ކެންސަރަށް ފަރުވާކުރުމަށްޓަކައި ރަޝިއާއިން އުފެއްދި ވެކްސިން އަންނަ އަހަރު މާކެޓަށް ނެރުމަށް ތައްޔާރުވަމުންދާކަމަށް ވެކްސިން އުފެއްދުމުގައި ހަރަކާތްތެރިވި ގަމެލެޔާ ރިސާޗް އިންސްޓިޓިއުޓް އޮފް އެޕިޑެމިއޮލޮޖީ އެންޑް މައިކްރޮބަޔޮލޮޖީގެ އިސްވެރިޔާ އެލެކްޒޭންޑްރާ ގިންޓްސްބާގް ވިދާޅުވެއްޖެއެވެ.

މި ވެކްސިން ހިލޭ ބެހުމަށް ރަޝިއާއިން ނިންމާފައިވާއިރު، މިކަމާއި ގުޅޭ ގޮތުން ދެއްވި ބަސްދީގަތުމެއްގައި ގިންޓްސްބާގް ވިދާޅުވީ، މިހާރު ކުރިއަށްދަނީ ވެކްސިން ނެރުމަށްޓަކައި ވާންޖެހޭ ފަހުގެ ތައްޔާރީތައް ކަމަށެވެ. މި ވެކްސިން މެދުވެރިކޮށް މިހާތަނަށް 7 ބަލިމީހަކަށް ފަރުވާދީފައިވާކަމަށެވެ.

ގިންޓްސްބާގް ބުނީ، ވެކްސިން އުފައްދާފައިވަނީ މަލްޓި ސްޓޭޖް ޕްރޮސެސްއަކުން ކަމަށާއި، މި ވެކްސިންގެ މަސައްކަތް ފަށާފައިވަނީ 2022 ވަނަ އަހަރު ކަމަށެވެ.

ކެންސަރުގެ ވޭން ތަހައްމަލުކުރަމުންދާ މީހުންނަށް ދޭ މި ވެކްސިނުގެ ޒަރީއާއިން ބަލި މީހާގެ ދިފާއީ ނިޒާމުން މެލިގްނެންޓް ސެލްތަކަށް ހަމަލާދޭނެ ކަމަށާއި، ހަށިގަނޑުގައި ހުންނަ ސައިޓޮޓޮކްސިކް ލީމްފޮސައިޓްސް އާއި ވައިޓް ބްލަޑް ސެލްސްތައް، ކެންސަރުގެ ޓިއުމަރުގައި އެކުލެވޭ އެންޓިޖެންސްތައް ވެސް ވެކްސިންގެ ޒަރީއާއިން ދެނެގަނެ ހަލާކުކޮށްލާނެކަމަށްވެސް ގިންޓްސްބާގް ވިދާޅުވިއެވެ.

މީގެ އިތުރުންވެސް ގިންޓްސްބާގް ވިދާޅުވީ އެކި މީހުންގެ ހަށިގަނޑުން ފެންނަ ކެންސަރުގެ ޓިއުމަރު ތަފާތުވުމާއިއެކު، މި ވެކްސިން ދެވޭނީ އެއަށް ބިނާކޮށްކަމަށެވެ.

މިހާރުވެސް ގަމެލެޔާ ސެންޓަރުން އަންނަނީ ހަށިގަނޑުގައި އާދަޔާ ޚިލާފަށް ސެލްސް އިތުރުވުމުން ޖެހޭ ބަލިތައް ކަމަށްވާ ނޮން ސްމޯލް ސެލް ލަންގް ކެންސަރު ފަދަ ސާޖަރީ، ރޭޑިއޭޝަން އަދި ކީމޯތެރަޕީން އެކަށީގެންވާ ކުރިއެރުމެއް ލިބިފައިނުވާ ބަލިތަކަށް ވެސް ވެކްސިން އުފެއްދުމުގެ މަސައްކަތްކުރަމުންނެވެ.

ގަމަލެޔާ އަކީ 2020 ވަނަ އަހަރު ކޮވިޑަށް ފަރުވާކުރުމަށް ޓަކައި ދުނިޔޭގައި އެންމެ ފުރަތަމަ އުފެއްދި އެއް ވެކްސިން ކަމަށްވާ ސްޕަޓްނިކް ވީ ކޮވިޑް-19 ވެސް އުފެއްދި ފަރާތެވެ.