ރޭ ހުޅުމާލެ ފަޅިން ބްރިޖަށް އަރާ ހަލިމަގު (ހައިވޭ) ބަންދުކޮށް, އިހުތިޖާޖު ކުރުމުގެ ސަބަބުން ހައްޔަރުކުރެވުނު ޓެކްސީ ޑްރައިވަރުން ދޫކޮށްލުމަށް އެމްޑީޕީގެ ޗެއާޕާސަން ފައްޔާޒު އިސްމާޢީލް ގޮވާލައްވައިފިއެވެ.

ސަރުކާރުން ޓެކްސީގެ ޚިދުމަތް ފަށާތީ، ރޭ ޓެކްސީ ޑްރައިވަރުން ކުރި އިހުތިޖާޖުގެ ތެރެއިން، ހުޅުމާލެ ފަޅިން ބްރިޖަށް އަރާ ހަލިމަގު (ހައިވޭ) ބަންދުކޮށް، އާންމު ދަތުރުފަތުރަށް ދަތިވާގޮތަށް ޢަމަލުތަކެއް ހިންގާފައިވެއެވެ.

އެގޮތުން، އެ ސަރަހައްދު ހަތަރުފުރޮޅުލީ އުޅަނދުތަކަށް ބަންދުކޮށް، ޓެކްސީތައް ބޭނުންކޮށްގެން މަގު ބަންދުކޮށް މުޒާހަރާ ކުރިއަށް ގެންގޮސްފައިވެއެވެ. މި ސަބަބާހުރެ އެ މަގުން ދަތުރުކުރެވެނީ ހަމައެކަނި ސައިކަލުތަކަށެވެ.

Advertisement

މި ހާދިސާއާ ގުޅިގެން ފުލުހުން ވަނީ ބައެއް ޓެކްސީތައް ޓޯ ކޮށް، ޑްރައިވަރުންތަކެއް ހައްޔަރުކޮށްފައެވެ.

މިކަމާ ގުޅޭގޮތުން އެމްޑީޕީގެ ޗެއާޕާސަން ފައްޔާޒު އިސްމާޢީލް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ސަރުކާރުން ޓެކްސީ ލައިނެއް ފެށުމާ މެދު ހިތްހަމަނުޖެހުން ފާޅުކުރުމަށް އިހުތިޖާޖު ކުރި ޓެކްސީ ޑްރައިވަރުންތަކެއް ހައްޔަރުކޮށް ކާރުތައް ޓޯ ކުރުމަކީ ކަންބޮޑުވާ ކަމެއް ކަމަށެވެ.

ފައްޔާޒު އިތުރަށް ވިދާޅުވެފައިވަނީ އިހުތިޖާޖު ކުރުމަށްޓަކައި ހަޅުތާލު ކުރުމަކީ ކޮންމެ މީހަކަށް ޤާނޫނުއަސާސީން ކަށަވަރު ކޮށްދޭ ޙައްޤެއް ކަމަށެވެ. އަދި ހަޅުތާލުކޮށްގެން ހައްޔަރުކުރި ހުރިހާ ޓެކްސީ ޑްރައިވަރުން ދޫކޮށްލައި، ޓޯކުރި ވެހިކަލްތައް ވެރިފަރާތްތަކާ ހަވާލުކުރުމަށް ގޮވާލައްވާފައިވެއެވެ.