ސަރުކާރުގެ އުއްމީދަކީ އަންނަ އަހަރު ރާއްޖޭގެ ފަތުރުވެރިކަމުގެ ސިނާއަތުން 5 ބިލިއަން ޑޮލަރު ހޯދުންކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.

ރާއްޖެއަށް ދެ މިލިއަން ފަތުރުވެރިން ޒިޔާރަތްކުރުން ފާހަގަކުރުމަށް މިއަދު ހެނދުނު ވެލާނާ އިންޓަރނޭޝަނަލް އެއާޕޯޓްގައި ބޭއްވި ހަފްލާއަށްފަހު ނޫސްވެރިންނާ ވާހަކަދައްކަވަމުން މިނިސްޓަރު ފައިސަލް ވިދާޅުވީ، މިހާރު ފަތުރުވެރިކަމުގެ ސިނާއަތް ކުރިއެރުން ހުރިގޮތަށް ބަލާއިރު، އަންނަ އަހަރު ރާއްޖޭގެ ޓޫރިޒަމަށް 15 އިންސައްތައިގެ ކުރިއެރުމެއް އަންނާނޭކަމަށް ލަފާކުރެވޭކަމަށެވެ. އެގޮތުން ސަރުކާރުގެ އުއްމީދަނީ ފަތުރުވެރިކަމުގެ ސިނާއަތުން ދައުލަތުގެ ބައިތުލްމާލަށް ވަންނަ އާމްދަނީގެ އަދަަދު 5 ބިލިއަން އެމެރިކާ ޑޮލަރަށް އަރާނޭކަމަށް ގަބޫލުކުރެވޭކަމަށް ވަޒީރު ވިދާޅުވިއެވެ.

މިނިސްޓަރު ފައިސަލް ވިދާޅުވީ މިއަހަރަކީ ރާއްޖޭގެ ފަތުރުވެރިކަމުގެ ސިނާއަތުގައި ރެކޯޑްތަކެއް ހެދިގެންދިޔަ އަހަރެއްކަމަށާއި، މިގޮތުން މިހާތަނަށް އެއްމަހެއްގެ ތެރޭގައި އެންމެގިނަ ފަތުރުވެރިން ޒިޔާރަތްކުރީވެސް މިއަހަރުގެ ފެބުރުއަރީގައިކަން ވަޒީރު ފާހަގަކުރެއްވިއެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ ފެބުރުއަރީމަހު ރާއްޖެއަށް ވަނީ 217,392 ފަތުރުވެރިން ޒިޔާރަތްކޮށްފައެވެ.

ރާއްޖޭގެ ފަތުރުވެރިކަމުގެ ސިނާއަތަށް 52 އަހަރު ފުރިފައިވާއިރު، ރާއްޖެއަށް އަހަރެއްގެ ތެރޭގައި ދެ މިލިއަން ފަތުރުވެރިން ޒިޔާރަތްކުރި މިއީ ފުރަތަމަ ފަހަރެވެ. ރާއްޖޭގެ ޓޫރިޒަމް ފެށިގެންއައީ 1972 ވަނަ އަހަރުގެ ތެރޭގައެވެ. އޭރު ރާއްޖޭގައި އެންމެ ރިސޯޓެއް އޮތްނަމަވެސް މިއަދު ރާއްޖޭގައި 183 ރިސޯޓް ހިންގުމަށް ރަޖިސްޓްރީކޮށްފައި އެބައޮތެވެ. ރާއްޖޭގައި މިހާރު ޓޫރިސްޓުންނަށް ހިދުމަތްދިނުމަށް ހިންގާ ތަންތަނުގެ ޖުމްލަ އަދަދަކީ 1،277 އެވެ. މީގެ ތެރޭގައި ރިސޯޓް، ހޮޓާ ގެސްޓްހައުސް އަދި ސަފާރީ ހިމެނެއެވެ. އެތަންތަނުގައި ޖުމްލަ 63،000 ހާހަށްވުރެ ގިނަ އެނދު އެބަހުއްޓެވެ.