އަފްޣާނިސްތާނުގައި ހުންނަ ސައުދީ އަރަބިޔާގެ އެމްބަސީގެ ހިދުމަތްތައް އަލުން ފަށާފައިވާކަން ސައުދީން އިއުލާނުކޮށްފިއެވެ.

މިކަން ކަށަވަރުކޮށްދީ، އަފްޣާނިސްތާނުގެ ވެރިރަށް، ކާބުލްގައި ހުންނަ ސައުދީގެ އެމްބަސީން އެކްސްގައި ކުރި ޕޯސްޓެއްގައި ބުނީ، އަފްޣަނިސްތާނުގެ ރައްޔިތުންނަށް ބޭނުންވާ ހިދުމަތްތައް ފޯރުކޮށްދިނުމަށްޓަކައި މިމަހުގެ 22 ވަނަ ދުވަހުން ފެށިގެން ސައުދީ އެމްބަސީގެ މަސައްކަތައް ފެށުމަށް ނިންމާފައިވާކަމަށެވެ.

ސައުދީން މިފަދައިން ނިންމާފައިމިވަނީ ތާލިބާނުން އަފްޣަނިސްތާނުގެ ވެރިކަމަށް އައުމާއިއެކު މީގެ 3 އަހަރު ކުރިން 2021 ވަނަ އަހަރުގެ އޮގަސްޓްމަހުގެ 15 ވަނަ ދުވަހު އެމްބަސީގެ މަސައްކަތްތައް ހުއްޓާލުމަށްފަހުއެވެ.

Advertisement

ސައުދީން އަފްޣާނިސްތާނުގައި ހުންނަ އެމްބަސީގެ މަސައްކަތްތައް ހުއްޓާލައި އެގައުމުން ސައުދީގެ ޑިޕްލޮމެޓުން ގެންގޮސްފައިވަނީ އެމެރިކާގެ އަސްކަރިއްޔާއިން އަފްޣާނިސްތާނުން ފޭބުމާއިއެކު ތާލިބާނުން އެގައުމުގެ ވެރިކަން ކުރަން ފެށުމުންނެވެ.

އޭގެ ފަހުން ކޮންސިއުލާ ހިދުމަތައް އެގައުމުގައި ސައުދީން ފޯރުކޮށްދިން ނަމަވެސް އެމްބަސި ހުޅުވައިގެން މަސައްކަތްތައް ކޮށްފައެއް ނުވެއެވެ.