ރާއްޖެއަށް ޒިޔާރަތްކުރާ 2 މިލިއަން ވަނަ ފަތުރުވެރިޔާ އަންނަ ބުރާސްފަތިދުވަހު ރާއްޖެ އަންނާނެކަމަށް ބެލެވޭކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމް ނިއުސް އަށް މައުލޫމާތު ދެއްވަމުން ވަޒީރު ވިދާޅުވީ، އާދީއްތަދުވަހުގެ ނިޔަލަށް ރާއްޖެއަށް 1978252 ފަތުރުވެރިން ޒިޔާރަތްކޮށްފައިވާކަމަށާއި، ފަތުރުވެރިން ރާއްޖެއަށް އަންނަ އަދަދުތަކަށް ބަލާއިރު، 2 މިލިއަން ވަނަ ފަތުރުވެރިޔާ އަންނާނެކަމަށް ބެލެވެނީ އަންނަ ބުރާސްފަތިދުވަހުކަމަށެވެ.

ސަރުކާރުން މިއަހަރު 2 މިލިއަން ފަތުރުވެރިން ރާއްޖެ ގެނައުމުގެ ސަރުކާރުގެ އަމާޒަކަށްވާއިރު، ވަޒީރު ފައިޞަލް ވިދާޅުވީ، މިއީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ އިރުޝާދާއި ލަފާގެ ދަށުން އެ ވުޒާރާއާއި ސިނާޢަތުގައި މަސައްކަތްކުރައްވާ ފަރާތްތަކުން ގުޅިގެން ކުރެވުނު ކާމިޔާބު މަސައްކަތްތަކެއްގެ ނަތީޖާކަމަށެވެ.

Advertisement

ފަތުރުވެރިކަމާއި ބެހޭ ވުޒާރާއިން އާއްމުކުރާ އެންމެފަހުގެ ތަފާސްހިސާބުތައް ދައްކާ ގޮތުން ރާއްޖެއަށް މި އަހަރުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު ވަނީ މިދިޔަ އަހަރުގެ މި މުއްދަތާއި އަޅާބަލާއިރު ނުވަ ޕަސެންޓް އިތުރުވެފަ އެވެ.

މިގޮތުން  ޑިސެންބަރުމަހުގެ ފުރަތަމަ 17 ދުވަސްތެރޭ ރާއްޖެއަށް 103،560 ފަތުރުވެރިން ވަނީ ޒިޔާރަތްކޮށްފައިވާއިރު، އަހަރުގެ މިހާތަނަށް ރާއްޖެއަށް 1.9 މިލިޔަން ފަތުރުވެރިން ވަނީ ޒިޔާރަތްކޮށްފައެވެ.