ރާއްޖޭގެ ސަރަހައްދަށް އެއްވެސް ބަދަލެއް ގެނައުމުގެ ބާރު އޮންނަންވާނީ ސީދާ ރައްޔިތުންގެ އަތުގައި ކަމަށާއި އެ ބާރު ރައްޔިތުންގެ މަޖިލީހަށް އޮވެގެން ނުވާނެ ކަމަށް ކުރީގެ ރައީސް އަބްދުالله ޔާމީން އަބްދުލްގައްޔޫމް ވިދާޅުވެއްޖެ އެވެ.
ރާއްޖޭގެ ސަރަޙައްދަށް ބަދަލެއް ގެންނަ ނަމަ މީގެ ކުރިން އޮންނަނީ، ރައްޔިތުންގެ މަޖިލީހުގެ ތިންބައިކުޅަ ދެބައިގެ އަޣްލަބިއްޔަތުން ފާސްވުން ކަމަށެވެ. ނަމަވެސް މިދިޔަ ނޮވެމްބަރު މަހުގެ 20 ވަނަ ދުވަހު ގާނޫނު އަސާސީއަށް ގެނައި އިޞްލާޙާއެކު އެކަން އިތުރަށް ވަރުގަދަވެ، ރައްޔިތުންގެ މަޖިލީހުގެ ހަތަރުބައިކުޅަ ތިންބައިގެ ތަނަވަސް އަޣްލަބިއްޔަތަކުން ފާސްކުރަން ޖެހޭގޮތަށް ވަނީ ކަނޑައަޅާފައެވެ.
މި އިޞްލާޙާއެކު ރާއްޖޭގެ ކަނޑުގެ ސަރަޙައްދު އެކްސްކުލޫސިވް އިކޮނޮމިކް ޒޯން (އީ.އީ.ޒެޑް) އާ ހަމައަށް ކަނޑައެޅިގެން ގޮސްފައިވާއިރު، އެގޮތަށް ކަނޑައަޅާ ސަރަޙައްދަކަށް ބަދަލު ގެނެވޭނީވެސް ރައްޔިތުންގެ މަޖިލީހުގެ ހަތަރުބައިކުޅަ ތިންބައިގެ ވޯޓު ލިބި، އޭގެ އިތުރަށް ރައްޔިތުންގެ ފެންނަ ނުފެންނަ ވޯޓެއްވެސް ނަގައިގެން ކަަމަށް ވަނީ ބުނެފައެވެ.
ގާނޫނު އަސާސީއަށް މި ގެނެވުނު އިސްލާޙާއި ގުޅިގެން، ޕީއެންއެފުން ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ރާއްޖޭން ސަރަހައްދުން ބައެއް ދޫކޮށްލުމަކީ ރައްޔިތުންގެ މަޖިލީހުން ގޮތް ނިންމަން ދޫކޮށްލާފައި އޮންނަ ކަމެއް ނޫންކަމަށެވެ.
އަދި ރައްޔިތުންގެ މަޖިލީހުގެ މެންބަރުންގެ ޒިންމާއަކީ ދާއިރާގެ ރައުޔު ހޯދައިގެން ބަދަލުތައް ގެނައުން ކަމަށާ، ރައްޔިތުންގެ ބަހެއް ހޯދައިގެން މެނުވީ ރާއްޖޭގެ ސަރަހައްދުން އެންމެ އިންޗިއެއް ވެސް ދޫކޮށްނުލެވޭނެ ކަމަށެވެ.
އެއް ކަމަކަށް މި ވިދާޅުވަނީ ދިވެހިރާއްޖޭގެ ސަރަހައްދުން އިންޗިއެއް ވެސް ބަދަލެއް ނުގެނެވޭނެއޭ މަޖިލީހުގެ ރުހުން ނެތި... އެއީ އަޅުގަނޑުމެން މަޖިލީހަށް ދޫކޮށްލާ ކަމެއް ނޫނޭ. އެއީ، މަޖިލިސް މަންދޫބުންގެ ކަމެއް ނޫނޭ… ގާނޫނު އަސާސީގައި މި އޮންނަނީ ގައުމުގެ ސަރަހައްދު ޑިފައިންކޮށްފައި، އެއަށް ބަދަލެއް ގެންނަންޏާ ދާން ޖެހޭނީ ރައްޔިތުންގެ ވޯޓަކަށް.." ޔާމީން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
