ފެޑަރޭޝަންސް އޮފް ބްރެޒިލް ފުޓްބޯޅައިގެ ރައީސް ކަމުގެ މަޤާމަށް ކުރިއަށް އޮތް ދައުރުގައި ވާދަކުރާނެކަމަށް އެގައުމުގެ ތާރީޚްގައި އުފެދުނު އެންމެ މޮޅު އެއްކުޅުންތެރިއާ ރޮނާލްޑޯ ނަޒާރިއޯ އިއުލާންކޮށްފިއެވެ.

ބްރެޒިލްގެ އިތުރުން ދުނިޔޭގެ ފުޓްބޯޅައިގެ ތާރީޚުގައި ވެސް ފެނިގެން ގޮސްފައިވާ އެންމެ ހުނަރުވެރި އެއްކުޅުންތެރިޔާ ރޮނާލްޑޯ ވަނީ 1994 ވަނަ އަހަރާއި 2002 ވަނަ އަހަރުގެ ވޯލްޑްކަޕް ތަށި ކާމިޔާބު ކުރުމުގެ އިތުރުން 1998 ވަނަ އަހަރު ބްރެޒިލް ވޯލްޑްކަޕް ފައިނަލަށް ގެންގޮސްދިނުމުގައި މުހިންމު ދައުރެއް އަދާކޮށްދީފައެވެ.

މީގެ އިތުރުން ރޮނާލްޑޯ ވަނީ ބްރެޒިލް ގައުމީ ޓީމާއެކު 1999 އަދި 1997 ވަނަ އަހަރު ކޮޕާ އެމެރިކާގެ އިތުރުން 1997 ވަނަ އަހަރުގެ ފީފާ ކޮންޕެޑަރޭޝަން ކަޕް ކާމިޔާބު ކުރުމުގެ އިތުރުން ގައުމީ ޓީމަށް ކުޅުނު 98 މެޗުގައި 62 ލަނޑު ކާމިޔާބުކޮށްފައެވެ. 

ކުލަބު ފުޓްބޯޅައިގައި ނެދަލޭންޑްސްގެ ޕީއެސްވީ އިން ވިދާލުމަށްފަހު، އިޓަލީގެ އިންޓަ މިލާން، އޭސީ މިލާންގެ އިތުރުން ސްޕެއިންގެ ރެއާލް މެޑްރިޑް އަދި ބާސެލޯނާގައި މޮޅު ކުޅުމެއް ދެއްކި މިހާރު އުމުރުން 48 އަހަރުގެ ރޮނާލްޑޯގެ އަމާޒަކީ 2025 ވަނަ އަހަރުގެ މާޗު މަހު އޮންނަ އިންތިހާބު ކާމިބުކޮށް ބުރެޒިލްގެ ފުޓްބޯޅަ ކުރިން އޮތް މަގާމަށް ގެންދިއުމެވެ.

އެގޮތުން އިންތިހާބު ކާމިޔާބުކުރެވިއްޖެނަމަ ރޮނާލްޑޯގެ އެންމެ ބޮޑު ޓާގެޓަކީ މިހާރު މެންޗެސްޓާ ސިޓީގެ ކޯޗުގެ މަގާމުގައި ހުރި ޕެޕް ގާޑިއޯލާ ބްރެޒިލްގެ ކޯޗުކަމުގެ މަގާމަށް ގެނައުމެވެ.

ފީފާ ވޯލްޑްކަޕްގެ ހުރިހާ މުބާރާތެއްގައި ވާދަކުރި ހަމައެކަނި ގައުމުގެ އިތުރުން ވޯލްޑްކަޕްގެ އެންމެ ކާމިޔާބު ގައުމަކީ ވެސް ބްރެޒިލްއެވެ. އެ ގައުމުން ވަނީ 1958، 1962، 1970، 1994 އަދި 2002 ވަނަ އަހަރު ބޭއްވުނު ވޯލްޑްކަޕް ފުޓްބޯޅަ މުބާރާތުގެ ޗެންޕިއަންކަން ހޯދާފަ އެވެ.

ނަމަވެސް ފަހަކަށް އައިސް ބްރެޒިލް އިން ނެރެމުންދާ ދަށް ނަތީޖާތަޖާއެކު ދެކޮނު އެމެރިކާ ސަރަހައްދު ވޯލްޑްކަޕް ކޮލިފައިންގައި އެޓީމު މިވަގުތު އޮތީ ލީގު ތާވަލުގެ ފަސްވަނައިގައެވެ. އަދި ބްރެޒިލް އެންމެ ފަހުން ކުޅުނު 10 މެޗުގެ ތެރެއިން ދެމެޗުން ބަލިވެ ހަތަރު މެޗުން އެއްވަރުވެފައިވާއިރު، މޮޅުވެފައި ވަނީ ހަތަރު މެޗުންނެވެ. މިއާއެކު ބްރެޒިލްގެ ފުޓްބޯޅަ ފެޑަރޭޝަނަށް ވަނީ ބޮޑެތި ފާޑުކިޔުންތަކެއް ވަނީ އަމާޒުވެފައެވެ.