ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފައްޓަވާފައިވާ ފަސް މިލިޔަން ގަސް އިންދުމުގެ ޕްރޮގުރާމްގެ ދަށުން މިއަހަރުގެ މިހާތަނަށް 450،000 ގަސް އިންދާފައިވާކަމަށް ތިމާވެށްޓާއި ހަކަތައާބެހޭ ވުޒާރާއިން ހާމަކޮށްފިއެވެ.

ދައުލަތުގެ މީޑިޔާ، ޕީއެސްއެމް އަށް މައުލޫމާތު ދެމުން އެ ވުޒާރާއިން ބުނީ، މި ޕްރޮގުރާމްގެ ދަށުން މިހާތަނަށް 450،936 ގަސް އިންދާފައިވާކަމަށާއި، މިއާއިއެކު، 4،219،456 ގަސް އިންދަން 70 ތަނަކުން ޕްލެޖް ލިބިފައިވާކަމަށެވެ.

މި ޕްރޮގްރާމްގެ ދަށުން މިހާތަނަށް ސްޓެލްކޯއިން ވެސް 50،000 އަށްވުރެ ގިނަ ގަސް އިންދާފައިވާއިރު،  މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވެސް ވަނީ މި ޕްރޮގްރާމަށް އެއްބާރުލުން ދިނުމުގެ ގޮތުން، 1 މިލިއަން ގަސް އިންދުމުގެ ޕްރޮގްރާމް ފަށާފައެވެ.

 މިދިޔަ ޖޫން މަހުގެ 5 ވަނަ ދުވަހު ރައީސް ޑރ.މުޢިއްޒު ފައްޓަވައިދެއްވި މި ޕްރޮގްރާމަކީ އެމަނިކުފާނުގެ ރިޔާސީ ވައުދުފުޅަކަށްވާއިރު، މިކަމާއި ގުޅޭގޮތުން ރައީސް ޑރ.މުޢިއްޒު ވިދާޅުވީ، މި ޕްރޮގްރާމްގައި އިސްކަންދެނީ ރާއްޖެއިން ނެތެމުންދާ ގަސްތައް ދިރުވައި އާލާކުރުމަށް ކަމަށެވެ. މި ގޮތުން 90 ބާވަތެއްގެ ގަސް މި ޕްރޮގްރާމްގައި އިންދުމަށް ވަނީ ނިންމާފައެވެ.

މި މަޝްރޫޢަކީ ރާއްޖޭގެ ތިމާވެށި ރައްކާތެރިކޮށް، މޫސުމަށް އަންނަ ބަދަލުތަކުގެ ނޭދެވޭ އަސަރުތައް ކުޑަކުރުމަށް އެޅޭ މުހިންމު ފިޔަވަޅެއްކަމަށް ރައީސް ޑރ.މުޢިއްޒު ވަނީ ފާހަގަކުރައްވާފައެވެ.