މެލޭޝިއާގައި 6 ޑިސެންބަރ 2024 އިން 8 ޑިސެންބަރ 2024 ގެ ނިޔަލަށް ކުރިއަށްގެންދާ 18 ވަނަ އާރުއެސްއޯ ޖޫނިއަރ ފުޓްބޯޅަ މުބާރާތުގައި ވާދަކުރާ ބީޖީ އެކަޑަމީގެ ހަތަރު ޓީމެއް މެލޭޝިއާއަށް ދިއުމަށްޓަކައި މިރޭ ފުރައިފިއެވެ.

ބީޖީ އެކަޑަމީގެ ފަރާތުން ހެޑްކޯޗު އަބްދުއްﷲ ނަސީރު (އަބޯ ކޯޗު) ވޮއިސް ސްޕޯޓްސްއަށް މައުލޫމާތު ދިންގޮތުގައި މިދަތުރުގައި އެކަޑަމީގެ ހަތަރު ޓީމަކުން ޖުމްލަ 49 ކުޅުންތެރިން ބައިވެރިވެފައިވެއެވެ. އޭގެ ތެރޭގައި ހިމެނެނީ 10 އަހަރުންދަށް، 12 އަހަރުންދަށް، 14 އަހަރުންދަށް އަދި 16 އަހަރުން ދަށުގެ ޓީމެވެ.

އިތުރަށް ވާހަކަ ދައްކަމުން އަބޯ ކޯޗު ބުނީ މިއީ މިމުބާރާތުގައި ބީޖީ އެކަޑަމީ އިން ވާދަކުރާ ހަވަނަ އަހަރު ކަމަށެވެ. އަދި މީގެ ކުރިން މިމުބާރާތުގެ 12 އަހަރުންދަށާއި 14 އަހަރުން ދަށުގެ ރަނަރަޕް ޝީލްޑް ބީޖީ އެކަޑަމީ އިން ކާމިޔާބުކޮށްފައިވާއިރު، އުންމީދަކީ މިއަހަރުގެ މުބާރާތުގައި ވެސް ރަނގަޅު ކާމިޔާބީއެއް ހޯދުމެވެ.

Advertisement

ނަމަވެސް މާލީ ދަތިތަކާއިހުރެ، މުހިންމު ބައެއް ކުޅުންތެރިންނަށް މިމުބާރާތުގައި ބައިވެރި ނުވެވުނުކަން ކޯޗު ވަނީ ފާހަގަކޮށްފައެވެ. އަދި މިފަދަ މުބާރާތްތަކުގައި އެކަޑަމީގެ ޓީމުތައް ވާދަކުރާއިރު ކޮންމެ އަހަރަކުވެސް ބެލެނިވެރިންގެ އަތުން ބޮޑު ހޭދައެއް ކުރަންޖެހޭ ކަމަށާއި ނަމަވެސް ކުޅިވަރުގެ ކަންކަމާއި ގުޅުންހުރި އިދާރާތަކުން އެކަށީގެންވާ އެއްބާރުލުން ނުލިބޭތީ އެކަމާއި ހިތާމަކުރާކަމަށެވެ. 

އަޅުގަނޑުމެން މަސައްކަތް ކުރަމުން މިދަނީ ދިވެހި ފުޓްބޯޅައިގެ އައު ޖީލެއް އުފެއްދުމަށް އެގޮތުން ބީޖީ އެކަޑަމީ އިން މި އެކަޑަމީގެ ކުޅުންތެރިންނަށް އިތުރު ތަޖުރިބާ ހޯދައި ދިނުމުގެ ގޮތުން ރާއްޖެއިން ބޭރުގެ އެކި މުބާރާތްތަކުގައި ވާދަކުރަމުން އަންނައިރު, ބެލެނެވެރިންގެ ފަރާތުން ލިބެމުންދާ އެހީތެރިކަން ފާހަގަކޮށް އަބޯ ކޯޗު ވަނީ އެފަރާތްތަކަށް ޝުކުރު އަދާކޮށްފައެވެ.