މާލޭ ސިޓީގައި މިހާރު ކުރިއަށްދާ ގޯލްޑްކަޕްގެ ދެވަނަ ބުރުގައި ގުރޫޕް އެޗުގެ މާލޭ ސިޓީ އާއި ރ.އަލިފުށި ވާދަކުރި މެޗު ފަހަތަުން އަރައި 3-1 ގެ ނަތީޖާއަކުން ކާމިޔާބުކޮށް އަލިފުށިން ގުރޫޕްގެ އެއްވަނަ ކަށަވަރުކޮށްފިއެވެ.

މިމެޗު ފުރަތަމަ ކުޅުމަށް ތާވަލުކުރެވިފައި އޮތީ އިއްޔެ ހަވީރުއެވެ. ނަމަވެސް މިއަދަށް މެޗު ފަސް ކުރަންޖެހުނީ މާލެ ޓީމުން ގަވައިދާ ހިލާފަށް ކުޅުންތެރިން ރަޖިސްޓަރީ ކުރި ކަމަށް ކުރެވުނު ތުހުމަތަކާއި ގުޅިގެންނެވެ. އަދި އެމައްސަ ބެލުމަށްފަހު މުބާރާތް އިންތިޒާމުކުރާ ފަރާތުން ނިންމީ ކުޅުންތެރިން ރަޖިސްޓްކޮށްފައިވަނީ ޤަވާއިދާ އެއްގޮތަށް ކަމަށެވެ. .

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މިމެޗުގައި ފުރަތަމަ ލަނޑުޖަހައި ކުރިހޯދީ މާލޭ ސިޓީ އިންނެވެ. މިލަނޑު މެޗު ފެށިގެން ދެވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން އަލީ ޝަރީފް އެވެ.

Advertisement

މިއީ އެޓީމަށް ލިބުނު ކޯނަރެއްގައި ރިޟްވާން ގޯލުކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އަލިފުށިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 41 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން މުހައްމަދު ރަޝީދު އެވެ.

މިއީ މާލޭ ސިޓީގެ ޕެނަލްޓީ އޭރިއާ ބޭރުން ލިބުނު ހިލޭޖެހުމެއްގައި ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކުރި ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ،1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފު ފަށައިގެން ގިނައިރުތަކެއް ނުވަނީސް މާލެ ސިޓީގެ ހުސެއިން ފަޔާޒަށް ވަނީ ދެވަނަ ރީނދޫ ކާޑާއިއެކު ރަތް ކާޑެއް ދައްކާ ދަނޑުން ފޮނުވާލާފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުންތެރިއަކު މަދުކޮށެވެ.

މާލޭ ސިޓީގެ އެއްކުޅުންތެރިއަކު މަދުވުމުގެ ފައިދާނަގައި އަލިފުށިން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު ދެލަނޑު ކާމިޔާބުކޮށްފައެވެ. އެގޮތުން މިމެޗުގައި ފުރަތަމަ ފަހަރަށް އެޓީމުން ލީޑުހޯދި ލަނޑު ދެވަނަ ހާފު ފެށިގެން ހަވަނަ މިނެޓުގައި ނިހާން ކާމިޔާބުކުރިއިރު، އެޓީމުން ލީޑު ފުޅާކުރި ލަނޑު އޭގެ ދެމިނެޓް ފަހުން ކާމިޔާބުކޮށްދިނީ އެޓީމުގެ ހުޝާމް އެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 3-1 ގެ ނަތީޖާއަކުން އަލިފުށި ކުރީގައި އޮވެގެންނެވެ.

މިނަތީޖާއެކު ގުރޫޕްގެ އެއްވަނަ ހޯދި އަލިފުށި ކުއާޓާ ފައިނަލް ތިންވަނަ މެޗުގައި މިހަފްތާގެ ބުރާސްފަތި ދުވަހު ހަވީރު 15:50 ގައި ނުކުންނާނީ ފުވައްމުލައް ސިޓީއާއި ދެކޮޅަށެވެ. އަދި މިމެޗުން ބަލި މާލެ ސިޓީ އިން ގުރޫޕްގެ ދެވަނަ ޓީމުގެ ގޮތުގައި ކުއާޓާ ފައިނަލް ޔަގީކޮށްފައިވާއިރު، ބުދަ ދުވަހުގެ ރޭ 21:00 ގައި ކުޅޭ ކުއާޓާ ފައިނަލްގެ ދެވަނަ މެޗުގައި އެޓީމުން ނުކުންނާނީ ކ.ގުރައިދޫއާއި ދެކޮޅަށެވެ.