފުށިދިއްގަރުފަޅު މައްސަލާގައި ކުރީގެ ނައިބު ރައީސް އަދި މިހާރު މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ޗެއާޕާސަން އަބްދުالله ޖިހާދުގެ މައްޗަށް ކުރި ދައުވާ ހައިކޯޓުން ބަލައިނުގަަންނަން ރަޖިސްޓްރާ ނިންމި ނިންމުން ރަނގަޅުކަމަށް އެކޯޓުގެ ފަނޑިޔާރުންގެ މަޖިލީހުން ވެސް ނިންމައިފިއެވެ.

ޖިހާދުގެ މައްޗަށް ދައުލަތުން ދައުވާ އުފުލާފައިވަނީ ފިނޭންސް މިނިސްޓަރަކަށް ހުންނެވި ދުވަސްވަރު ފުށިދިއްގަރުފަޅު ސްޕެޝަލް ޓުއަރިސްޓް ޒޯނެއްގެ ގޮތުގައި ތަރައްގީ ކުރުމަށް ސޮއިކުރެއްވި މައްސަލައިގައެވެ.

އެއެއްބަސްވުމުގައި ސަރުކާރުގެ ހިއްސާގެ ގޮތުގައި 25 އިންސައްތަ އޮތްއިރު ސްޕެޝަލް ޓޫރިޒަމް ޒޯނެއްގައި ގޮތުގައި ތަރައްގީ ކުރާ ތަންތަނުގައި މަދުވެގެން ސަރުކާރުގެ 50 އިންސައްތަ ހިއްސާ އޮންނަން ޖެހޭނެ ކަމަށް ނެޝަނަލް ޕްލޭނިން ކައުންސިލުން ލަފާދީފައި އޮތްކަމަށް ދައުލަތުން ބުނެއެވެ.

Advertisement

މައްސަލަ ހައިކޯޓަށް ހުށަހެޅުމުން، އެ ކޯޓުން ވަނީ އިޖުރާއީ ނިންމުމުގައި ކޯޓަށް ހާޒިރުވުމުގެ އަމުރު ޖިހާދަށް ރައްދު ނުކުރެވޭކަމަށް ބަޔާންކޮށް، އޭނާ ކޯޓަށް ހާޒިރުކުރެވޭނެ އިންތިޒާމު ހަމަޖެއްސުމަށްފަހު އަލުން ހުށަހެޅުމަށް 15 ދުވަހުގެ މުއްދަތެއްދީ، މައްސަލަ އަނބުރާ އަނބުރާ ޕީޖީ އޮފީހަށް ފޮނުވާލާފައެވެ. އޭގެ ފަހުން ޖިހާދުގެ މައްސަލަ އަލުން ހުށަހެޅުމަށް ޕީޖީއަށް އިތުރު ފުރުސަތެއް ދިނެވެ. އެ ފުރުސަތު ހަމަވީ އޮކްޓޯބަރު 13 ވަނަ ދުވަހަށެވެ.

ނަމަވެސް، ޕީޖީން ޖިހާދުގެ މައްސަލައިގެ އިސްތިއުނާފު އަލުން ހުށަހެޅީ އެ ކޯޓުން ދިން މުއްދަތުގެ ދެ ދުވަސް ފަހުން ކަމަށްވާތީ، އެ މައްސަލަ އެ ކޯޓަށް ބަލައިނުގަތުމަށް ހައި ކޯޓުން ވަނީ ނިންމާފައެވެ.

އެއާއެކު ޕީޖީ އޮފީހުންވަނީ ރަޖިސްޓްރަރގެ ނިންމެވުން ކޯޓުތަކުގެ ޤާނޫނުގެ 42 ވަނަ މާއްދާއާއި، ހައިކޯޓުގެ ގަވާއިދުގެ 29 ވަނަ މާއްދާއާ ފުށޫއަރާކަމަށް ފެންނަ ކަމަށް ބުނެ، އެ ނިންމެވުން މުރާޖަޢާކޮށްދެއްވުން އެދި އޮކްޓޯބަރު މަހުގެ 30ގައި ހައިކޯޓުގެ ފަނޑިޔާރުންގެ މަޖިލީހަށް ހުށަހަޅައިފައެވެ.

އެ މައްސަލަ ބެއްލެވި ތިން ފަނޑިޔާރުންގެ ތެރެއިން، ކޯޓަށް މައްސަލަ ބަލައިގަތުމަށް ފެންނަކަމަށް ވިދާޅުވި ހަމައެކަނި ފަނޑިޔާރަކީ ހަސަން ޝަފީއުއެެވެ.

ފަނޑިޔާރު ޝަފީއު ވިދާޅުވީ މައްސަލަ ހުށަހަޅަން ލަސްވި ނަމަވެސް އެއީ ބޭކާރު ލަސްވުމެއް ކަމަށް ނުބެލެވޭކަމަށެވެ.

ނަމަވެސް، ފަނޑިޔާރު ހުޒައިފާ މުޙައްމަދުގެ ރައުޔުގައިވަނީ މައްސަލަ ހުށަހެޅީ މުއްދަތު ފާއިތުވި ފަހުން ކަމަށެވެ. އެހެންކަމުން މުއްދަތަށް ހުށަހަޅައިފައިނުވާ ކަމަށް ބަަލައި، އިސްތިއުނާފް ބަލައި ނުގަތުމަށް ނިންމި ނިންމުން ބަދަލުކުރަން ޖާގަ އޮތްކަމަށް ނުފެންނަ ކަމަށެވެ.

އެ ރައުޔަށް ފަނޑިޔާރު ދީބާނާޒް ފަހުމީ ތާއީދުކުރެއްވިއެވެެ.