މީގެ 10 ވަރަކަށް އަހަރުކުރިން، ވީނުވީ އެއް ނޭނގި ގެއްލުނު މަތިންދާބޯޓު، އެމްއެޗް-370 ހޯދުމުގެ މަސައްކަތް އަލުން ފެށުމަށް މެލޭޝިއާއިން ނިންމައިފިއެވެ.

އޭވިއޭޝަން ދުނިޔޭގެ އެންމެ ބޮޑު އެއް "މިސްޓްރީ" އާއި ގުޅޭ މަސައްކަތްތައް ފެށުމަށް ނިންމާފައިވާކަން ހާމަކުރައްވަމުން މެލޭޝިއާގެ ދަތުރުފަތުރާ ބެހޭ ވަޒީރު އެންތޮނީ ލޮކް ވިދާޅުވީ, މަތިންދާބޯޓު ފެނޭތޯ ދެކުނު އިންޑިއާ ކަނޑުގެ ބައެއް ބެލުމަށް ޕްރޮޕޯސަލް ހުށަހަޅާފައިވަނީ މީގެ ކުރިން 2018 ވަނަ އަހަރުވެސް މި ބޯޓު ހޯދުމަށް މަސައްކަތްކުރި ކުންފުންޏެއްކަމަށްވާ އޯޝަން އިންފިނިޓީގެ ފަރާތުން ކަމަށެވެ. 

ލޮވް ވިދާޅުވީ، މިކަމަށް އެއްބާރުލުން ދޭނެ ކަމަށާއި، އެމްއެޗް-370 ހޯދައިފިނަމަ، އޯޝަން އިންފިނިޓީއަށް 70 މިލިއަން ޑޮލަރު ލިބޭނެކަމަށެވެ.

ޖުމުލަ 277 ޕަސެންޖަރުންނާއި 12 ކްރޫ މެމްބަރުންނާއިއެކު، މެލޭޝިއާގެ ކުއަލަމްޕޫރުން ފުރައިގެން ޗައިނާގެ ބެއިޖިން އަށް ދަތުރުކުރަމުންދިޔަ މި ބޯޓު ގެއްލިފައިވަނީ 2014 ވަނަ އަހަރުގެ މާޗުމަހުގެ 8 ވަނަ ދުވަހުއެވެ.

މިބޯޓު ގެއްލުމާއި ގުޅިގެން މީގެ ކުރިން ހިންގި ތަހުގީގަކުން ވަނީ، މި ބޯޓު ނައްޓާލިތާ އެއް ގަޑިއިރު ވެސް ނުވަނީސް ބޯޓުގެ މުއާސަލާތީ ސިސްޓަމްތައް ނިއްވާލާފައިވާކަމަށް ދައްކާފައެވެ. މިއާއިއެކު، އޭރު މިލިޓަރީ ރޭޑަރުން ދެއްކި ގޮތުގައި، މި ބޯޓު ވަނީ މެލޭޝިއާ އާއި ދިމާލަށް އަބުރާލައި، އިންޑޮނޭޝިއާގެ ސުމަޓްރާ އާއި ދިމާލަށް މިސްރާބު ޖަހާފައެވެ.

މި ބޯޓު ހޯދުމަށްޓަކައި 26 ގައުމަކުން ބައިވެރިވިއިރު، ބޯޓު ގެއްލުނުތާ އެތައް ހަފްތާއެއްފަހުން މެލޭޝިއާގެ ސަރުކާރުން ވަނީ ބޯޓުން ތެޔޮ ހުސްވަންދެން ދުއްވި ކަމަށާއި، އޭގެ ދަތުރު ނިންމާލާފައިވަނީ ބެއިޖިން އާއި އެތައްހާސް ކިލޯމިޓަރެއް ދުރުން ދެކުނު އިންޑިއާގެ ކަނޑުގެ ސަރަހައްދަށްކަމަށް ބުނެފައެވެ.

މި ބޯޓުގެ ބައިތައް ކަމަށްބުނާ ކުނިބުނި ތަކެއް އޭގެ ފަހުން އެފްރިކާއާއި އިންޑިއާ ކަނޑުގެ ރަށްތަކަށް ލެއްގިިއިރު، ތަހުގީގު ކުރި ފަރާތުން ވަނީ މަތިންދާބޯޓުގެ ޕައިލެޓުންގެ ފަރާތުން ވެސް ޝައްކު ކުރެވޭ ކަމެއް ފެނިފައި ނުވާ ކަމަށް ބުނެފައެވެ.