ހުޅުމާލޭ ފޭސް 2 ގެ ހިތިގަސްމަގުގައި ބިދޭސީއަކަށް ވަޅިން ހަމަލާދީ، މާރާމާރީ ހިންގައި އޭނާގެ ފޯނު ފޭރިގަތް މައްސަލައިގައި މީހަކު ހައްޔަރުކޮށްފިއެވެ.
މި މައްސަލަ ފުލުހުންނަށް ރިޕޯޓުކޮށްފައިވަނީ 4 ޑިސެމްބަރުގައެވެ. އަނިޔާ ލިބުނު ބިދޭސީއަށް ވަނީ އެޗް16 ކްލިނިކުގައި ފަރުވާދިނުމަށްފަހު ދޫކޮށްލާފައިވާ ކަމަށް ފުލުހުން މައުލޫމާތު ދެއެވެ.
ފުލުހުން ބުނި ގޮތުގައި، މި މައްސަލައާ ގުޅިގެން، ސީސީޓީވީ ފުޓޭޖް ބަލައި ދެނެގަނެ، އިއްޔެގެ ވަގުތެއްގައި ވަނީ ޝައްކުކުރެވޭ މީހާ ހައްޔަރުކޮށްފައެވެ.
އެގޮތުން ހައްޔަރުކުރެވުނު ފަރާތަކީ ހއ. މާރަންދޫ / އުތުރުގެ، އިބްރާހިމް މުޙައްމަދު (40 އަހަރު) އެވެ.
މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް އިއްޔެ ހުޅުމާލޭ މެޖިސްޓްރޭޓް ކޯޓަށް ހާޒިރުކުރުމުން، ތަޙުޤީޤު މަރުޙަލާ ނިމެންދެން ބަންދުކުރުމަށް ވަނީ އަމުރުކޮށްފައެވެ.
ފުލުހުން މަޢުލޫމާތު ދެއްވާފައިވާ ގޮތުގައި، މި މައްސަލައާ ގުޅިގެން އިތުރު މީހަކު ހޯދުމުގެ މަސައްކަތް ފުލުހުން ދަނީ ކުރަމުންނެވެ. އަދި މި މައްސަލަ ފުލުހުން ދަނީ ތަޙުޤީޤު ކުރަމުންނެވެ.
Advertisement
This content is created and paid for by advertisers and does not involve Voice Journalists
