މަޝްހޫރު އޮކްސްފޯޑް ޔުނިވާސިޓީގެ އޮކްސްފޯޑް ޑިކްޝަނަރީން މިއަހަރުގެ ބަހުގެ ގޮތުގައި "ބްރެއިން ރޮޓް" އިޢުލާނުކޮށްފިއެވެ.

މި ބަސް ބޭނުންކުރަނީ އިންޓަރނެޓުގައި ހުންނަ ދަށް ފެންވަރުގެ ކޮންޓެންޓަށް މާގިނައިން ވަގުތު ހޭދަކުރުމުގެ ސަބަބުން މީހުންގެ ވިސްނުމުގެ ޤާބިލުކަމަށާއި، ސަމާލުކަން ދެމެހެއްޓުމުގެ ޤާބިލުކަމަށާއި، ޖުމުލަކޮށް ނަފްސާނީ ދުޅަހެޔޮކަމަށް ކުރާ ނޭދެވޭ އަސަރުތަކާއި ގުޅިގެންނެވެ.

އޮކްސްފޯޑުން މި ނިންމުން ނިންމާފައިވަނީ 37،000 އަށްވުރެ ގިނަ ބައިވެރިން ހިމެނޭ ޢާންމު ވޯޓެއްގެ ނަތީޖާއާ އެއްގޮތަށެވެ.

"ބްރެއިން ރޮޓް" މި ބަސް ފުރަތަމަ ބޭނުންކުރެވުނީ 1854 ވަނަ އަހަރު ހެންރީ ޑޭވިޑް ތޯރޯ އޭނާގެ "ވޯލްޑެން" ފޮތުގައެވެ.

2023 އާއި 2024 އާ ދެމެދު މި ބަސް ބޭނުންކުރާ މިންވަރު 230 އިންސައްތައިން އިތުރުވެފައިވާކަން ފާހަގަކޮށް އޮކްސްފޯޑުން ވަނީ ޓެކްނޮލޮޖީގެ ސަބަބުން އިންސާނުންގެ ސިކުނޑިއަށް ކުރާ އަސަރާ ބެހޭގޮތުން އޮތް ކަންބޮޑުވުން ފާޅުކޮށްފައެވެ.

މިގޮތުން، ބަހުގެ މާހިރުން ވަނީ މުހިންމުކަމެއް ނެތް ނުވަތަ އޮޅުވާލެވިފައިވާ މަޢުލޫމާތުތައްލިބޭނަމަ، ފުންކޮށް ވިސްނުމާއި ދަސްކުރުމުގެ ޤާބިލުކަން ދަށްވެދާނެ ކަމަށް އިންޒާރުދީފައެވެ. 

މީގެ އިތުރުންވެސް އޮކްފޯޑުން ވަނީ މިއަހަރުގެ ބަހުގެ ގޮތުގައި ކަނޑައެޅުމަށް އިތުރު 5 ބަހެއް ޝޯޓް ލިސްޓްކޮށްފައެވެ. އޭގެ ތެރޭގައި ހިމެނެނީ، ލޯރ، ޑައިނަމިކް ޕްރައިސިން، ޑިމިއުއާ، ސްލޮޕް، ރޮމޭންޓަސީއެވެ.