މިއަދަށް ކުރާނެ މަސައްކަތެއް ނެތިގެން މަޖިލީހުގެ މިއަދުގެ ޖަލްސާ އެހެން ދުވަހަކަށް ތާވަލްކޮށްފިއެވެ.

ރައްޔިތުންގެ މަޖިލީހުގެ އާއްމު އުސޫލަށް ބަލާއިރު، ހަފްތާގެ ދުވަސްތަކަށް ބަލާއިރު ބުދަ ދުވަހަކީ މަޖިލީހުގެ ޖަލްސާ އޮންނަ ދުވަހެކެވެ. އަދި އެހެން ދުވަސްތަކެކޭ އެއްފަދައިން ހެނދުނު 09:00 ޖަހާއިރު ޖަލްސާ ފަށައެވެ. އާއްމު ގޮތެއްގައި މަޖިލީހުގެ ޖަލްސާއެއް ނޯންނަނީ ބްރާސްފަތިދުވަހުއެވެ.

މިކަމާ ގުޅޭގޮތުން ވޮއިސްއަށް މައުލޫމާތު ހިއްސާކުރަމުން ރައްޔިތުން މަޖިލީހުގެ މީޑިއާ އޮފިސަރު ވިދާޅުވީ މަޖިލީހުގެ ޖަލްސާއެއް ދެން އޮންނާނީ އަންނަ ހަފްތާގެ ހޯމަދުވަހު ކަމަށެވެ. ނަމަވެސް މިއަދުގެ ޖަލްސާ ކެންސަލްކުރި ވަކި ސަބަބެއް ނުބުނެއެވެ. މަޖިލިސް އިއްޔެ ނިންމަވާލައްވަމުން ރިޔާސަތު އިއްޔެ ބެެހެއްޓެވި އަހުމަދު ނާޒިމް ވަނީ މިއަދު ޖަލްސާ އޮންނާނޭކަން އިއުލާނުކުރައްވާފައެވެ.

Advertisement

މަޖިލީހުގެ ދައުރު މިމަހުގެ ނިޔަލަށް ކުރިއަށްގެންދިއުމަށް ރިޔާށަތުން ހުށަހަޅުއްވައިގެން ވަނީ ދުވަސް ދަންމާލާފައެވެ. މިހާރު ނިންމާފައި އޮތްގޮތުން މަޖިލީހުގެ މިދައުރު މިހިނގާ ޑިސެމްބަރުމަހުގެ 15 ވަނަ ދުވަހުގެ ނިޔަލަށް ދެމިގެންދާނެއެވެ.