ވިސާނެތި ތ.އަތޮޅު ވޭމަންޑޫގައި ދިރިއުޅެމުން އަންނަ ފަރަންސޭސިވިލާތަށް ނިސްބަތްވާ އާއިލާ ފޮނުވާލުމަށް ސަރުކާރުން ނިންމައިފިއެވެ.

ފަރަންސޭސިވިލާތަށް ނިސްބަތްވާ އާއިލާއެއް ވިސާނެތި ރާއްޖޭގައި ދިރިއުޅެމުންދާ މައްސަލައެއް ފެންމަތިވެފައިވާއިރު، ވިސާނެތި އެމީހުން ރާއްޖޭގައި އުޅެމުންދާތާ އެތައް އަހަރެއް ވެފައިވާކަމަށް މައުލޫމާތު ލިބެއެވެ. އެންމެފަހުން އެމީހުންގެ މައްސަލަ މީޑިއާގައި ދައުރުވަމުން ދަނިކޮށް އިމިގްރޭޝަންގެ ކޮންޓްރޯލާ ޖެނެރަލް ޝައްމާން މުހައްމަދު އެކްސްގައި ކުރެއްވި ޕޯސްޓެއްގައި ވިދާޅުވީ، ޓްރެވަލް ޑޮކިއުމަންޓް ލިބުނުހާ އަވަހަކަށް އެމީހުން ފޮނުވާލުމުގެ މަސައްކަތް ކުރަމުންދާކަމަށެވެ.

ޝައްމާން ވިދާޅުވީ، އިމިގްރޭޝަންގެ ޤާނޫނާ ޚިލާފަށް ފްރާންސަށް ނިސްބަތްވާ ޢާއިލާއެއް ރާއްޖޭގައި ދިރިއުޅެމުންދާ ކަމުގެ މައުލޫމާތު 'އިމިގްރޭޝަން ވޮޗް' އަށް މިއަހަރުގެ ޖުލައިމަހުގެ 18 ވަނަ ދުވަހު ލިބިފައިވާކަމަށެވެ. އެ މައްސަލަ އިމިގްރޭޝަނުން  ބެލުމަށްފަހު، އޮކްޓޯބަރުމަހުގެ 23 ވަނަ ދުވަހު އެ މައްސަލާގައި ހިމެނޭ އިސްފަރާތް އެ އިދާރާއަށް ވަނީ ހާޒިރު ކުރެވިފައިވާކަމަށް ޝައްމާން ވިދާޅުވިއެވެ. އެ ފަރާތްތަކުގެ ޕާސްޕޯޓުގެ މުއްދަތު ހަމަވެފައިވާތީ، އެ ޢާއިލާ ރާއްޖެއިން ފުރުވާލުމަށް ބޭނުންވާ ޓްރެވަލް ޑޮކިއުމަންޓު ހޯދުމުގެ މަސައްކަތް ދިވެހި ހާރިޖިއްޔާ އާ ގުޅިގެން އިމިގްރޭޝަނުން ކުރަމުންދާ ކަމަށެވެ.

ވޮއިސްއާ މައުލޫމާތު ހިއްސާކުރި ވޭމަންޑޫ ރައްޔިތަކު ބުނީ، އެމީހުން އެރަށުގައި ދިރިއުޅެމުން އަންނަތާ 4 އަހަރުވެދާނެ ކަމަށާއި، އެމީހުން އުޅެނީ މަސްވެރިކަންކޮށްގެން ލިބޭ އާމްދަނީން ކަމަށެވެ. ވޭމަންޑޫގެ ކުރިން އެމީހުން ދިރިއުޅުނީ އެހެން ރަށެއްގައެވެ. ވޭމަންޑޫއިން ވާހަކަ ދެއްކި މީހާ ބުނީ، އެމީހުންގެ ފަރާތުން އުނދަގޫވާ ޒާތުގެ ކަންކަން ފެންނަކަން ފާހަގަނުކުރެވޭ ކަމަށެވެ.

ބައެއް ނޫސްތަކުން ބުނެފައިވަނީ، އެމީހުން ފްރާންސަށް ދާން އަނބުރާ ބޭނުންނުވަނީ އެމީހުން ފްރާންސަށް ގޮސްފިނަމަ، ފުރާނައަށް ނުރައްކާވެދާނެތީ ކަމަށެވެ. ފަރަންސޭސިވިލާތަށް ނިސްބަތްވާ އެ ދެމަފިރިންގެ 5 ކުދިން ތިބެއެވެ. މައުލޫމާތު ލިބޭ ގޮތުގައި އެ އެންމެންނަކީވެސް މުސްލިމުންނެވެ.