ބައިނަލްއަޤްވާމީ ކްރެޑިޓް ރޭޓިން އޭޖެންސީ، މޫޑީސް އިން ރާއްޖޭގެ ކްރެޑިޓް ރޭޓިން ދަމަހައްޓައިފިއެވެ.

މޫޑީސްއިން ރާއްޖޭގެ ޜޭޓިން ދެމެހެއްޓިއިރު، އެންމެފަހުން އެ އޭޖެންސީން ރާއްޖެއަށް ދީފައިވަނީ Caa2 އެވެ. މޫޑީސް އިން ރާއްޖޭގެ ރޭޓިން ދަމަހެއްޓުމުގެ މައިގަނޑު ސަބަބަކީ، ހުރިވަރަށްވުރެ ރާއްޖޭގެ މާލީހާލަތު ދަށްނުވެ، ރާއްޖޭގެ އިގްތިސާދީ ހާލަތު ރަނގަޅުކުރުމަށް ފިޔަވަޅުތަކެއް އަޅާފައިވާތީއެވެ. މިގޮތުން މޫޑީސްއިން ވަނީ، ކްރެޑިޓް ރޭޓިންގ ދެމެހެއްޓުމުގައި ބަލާފައިވާ މައިގަނޑު ކަންކަން ފާހަގަކޮށްފައެވެ.

މިގޮތުން ފާއިތުވި މަސްތަކުގައި، ރާއްޖެއަށް ބޭރު ފައިސާގެ ފައިނޭންސިންގ ހޯދުމުގައި ކާމިޔާބީތަކެއް ހާސިލުވެފައިވާ ކަން މޫޑީސްގެ ބަޔާނުގައި ފާހަގަކޮށްފައިވެއެވެ. އެގޮތުން، 2024 ވަނަ އަހަރުގެ ސެޕްޓެމްބަރު މަހު، ދިވެހިރާއްޖެއާއި އިންޑިއާއާއެކު 400 މިލިއަން އެމެރިކާ ޑޮލަރާއި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް އެއްބަސްވުމެއް ޤާއިމުކޮށްފައިވުމަކީ ދިވެހިރާއްޖޭގެ މާލީ ހާލަތު ރަނގަޅުކުރުމަށް ކޮށްފައިވާ މުހިންމު ކަމެއްކަމުގައި މޫޑީސްއިން ބަޔާންކޮށްފައިވެއެވެ. މީގެ އިތުރުން، ސަރުކާރުން ޓެކްސް ރޭޓުތަކަށް ގެނެސްފައިވާ ބަދަލުތައް ތަންފީޒުވެގެން ދިއުމާއެކު، ބޭރު ފައިސާގެ ރިޒާވް އިތުރުވެގެން ދާނެކަމަށްވެސް އަންދާޒާކޮށްފައިވެއެވެ.

ނަމަވެސް، ކުރިއަށް އޮތް 12-18 މަސްދުވަހުގެ ތެރޭގައި ބޭރުގެ ދަރަނި އަދާކުރުމަށް ބޮޑު ހޭދައެއް ކުރަންޖެހޭނެކަމަށް ބެލެވޭއިރު، ބޭރު ފައިސާ ލިބުމަށް ހުރި ދަތިތައް އަދިވެސް ދެމިގެންދާނެކަމަށް މޫޑީސްއިން ބަޔާންކޮށްފައިވެއެވެ.  މޫޑީސްއިން އިތުރަށް ފާހަގަކޮށްފައިވާ ގޮތުގައި، މިހާރު އެކަށައަޅާފައިވާ ކްރެޑިޓް ރޭޓިންގ ކުރިއަށްއޮތް ދުވަސްތަކުގައި އެ މިންގަނޑުގައި ދެމެހެއްޓުން ނުވަތަ މަތިވުން ބިނާވާނީ ދިވެހިރާއްޖޭގެ ސަރުކާރަށް ބޭރު ފައިސާއިން ފައިނޭންސިންގ ހޯދޭ މިންވަރަށާއި، 2025 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓުގައި ސަރުކާރުން ކަނޑައަޅާފައިވާ ފިސްކަލް ރިފޯމްތައް ކާމިޔާބުކަމާއެކު ތަންފީޒުކުރުމުގެ މައްޗަށެވެ.

ރާއްޖޭގެ މާލީހާލަތު ރަނގަޅުކުރުމަށް ހަރުދަނާ ފިޔަވަޅުތަކެއް އެޅުމަށް ސަރުކާރުން މަސައްކަތްކުރަމުންދާއިރު، އެންމެ ފާހަގަކޮސްލެވެނީ ބޭރުފައިސާ މާރުކުރުމަށް މީގެ 40 އަހަރުކުރިން ހަދާފައިވާ ގަވާއިދު ހަރުދަނާކުރުމަށް ކުރަމުންދާ މަސައްކަތެވެ. މިގޮތުން ބޭރުފައިސާ ގެނެ ވިއްކުމުގެ ހަރުދަނާ އައު އުސޫލެއް އެކުލަވާލާފައިވާއިރު، އަންނަ ޖެނުއަރީމަހުން ފެށިގެން އެ އުސޫލަށް އަމަލުކުރުމަށް ވަނީ ނިންމާފައެވެ. މީގެ އިތުރުން ބޭރުފައިސާ ގަނެ ވިއްކުމަށް ޤާނޫނެއް ވުޖޫދަށް ގެނައުމަށްވެސް ސަރުކާރުން ގެންދަނީ މަސައްކަތް ކުރަމުންނެވެ.