ދުނިޔޭގެ ފުޓްބޯޅައިގެ މައި އިދާރާ ފީފާ އިން ހޮވާ އަހަރުގެ އެންމެ މޮޅު ފުޓްބޯޅަ ކުޅުންތެރިއާ "ފީފާ ދަ ބެސްޓް" އެވޯޑް 2024 އަހަރުގެ އެންމެ މޮޅު ފިރިހެން ފުޓްބޯ ކުޅުންތެރިޔާގެ މަޤާމު ރެއާލް މެޑްރިޑްގެ ބްރެޒިލް ފޯވާޑް ވިނީސިއަސް ޖޫނިއަރ ކާމިޔާބުކޮށްފިއެވެ.

އަންގާރަ ދުވަހުގެ ރޭ ބޭއްވުނު ފީފާ ދަ ބެސްޓް އެވޯޑް ހަފްލާގައި މިއަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔާގެ މަގާމަށް ވިނީސިއަސް އެންމެ ގާތުން ވާދަކޮށްފައިވަނީ މިއަހަރުގެ ބެލެންޑިއޯ އެވޯޑް ކާމިޔާބުކުރި މެންޗެސްޓާ ސިޓީގެ މިޑްފީލްޑަރު ރޮޑްރީއެވެ. އަދި ތިންވަނަ ހޯދީ ރެއާލް މެޑްރިޑްގެ އިގިރޭސި މިޑްފީލްޑަރު ޖޫޑް ބެލިންގްހަމް އެވެ.

ރެއާލް މެޑްރިޑާއެކު ދެފަހަރު ޗެންޕިއަންސް ލީގު ކާމިޔާބުކޮށްފައިވާ އުމުރުން 24 އަހަރުގެ ފޯވާޑް ވަނީ މިދިޔަ ސީޒަނުގައި ރެއާލް މެޑްރިޑާއެކު ސްޕެނިޝް ލަލީގާގެ އިތުރުން ޔުއެފާ ޗެންޕިއަންސް ލީގާއި ޔުއެފާ ސުޕަކަޕް އަދި ސްޕެނިޝް ސުޕަކަޕް ކާމިޔާބުކޮށްފައެވެ. އަދި ޗެންޕިއަންސް ލީގުގެ ސެމީފައިނަލުގައި ބަޔާން މިއުނިކާއި ދެކޮޅަށް ކުޅުނު ދެމެޗާއި ފައިނަލް މެޗުގެ މޮޅު ކުޅުންތެރިޔާގެ މަގާމުގެ އިތުރުން މިދިޔަ ސީޒަނުގެ ޗެންޕިއަންސް ލީގު މޮޅު ކުޅުންތެރިޔާގެ މަގާމު ހޯދީ ވެސް ވިނީސިއަސް އެވެ. އަދި މީގެ އިތުރުން ސްޕެނިޝް ސުޕަކަޕްގެ ފައިނަލުގައި ބާސެލޯނާ ކޮޅަށް ވިނީސިއަސް ހެދި ހެޓްރިކް ފާހަގަކޮށްލެވެއެވެ.

Advertisement

މީގެ އިތުރުން ވިނީސިއަސް ވެގެންގޮސްފައި ވަނީ ފީފާގެ މޮޅު ކުޅުންތެރިޔާގެ މަގާމު ހޯދި ބްރެޒިލްގެ ހަ ވަނަ ކުޅުންތެރިޔާއަށެވެ. އަދި ވިނީސިއަސްގެ ކުރިން ފީފާ މޮޅު ކުޅުންތެރިޔާގެ އެވޯޑް ހޯދާފައިވާ ބްރެޒިލްގެ ކުޅުންތެރިންނަކީ ރޮނާލްޑޯ، ރިވާލްޑޯ، ރޮމާރިއޯ، ކަކާ އަދި ރޮނާލްޑީނިއޯ އެވެ.