ވައިގެމަގުން ރާއްޖެ އެތެރެކުރަން އުޅުނު 5.5 މިލިއަން ރުފިޔާގެ މަސްތުވާތަކެތި އަތުލައިގެންފިއެވެ.

މި މައްސަލައާއި ގުޅިގެން ކަސްޓަމްސް ސަރވިސްއިން ބުނީ، މިތަކެތި އަތުލައިގަތީ މިމަހުގެ 26 ވަނަ ދުވަހު ކަމަށެވެ.

މިގޮތުން އެދުވަހު ތައިލޭންޑްއިން ރާއްޖެއައި އުމުރުން 41 އަހަރާއި 21 އަހަރުގެ ދިވެހި 2 ފިރިހެން ފަސިންޖަރުންގެ ޢަމަލުތައް ހުރިގޮތުން އެ ފަސިންޖަރުންނާއި މެދު ޝައްކުކުރެވިގެން އިތުރަށް ބަލައި ފާސްކުރުމުގެ ތެރޭގައި މި ދެ ފަސިންޖަރުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓާ ފެނިފައިވާކަމަށް ކަސްޓަމްސް އިން ބުނެއެވެ.

Advertisement

ކަސްޓަމްސް އިން ބުނީ، މި ތަކެތި ތަޙުލީލުކުރިއިރު، މަސްތުވާތަކެތީގެ ދެ ބާވަތެއް ކަމަށްވާ ހެރޮއިން އަދި މެފެޑްރޯންއަށް ޕޮޒިޓިވް ވެފައިވާކަމަށާއި، މިތަކެތީގެ ބަރުދަނުގައި ޕެކިންއާއެކު ޖުމްލަ 2.4 ކިލޯ ހުރިކަމަށެވެ.

ކަސްޓަމްސް އިން ހާމަކުރި ގޮތުގައި މިތަކެތީގެ މަގުމަތީ އަގު ގާތްގަނޑަކަށް 5.5 މިލިއަން ދިވެހި ރުފިޔާއަށް އަރައެވެ.

މިއާއިއެކު ކަސްޓަމްސް އިން ވަނީ  މި މައްސަލަ އިތުރަށް ތަހުގީގުކުރުމަށްޓަކައި، މި މައްސަލައިގައި ހިމެނޭ 2 މީހުން ފުލުހުންނާއި ހަވާލުކޮށްފައެވެ.