ވޭޕް މަނާކުރާ ޤާނޫނުގައި ބަޔާންކޮށްފައިވާ އުސޫލްތަކާ ހިލާފްވެގެން މިދިޔަ ހަފްތާއެއްގެ ތެރޭގައި 9 މީހަކު ޖޫރިމަނާކޮށްފައިވާކަމަށް ފުލުހުން ބުނެފިއެވެ.

ވޭޕްގެ ބާވަތްތައް ބޭނުންކުރުން ޤާނޫނީގޮތުން މަނާކޮށްފައިވަނީ މިހިނގާ ޑިސެމްބަރުމަހުގެ 15 ވަނަ ދުވަހުން ފެށިގެންނެވެ. ފުލުހުން ދީފައިވާ މައުލޫމާތަށް ބަލާއިރު، ވޭޕް މަނާކޮށްގެން މިދިޔަ ހަފްތާއެއްހާ ދުވަހުގެ ތެރޭގައި 9 މީހަކު ޖޫރިމަނާކުރިއިރު، ކުރެވުނު ޖޫރިމަނާގެ ޖުމްލަ އަދަދު 50،000 ރުފިޔާއަށް އަރައެވެ.

މީގެ ތެރެއިން އެކަކު ޖޫރިމަނާ ކޮށްފައިވަނީ ސައިކަލް ދުއްވަމުން އީ ސިނގިރޭޓް ބޭނުންކުރުމުންނެވެ. އެމީހާ ޖޫރިމަނާ ކޮށްފައިވަނީ 10.000 ރުފިޔާއިންނެވެ. ދުންފަތް ކޮންޓްރޯލް ކުރުމުގެ ޤާނޫނަށް އަލަށް ގެނައި އިސްލާހުން އެބާވަތުގެ އަމަލެއް ކޮށްފިނަމަ ޖޫރިމަނާކުރުމުގެ ބާރު ފުލުހުންނަށް ލިބެއެވެ.

ރާއްޖޭގައި ވޭޕް ބޭނުންކޮށް އެތަކެތީގެ ވިޔަފާރިކުރުން މަނާކޮށް، ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރު ކަމަށް ކަނޑައެޅުމަށް ދުންފަތް ކޮންޓްރޯލް ކުރުމާއި ބެހޭ ގާނޫނަށް ހުށަހެޅި އިސްލާހުގައުވާގޮތުން، އެ ގާނޫނާ ޚިލާފް ވެއްޖެ ބޮޑު ޖޫރިމަނާއެއް ދައްކަންޖެހޭއެވެ. 

އެއީ:

1. ވޭޕާއި ވޭޕް ކުރަން ބޭނުން ކުރާ ތަކެތި ރާއްޖެއަށް އެތެރެ ކޮށްފިނަމަ، އެތެރެ ކުރި މީހަކު 50،000 ރުފިޔާއިން ޖޫރިމަނާ

2- އެތެރެ ކުރާ ކޮންމެ ވޭޕަކަށް އިތުރު 10،000 ރުފިޔާގެ މަގުން ޖޫރިމަނާ

3- ރާއްޖޭގައި ވޭޕް ވިއްކާ ކޮންމެ މީހަކަށް 20،000 ރުފިޔާގެ ޖޫރިމަނާއެއް، އަދި ވިއްކި ކޮންމެ ވޭޕަކަށް 10،000 ރުފިޔާގެ މަގުން ޖޫރިމަނާ

4- ހިލޭ މީހަކަށް ވޭޕެއް ދީފިނަމަ 10،000 ރުފިޔާގެ ޖޫރިމަނާއެއް

5- ވޭޕް ބޭނުން ކުރާ މީހަކު 5،000 ރުފިޔާއިން ޖޫރިމަނާ