ފުވައްމުލަކު ގެއެއްގައި ރޭ ހިނގި އަލިފާނުގެ ހާދިސާއެއްގައި އެ ގެއަށް ބޮޑެތި ގެއްލުންތަކެއް ލިބިއްޖެއެވެ.

މިކަމާ ގުޅޭގޮތުން އެމްއެންޑީއެފުން ބުނީ ފުވައްމުލަކު ސިޓީ "ޝިވާ" ގޭގައި އަލިފާން ރޯވެގެން އުޅޭކަމުގެ މައުލޫމާތު ލިބިފައިވަނީ 22:05 ހާއިރުކަމަށެވެ. އެ މައުލޫމާތު ލިބުމާއެކު ފަޔަރޓީމުން އެ ގޭދޮށަށްގޮސް އާއްމުންނާއެކު ކުރި މަސައްކަތުން ގޭގައި ރޯވެފައިވާ އަލިފާންގަނޑު ނިއްވާލެވުނީ 22:40 ހާއިރުކަމަށް އެމްއެންޑިއެފުން ބުންޏެވެ. 

އެމްއެންޑީއެފުން ބުނީ، މި ހާދިސާގައި އަލިފާން ރޯވެފައިވަނީ އެ ގޭގެ ކޮޓަރިއެއްގެ ތެރޭގައި ހުރި ބަންކު ބެޑެއްގެ މަތީގައި އަޅާފައި އޮތް ގޮނދަޑިއެއްގައި ކަމަށެވެ. ހާދިސާ ހިނގި ވަގުތު އެ ކޮޓަރީ ތެރޭ ކުޑަ ދެ ކުދީން ތިބި ނަމަވެސް، އަލިފާނުގެ ސަބަބުން އެއްވެސް އަނިޔާއެއް އެކުދީންނަށް ލިބިފައި ނުވާކަމަށް މައުލޫމާތު ލިބެއެވެ. ގޮދަޑީގައި އަލިފާން ރޯވީ ކީއްވެގެންކަމެއް އަދި ނޭނގެއެވެ.

ވޮއިސްއަށް މައުލޫމާތު ހިއްސާކުރަމުން އަލިފާން ނިއްވުމުގައި ހަރަކާތްތެރިވި އެރަށު މީހަކު ބުނީ، ގޭގައި މީހުން ދިރިނޫޅެވޭވަރަށް ގެއްލުން ލިބިފައިވާކަމަށެވެ. އަދި ގޭގައި ހުރި، މުހިއްމު އެއްޗެހި ވަނީ ބޭނުން ނުކުރެވޭވަރަށް އަލިފާނުގެ އަސަރުކޮށްފައެވެ.

މައުލޫމާތު ލިބިފައިވާ ގޮތުގައި އެ ގޭގައި 7 މީހަކު ދިރިއުޅެމުން ދެއެވެ.