ޣައިރު ދީންތަކުގެ ޢީދުތައް ފާހަގަކުރުމާއި، އެކަމުގައި ބައިވެރިވެ، ތަހުނިޔާކިޔުމަކީ ޙަރާމް ކަމެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.

ޣައިރު ދީން ތަކުގެ ޝިޢާރު ފާޅުކުރުމާ ގުޅޭ ގޮތުން އަލިއަޅުވާލައި މިއަދު އިއްވި ހުކުރު ޚުތުބާގައި ބުނީ، އަހުރެމެންގެ އިސްލާމްވަންތަކަމާއި ދީނީ ޝަޚްޞިއްޔަތު ދެމެހެއްޓުމަކީ، އިސްލާމީ ޝަޢީރާގެ ތެރޭގައި ހިމެނޭ ކަމެއް ކަމަށެވެ.

އިސްލާމްދީން މި ކަންކަމާ ދެކޮޅުހަދައިފައިވާ މިންވަރުގެ ބޮޑުކަމުން ޔަހޫދީން ރަސޫލާ ޞޢވ ދެކެ ރުޅިއައިސްގެން ބުންޏެވެ. (مَا يُرِيْدُ هَذَا الرَّجُلُ أَنْ يَدَعَ مِنْ أَمْرِنَا شَيْئًا إِلَّا خَالَفَنَا فِيْهِ) މާނައީ: "އަހުރެމެންގެ ކަންތައްތަކުގެ ތެރެއިން މި ކަލޭގެފާނު އަހުރެމެންނާ ޚިލާފުވެވަޑައިނުގަންނަވާ އެއްވެސް ކަމެއް ނުވެއެވެ."

މިއާއެކު ޚުތުބާގައި ބުނީ، އަޅުކަމުގެ ގޮތުން ކުރެވޭ ކަންކަމުގައި އެހެން ބަޔަކު ކޮޕީކުރުމަކީ ނުވަތަ އެހެން ބަޔަކާ އެއް ގޮތަށް ޢަމަލުކުރުމަކީ އިސްލާމީ އުންމަތުގެ ޝަޚްޞިއްޔަތު ފުނޑުފުނޑުވެ، މި ދީނުގެ އަމިއްލަވަންތަކަން ގެއްލޭނެ ކަމެއް ކަމަށެވެ.

މި ކަމަށް އިންޒާރުކުރައްވައި މާތް ނަބިއްޔާ ސޢވ ޙަދީޘްކުރައްވައިފައި ވެއެވެ.) لَتَتَّبِعُنَّ سَنَنَ الَّذِينَ مِنْ قَبْلِكُمْ شِبْرًا بِشِبْرٍ، وَذِرَاعًا بِذِرَاعٍ، حَتَّى لَوْ دَخَلُوْا فِيْ جُحْرِ ضَبٍّ لَاتَّبَعْتُمُوهُمْ) މާނައީ: "ހަމަކަށަވަރުން ތިޔަބައިމީހުންގެ ކުރީގެ މީހުން އުޅުނު ގޮތްތަކަށް ތިޔަބައިމީހުން ތަބަޢަވާނޭކަން ކަށަވަރެވެ. އެހާމެ ފަތިގަނޑު ހަމަކުރާ ނެއެވެ. އެމީހުން ކައިވަތް އަޅައިގެން ކަމެއް ކުރިކަމުގައި ވިޔަސް ހަމަ އެ ފަދައިން ތިޔަބައިމީހުން ވެސް އެކަމެއް ހަމަ އެ ގޮތަށް ކުރާނެއެވެ. އަދި އެ މީހުން މުށް އަޅައިގެން ކަމެއް ކުރިކަމުގައި ވިޔަސް ހަމަ އެ ކަމެއް އެ ފަދައިން ތިޔަބައިމީހުން ކުރާނެއެވެ. އެގޮތުން އެ މީހުން ގޮސް ضَبُّ ގެ ހޮރަކަށް ވަން ކަމުގައި ވިޔަސް، ތިޔަބައިމީހުން އެ ކަމުގައި އެ މީހުންނަށް ތަބަޢަވާނެތެވެ."

ޢިލްމުވެރީން ވިދާޅުވާ ގޮތުގައި މުސްލިމުން ޣައިރުމުސްލިމުންގެ ދީނީ ޝިޢާރުތަކަށް ތަބަޢަވުމަކީ ކަނޑައެޅިގެން ޙަރާމް ކަމެއްކަން ފާހަގަކޮށް ޚުތުބާގައި ބުނީ، އެއިގެ ތެރޭގައި އެ މީހުންގެ ޢީދުތައް ފާހަގަކުރުމާއި އެކަމުގައި ބައިވެރިވެ، ތަހުނިޔާކިޔުން ހިމެނޭ ކަމަށެވެ.

މިހެންވެ ރަޙްމާނުވަންތަ ރަސްކަލާނގެ އަޅުން ސިފަކުރައްވައި މާތް الله ވަޙީކުރައްވައިފައިވާ ބަސްފުޅެއްގެ މާނާގައިވެއެވެ. "އަދި އެއުރެންނީ ދޮގުހެކިނުދޭ މީހުންނެވެ."

އިބްނު ޢައްބާސްގެ އަރިހުން ބޮޑެތި މުފައްސިރުން ރިވާކުރައްވާ ގޮތުގައި މި އާޔަތުގައި ވާރިދުވެގެންވާ "اَلزُّوْرُ" މި ބަސްފުޅުގެ މާނައަކީ، މުޝްރިކުންގެ ޢީދުތަކެވެ. އެބަހީ: މުސްލިމުންނަކީ ޣައިރުމުސްލިމުންގެ ޢީދުތަކަށް ހާޒިރުވާނެ ބައެއް ނޫނެވެ. އެއީ، މި ފަދަ އިޙުތިފާލުތަކުގައި الله ނޫން ފަރާތްތައް މަތިވެރިކޮށް މާތްކޮށް ހަދާތީއެވެ.

ޚުތުބާގައި އިތުރަށް ބުނީ؟ މުސްލިމުން ކްރިސްމަސް ފާހަގަކުރުމާއި މި އިޙުތިފާލުތަކުގައި ބައިވެރިވުމަކީ އިސްލާމްދީން ހުއްދަކުރާ ކަމެއްނޫން ކަމަށެވެ. ކްރިސްމަސްގަހާއި ސެންޓަ ކްލޯސް ފަދަ ނަޞާރާއިން އެ މީހުންގެ ދީނަށް ނިސްބަތްކޮށް، ކުރާ ކަންތައްތައް މި ޢީދުގެ ތެރޭގައި ހިމެނޭ ކަމަށެވެ. ރަސޫލާ  ސޢވ ޙަދީޘްކުރައްވައިފައި ވެއެވެ. (مَن تَشَبَّهَ بِقَوْمٍ فَهُوَ مِنْهُمْ) މާނައީ: "ބަޔަކާ އެއް ގޮތަށް އުޅޭ މީހާ ފަހެ އެ މީހަކީ އެބަޔެއްގެ ތެރެއިން ވާ މީހެކެވެ."

މި ހުރިހައި ބަސްފުޅުތަކަކުން ވެސް އެނގެނީ ޣައިރު ދީނުގެ ޢީދުތައް ފާހަގަކުރުމުގައި އަހުރެމެން މުސްލިމުން ބައިވެރިވުމަކީ ޙަރާމްކަމެއްކަމެއް ކަމަށާ ޚާއްޞަ ކޮށް މިފަދަ ޢަމަލުތަކުން އަހުރެމެން ރާއްޖޭގެ މުޖުތަމަޢުތައް ސަލާމަތްވާންޖެހޭނެ ކަން ކަމަށް ޚުތުބާގައި ބުންޏެވެ.

އަލްއިމާމުއްޛަހަބީ ވިދާޅުވެފައި ވެއެވެ. "اللهއަށާއި އާޚިރަތް ދުވަހަށް އީމާންވާ ކޮންމެ މުސްލިމަކު ޣައިރުމުސްލިމުންގެ ޢީދުތަކާ ދުރުހެލިވެ، އޭނާގެ ނަފްސާއި އަނބިދަރީން މި ފަދަ ކަންކަމުން ރައްކާތެރިކުރާން ޖެހޭނެއެވެ."

ދީނާ ޚިލާފު ފިކުރުތަކުގެ އަހުލުވެރިން މުސްލިމުންގެ ހިތްތަކަށް ވެރިވެގަތުމަށް ޓަކައި ތަފާތު ދަޅަތަކާއި މަޅިތައް ޖަހައިގެން މުސްލިމުން އެ މީހުންގެ ޢަޤީދާއާއި ދީން މަނާކުރާ ކަންތައްތަކުގެ ތެރެއަށް ވައްޓައިލުމަށް މަސައްކަތް ކުރާ ކަމަށާ، އެ މީހުންނަށް ތަބަޢަވެއްޖައުމަށް ދާންދެން އެ މީހުން މި މަސައްކަތް ހުއްޓައިނުލާނެކަން މާތް الله އަންގަވައިފައިވާ ކަމަށް ޚުތުބާގައި ބުންޏެވެ.

 އެކަލާނގެ ވަޙީކުރައްވައިފައި ވެއެވެ. "އަދި ޔަހޫދީން ވެސް ނަޞާރާއިން ވެސް އެއުރެންގެ ދީނަށް ކަލޭގެފާނު ތަބަޢަވެ ވަޑައިގެންފުމަށް ދާނދެން ކަލޭގެފާނަކާ ނުރުހޭނެތެވެ."

ޚުތުބާގައި ބުނީ، ހެޔޮ ލަފާ އިސްލާމީ މުޖުތަމަޢެއް ބިނާކުރެވޭނީ އިސްލާމީ ޘަޤާފަތު ފަތުރައިގެން ކަމަށާ، އިސްލާމީ ޢަޤީދާއާއި އަޚުލާޤުގެ މަތީގައި ޢާއިލާ ބިނާކުރެވިގެންނެވެ. އިސްލާމީ މުޖުތަމަޢުގެ ބިންގަލަކީ ޢަޤީދާ ކަމަށެވެ.