ކީރިތި ޤުރުޢާނާ ރަސޫލާ ޞޢޥ ގެ ސުންނަތާ އަހަރެމެން ދުރުވި މިންވަރަކުން އަހަރެމެންގެ ބާއްޖަވެރިކަން ގެއްލޭނެ ކަމުގައި މިއަދުގެ ހުކުރު ޚުތުބާގައި ބުނެފިއެވެ. 

ކީރިތި ޤުރްއާނާމެދު އުފައްދާ ޝުބުހަތަކުގެ މައްޗަށް އަލިއަޅުވާލައި މިއަދު އިއްވި ހުކުރު ޚުތުބާގައި ބުނީ، ޤުރުޢާނަކަކީ މާތް اللهގެ ކަލާމްފުޅު ކަމަށެވެ.

މިއާއެކު ޚުތުބާގައި ބުނީ، އެ ފޮތް އަހަރެމެންނާ ހަމައަށް އައިސްފައި ވަނީ ކަލިމަތަކާއި އަކުރުތައް، ރިވާވެފައިވާ ގޮތަށާއި، އަކުރު އަދާކުރުމުގައި ލުއިކުރުމާއި ބަރުކުރުމަށް، އެއްވެސް ބަދަލެއް ނައިސް، ސަނަދު ގުޅިގެންނެވެ. އަދި ކީރިތި ރަސޫލާ ޞޢވގެ ޒަމާނުން ފެށިގެން، މި އަދާ ހަމައަށް، ކީރިތި ޤުރްއާން އަހަރެމެންނާ ހަމައަށް އައިސްފައިވަނީ، ދޮގުކުރުން މުސްތަޙީލުވާ ހައި ގިނަ ޢަދަދެއްގެ ރާވީން ސަނަދުގައި ހިމެނިގެން މުތަވާތިރުކޮށް ކަމަށް ވުމުން، އެ ފޮތް އަހަރެމެންނާ ހަމައަށް އައިސްފައި ވަނީ ބާވައިލެއްވި ގޮތަށްކަން ކަށަވަރުވާ ކަމަށެވެ.

ޚުތުބާގައި އިތުރަށް ބުނީ، ކީރިތި ޤުރްއާނަކީ، اللهގެ ކަލާމްފުޅުކަމާއި، އަދި އެ ފޮތް އަހަރެންނާ ހަމައަށް އައިސްފައިވާ ގޮތާއި، އަދި އެ ފޮތުގައި ކުށެއް ނެތްކަމާ މެދު ޝައްކެއް ނެތަސް، މި ކަންކަމުގައި ޝައްކުތަކާއި ޝުބުހަތައް އުފައްދަން ބަޔަކު މަސައްކަތްކުރާ ކަމަށެވެ. އެކަމަށް މުސްލިމުން ފިސާރި ހުޝިޔާރުވެ ހޭލައި ތިބެން ޖެހޭ ކަމަށްވެސް ބުންޏެވެ.

މިއާއެކު ޚުތުބާގައި ބުނީ، ކީރިތި ޤުރްއާނާ މެދު ޝައްކު އުފައްދާން އެންމެ ފުރަތަމަ ކުރި މަސައްކަތަކީ، އެއީ اللهގެ ކަލާމްފުޅު ނޫންކަމަށް ހަދާން ކުރި ނާކާމިޔާބު މަސައްކަތް ކަމަށާ އެ ކަމަށް ޓަކައި، އެ މީހުން ހަދައިގެން ތަފާތު ވާހަކަ ދެއްކި ކަމަށެވެ. އޭގެ ތެރެއިން އެއް ވާހަކައަކީ، ކީރިތި ޤުރްއާނަކީ ހުވަފެނުގެ ހާސަރުތަކެކޭ ނުވަތަ އެއީ މުޙައްމަދުގެފާނު އަމިއްލަފުޅަށް ހެއްދެވި އެއްޗެކޭ ބުނުން ކަމަށެވެ. ނުވަތަ އެ ކަލޭގެފާނަކީ ޅެންވެރިއެކޭ ބުނުން ކަމަށެވެ.

ޚުތުބާގައި ވަނީ ކީރިތި ޤުރްއާނަކީ މާތް ﷲގެ ކަލާމްފުޅުކަން ކަށަވަރުވާ ޢިލްމީ ހެކިތަކުގެ މައްޗަށްވެސް އަލިއަޅުވާލާފައެވެ. އެގޮތުން، މައިމީހާގެ ބަނޑުގައި ދަރިފުޅު ގަރުބަގަތީއްސުރެ، ފުރިހަމަ އިންސާނަކަށް ވުމާ ހަމައަށް އަންނަ ބަދަލުތަކުގެ ވާހަކަ ކީރިތި ޤުރްއާނުގައި ތަފުޞީލުކޮށް ބަޔާންކުރައްވައިފައިވާ ކަން ޚުތުބާގައި ފާހަގަކޮށއފައިވެއެވެ.

ޚުތުބާގައި އިތުރަށް ބުނީ، އިސްލާމް ދީނުގެ ޢަދާވާތްތެރިން އަބަދާއި އަބަދު އަންނަނީ اللهގެ ނޫރުފުޅު ނިއްވައިލުމަށް މަސައްކަތް ކުރަމުން ކަމަށެވެ. އެހެންނަމަވެސް، ކާފިރުން ކިތަންމެ ބޭނުންވިޔަސް އެ ގޮތަށް އެ ކަން ނުވާނޭކަން، ކީރިތި ޤުރްއާނުގައި އަންގަވައިފައިވާ ކަމަށް ޚުތުބާގައި ބުނެފައިވެއެވެ.

ކީރިތި ރަސޫލާ ޞޢވ ޙަދީޘްކުރައްވައިފައި ވެއެވެ. (تَرَكْتُ فِيْكُمْ أَمْرَيْنَ لَنْ تَضِلُّوْ مَا تَـمَسَّكْتُمْ بِـهِمَا : كِتَابَ اللهِ وَسُنَّةَ نَبِيِّهِ z) މާނައީ: "ތިމަންކަލޭގެފާނު ތިޔަބައިމީހުންގެ ތެރެއަށް ދެއެއްޗެއް ދޫކުރައްވައި ވަޑައިގަންނަވަމެވެ. އޭގައި ހިފައިފި ހިނދަކު ހަމަހިލާ ތިޔަބައިމީހުން މަގުފުރެދިގެން ނުދާނެތެވެ. އެއީ، اللهُ سُبْحَانَهُ وَتَعَالَىގެ ފޮތާއި އެކަލާނގެ ނަބިއްޔާ ސޢވގެ ސުންނަތެވެ."

ޚުތުބާގައި ބުނީ، ކީރިތި ޤުރުޢާނާ ރަސޫލާ ސޢވގެ ސުންނަތާ އަހަރެމެން ދުރުވި މިންވަރަކުން އަހަރެމެންގެ ބާއްޖަވެރިކަން ގެއްލޭނެ ކަމަށެވެ. އަދި އިސްލާމް ދީން ދޫކޮށް، ކާފިރުކަންމަތީ މަރުގަންނަވާ މީހުން، އެމީހުން ކުރި ހުރިހައި ޢަމަލެއް ބޭކާރުވެގެންދާ ކަމަށާ، އޭރުން އެމީހުން ދާއިމަށް ތިބޭން ޖެހޭނެ ތަނަކީ ނަރަކަ ކަމަށެވެ.