ކްލާސް ކުއްޖަކު މަރާލި މައްސަލައިގައި ކުޑަކުއްޖަކު އުމުރަށް ޖަލަށް ލުމަށް އުތުރު ޗައިނާގެ ކޯޓަކުން ހުކުމްކޮށްފިއެވެ.

މި މައްސަލައިގައި ތިން ކުއްޖަކު ޝާމިލް ވާއިރު، އޭގެ ތެރެއިން އުމުރު ދުވަހުގެ ޖަލު ހުކުމް އިއްވާފައިވަނީ ޒަންގް އަށެވެ. އަދި ލީ، 12 އަހަރަށް ޖަލަށް ލުމަށް ހުކުމް ކުރިއިރު، ތިން ވަނައަށް ތުހުމަތުކުރެވޭ ކުއްޖާ، މާ އަށް ވަނީ ކަރެކްޝަނަލް އެޑިއުކޭޝަން ދިނުމަށް ހުކުމްކޮށްފައެވެ.

މި ހާދިސާ ހިނގިއިރު އުމުރުން 13 އަހަރުގެ މި ތިން ކުދިންގެ މައްޗަށް ކޮށްފައިވަނީ އެ ކްލާހުގައި އުޅޭ ހަމަ އެއުމުރުގެ ވަންގް އަށް ގިނަ ދުވަސްތަކެއް ވަންދެން ހަނގާކޮށް މަރާލި ކަމުގެ ތުހުމަތެވެ. ވަންގް މަރާލުމަށް ފަހު ވަޅުލާފައިއޮއްވާ ފެނިފައިވަނީ މިއަހަރޔގެ މާޗު މަހުގެ 10 ވަނަ ދުވަހުއެވެ.

މި މައްސަލައާއި ގުޅިގެން ކޯޓުން ބުނީ، ވަންގް ގެ މަރުގެ ޒިންމާ އުފުލަން ޖެހޭނީ ޒަންގް ކަމަށާއި، މި ކުށުގައި ލީ ބައިވެރިވެ، ވަންގް ގެ ހަށިގަނޑު ވަޅުލާން އެހީވެފައިވާކަމަށެވެ. ހަމައެއާއިއެކު، ވަންގް މެރުމުގައި މާ ބައިވެރިނުވިނަމަވެސް، އޭނާވެސް އެތަނުގައި ހުރިކަމަށާއި، ވަންގް މަރާލިތަން ފެނިފައިވާކަމަށް ކޯޓުން ކުރި ހުކުމްގައި ވެއެވެ.

ޗައިނާއިން 2021 ވަނަ އަހަރު، ކުޑަކުދިން ކުށުގެ ޒިންމާ އުފުލަން ޖެހޭ އުމުރު 14 އަހަރުން 12 އަހަރަށް ދަށްކޮށް، ކުޑަކުދިން މަރުގެ އަދަބުން އިސްތިސްނާކޮށްފައިވާކަން ފާހަގަކޮށްލަން ޖެހެއެވެ.