ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މާދަމާ (ހުކުރު ދުވަހު) ކުޑަކުދިންނަށް ޚާއްޞަ ކޮށްގެން މަޖާ ކުޅިވަރުތަކާއެކު ހަވީރެއް ބޭއްވުމަށް ހަމަޖެހިފައިވާ ކަމަށް އެ ކުންފުނިން މިއަދު ހާމަކޮށްފިއެވެ.

ސްޓެލްކޯގެ އެކްސްގައި ކުރި ޕޯސްޓެއްގައި ބުނެފައިވާ ގޮތުގައި މި ހަވީރަކީ ވޭތުވެދިޔަ 6 މަސްދުވަހު ސްޓެލްކޯ ބިޒްނަސް ސެންޓަރު އިމާރާތް ކުރުމުގެ މަސައްކަތުގައި ބުރަކޮށް މަސައްކަތްކުރި މުވައްޒަފުންގެ ހިތްވަރާއި ޖޯޝް އަދި މަސައްކަތުގެ ނަމޫނާ އަޚްލާޤު ފާހަގަކުރުމުގެ ގޮތުން ބާއްވާ ހަވީރެކެވެ.

މީގެ އިތުރުން މި ހަވީރަކީ އެ މުވައްޒަފުންގެ ހުނަރުވެރިކަން އެ މުވައްޒަފުންގެ ޢާއިލާތަކަށް ދައްކާލުމުގެ ފުރުޞަތެއްވެސް ކަމަށެވެ.

Advertisement

މި ހަވީރު ބޭއްވުމަށް ހަމަޖެހިފައިވަނީ 6 ޑިސެންބަރު 2024 ވާ ހުކުރު ދުވަހުގެ ހަވީރު 16:00 އިން 18:00 އަށް އަދި ރޭގަނޑު 20:00 އިން 21:30 އަށް ސްޓެލްކޯ ބިޒްނަސް ސެންޓަރު އިމާރާތުގައެވެ.

މި ހަވީރުގައި ބައިވެރިވުމުގެ ފުރުޞަތު ހުޅުވާލާފައިވަނީ ހަމައެކަނި ސްޓެލްކޯގެ މުވައްޒަފުންގެ ކުޑަކުދިންނަށް އެކަންޏެއް ނޫން ކަމަށާ، އެހެން ހުރިހާ ކުޑަކުދިންނަށްވެސް މި ހަވީރުގައި ބައިވެރިވެވޭނެ ކަމަށް އެ ކުންފުނިން ބުނެއެވެ. 

އެހެން ކަމުން، ސްޓެލްކޯއިން ވަނީ ހުރިހާ ފަރާތްތަކަށްވެސް މި ހަވީރުގައި ބައިވެރިވުމަށް ދައުވަތު އަރުވާފައެވެ.