ދިވެހިރާއްޖެއަށް ދަތުރުކުރުމުގެ އިންޒާރުގެ ލެވެލް މަތިކޮށް، ކޮންމެހެން ކުރަންޖެހޭ ދަތުރެއް ނޫނީ ރާއްޖެއަށް ދަތުރު ނުކުރުމަށް އިސްރާއީލުގެ ނެޝަނަލް ސެކިއުރިޓީ ކައުންސިލުން އިއްޔެ އަންގައިފިއެވެ.

އިސްރާއީލުގެ ނެޝަނަލް ސެކިއުރިޓީ ކައުންސިލުން ބުނީ، ސަލާމަތީ ހާލަތު އަލުން ވަޒަންކުރުމަށްފަހު، ތިން ގައުމަކަށް ދަތުރުކުރުމުގެ އިންޒާރު ބަދަލުކޮށްފައިވާ ކަމަށެވެ. މިގޮތުން ދިވެހިރާއްޖެއާއި އާމީނިއާއަށް ދަތުރުކުރުމުގެ އިންޒާރުގެ ލެވެލް މަތިކޮށް، ބްރެޒިލްއަށް ދަތުރުކުރުމުގެ އިންޒާރުގެ ލެވެލް ދަށްކޮށްފައިވެއެވެ.

ދިވެހިރާއްޖެއަށް ދަތުރުކުރުމުގެ އިންޒާރުގެ ލެވެލް 2 އިން 3 އަށް މަތިކޮށްފައިވަނީ "ރަށްތަކުގައި ޓެރަރިސްޓުންނަށް ތާއީދުކުރާ ފަރާތްތައް ތިބުމާއި، އިސްރާއީލީންނާއި ޔަހޫދީންނާ ދެކޮޅަށް އަދާވާތްތެރިކަން އިތުރުވަމުން އަންނާތީ" ކަމުގެ ތުހުމަތު ކޮށްފައެވެ.

Advertisement

ލެވެލް 3 ގެ އިންޒާރެއްގެ ދަށުން، ކޮންމެހެން ކުރަންޖެހޭ ދަތުރެއް ނޫނީ އެ ތަނަކަށް ދަތުރު ނުކުރުމަށް އިސްރާއީލީންނަށް އިރުޝާދު ދެއެވެ.

މީގެ އިތުރުން، އާމީނިއާއަށް ދަތުރުކުރުމުގެ އިންޒާރުގެ ލެވެލް 1 އިން 2 އަށް މަތިކޮށްފައިވަނީ "އާމީނިއާގައި ޓެރަރިސްޓު ޖަމާއަތްތަކުން އިސްރާއީލީންނާއި ޔަހޫދީންނަށް ކުރިމަތިވެދާނެ ނުރައްކަލުގެ ބިރު އިތުރުވެފައިވާތީ" ކަމަށް ތުހުމަތު ކޮށްފައެވެ.

ލެވެލް 2 ގެ އިންޒާރެއްގެ ދަށުން، ދަތުރުވެރިން "އިތުރު ރައްކާތެރިކަމުގެ ފިޔަވަޅުތައް އެޅުމަށް" އިރުޝާދު ދެއެވެ. ނަމަވެސް މިއީ އެ ގައުމަކަށް ދަތުރު ނުކުރުމަށް ނުވަތަ އެ ގައުމުން ފުރައިގެން ދިއުމަށް ގޮވާލުމެއް ނޫނެވެ.

މި ބަދަލުތައް ގެނެސްފައިވަނީ އިސްރާއީލުގެ ސަލާމަތާ ބެހޭ ކައުންސިލުން އަލުން ސަލާމަތީ ހާލަތު ވަޒަންކުރުމަށްފަހުގައެވެ.

ޓެރަރިސްޓް އިޒްރޭލުން މިގޮތަށް އެންގިއިރު، ޣައްޒާގައި އިސްރާއީލުގެ ނިރުބަވެރިން ހިންގަމުންދާ ޖަރީމާތަކާ ދެކޮޅަށް އަޑުއުފުލައި، އިސްރާއިލް ބޯއިކޮޓް ކުރުމަށް ދިވެހީން މީސް މީޑިއާގައި ގޮވާ އަޑު އަންނަނީ ގަދަވަމުންނެވެ.