މުއައްޒަފުންނަށް މުސާރަ ނުދޭތީ ރީކޯ މޫސާ މަނިކުގެ ކުންފުންޏެއްކަމަށްވާ  "މޯ ހޮޓެލްސް އެންޑް ރިސޯޓްސް ޕްރައިވެޓް ލިމިޓެޑް"، މޯލްޑިވްސް ލޭބާ ރިލޭޝަންސް އޮތޯރިޓީން ބްލެކްލިސްޓް ކޮށްފިއެވެ.

ރީކޯ މޫސަގެ ރިސޯޓާއި ގެސްޓްހައުސް ހިންގާ މި ކުންފުނީގެ ހިއްސާދާރުންގެ ގޮތުގައި ތިބެނީ ރީކޯ މޫސަގެ އިތުރުން އޭނާގެ ދަރިންނެވެ.

މިކަމާއި ގުޅިގެން ލޭބާ ރިލޭޝަންސް އޮތޯރިޓީން ބުނީ، ރީކޯ މޫސާގެ ކުންފުނި ބްލެކް ލިސްޓްކޮށްފައިވަނީ އެ އޮތޯރިޓީން ބަލަމުންދާ މުވައްޒަފުންނަށް މުސާރަނުދޭ މައްސަލައެއްގައި އެކުންފުނިން އެއްވެސް ވަރަކަށް އެއްބާރުލުން ނުދޭތީ ކަމަށެވެ.

މިކުންފުންޏަކީ މި ބާވަތުގެ މައްސަލަތަކުގެ ރިކޯޑް އޮތް ކުންފުންޏެއް ކަން ފާހަގަކޮށް އެ އޮތޯރިޓީން ބުނީ، މީގެ ދެމަސްކުރިންވެސް ހަމަ މިފަދަ މައްސަލައެއްގައި މި ކުންފުނި ބްލެކްލިސްޓް ކުރެވުނުކަމަށެވެ.

ރީކޯ މޫސައަކީ ”މޯ ހޮޓެލްސް އެންޑް ރިސޯޓްސް ޕްރައިވެޓް ލިމިޓެޑް“ ގެ ހިއްސާދަރެއްގެ އިތުރުން ބޯޑުގެ ޑިރެކްޓަރެކެވެ. ލ. އަތޮޅުގައި ހިންގަމުންދާ ”ރަހާ ރިސޯޓް“ އަކީ އެ ކުންފުނިން ހިންގަމުންދާ ރިސޯޓެއްކަން ފާހަގަކޮށްލަން ޖެހެއެވެ. މޯލްޑިވްސް ލޭބާ ރިލޭޝަންސް އޮތޯރިޓީން ރީކޯ މޫސާ މަނިކުގެ މޯ ހޮޓެލްސް އެންޑް ރިސޯޓްސް ބްލެކްލިސްޓް ކޮށްފައިވާއިރު، ބޭންކް އޮފް މޯލްޑިވްސްއިން ނަގާފައިވާ ލޯނަކަށް ފައިސާ ނުދައްކައިގެން މޫސާ މަނިކަށް ވިޔަފާރީގެ އުސޫލުން ދިން ރަށްތަކެއްވެސް ވަނީ ބޭންކުން ނީލަންކިޔާފައެވެ. ބީއެމްއެލުން ވިއްކާލުމަށް އިއުލާނުކުރި ރަށްތަކަކީ، ލ އަތޮޅު ފަރެސް، ކުޑަ ފަރެސް އަދި ބޮޑުހުރާއެވެ. މީގެ ތެރެއިން ފަރެސް އަދި ކުޑަ ފަރެސް ޓޫރިޒަމަށް ބޭނުންކުރާއިރު، ބޮޑުހުރާ ބޭނުންކުރަނީ ދަނޑުވެރިކަމަށެވެ