ދެކުނު ކޮރެއާގެ ސަސްޕެންޑް ކުރެވިފައިވާ ރައީސް، ޔޫން ސުކް ޔޯލް ހައްޔަރުކުރުމުގެއަމުރު އެގައުމުގެ ވެރިކަން ކުރާރަށް ކަމަށްވާ ސޯލްގެ ކޯޓަކުން ނެރެފިއެވެ.
ޔޫން ހައްޔަރުކުރުމުގެ އަމުރަކަށް އެދިފައިވަނީ މިމަހުގެ 3 ވަނަ ދުވަހު އޭނާ ކުއްލި ގޮތަކަށް މާޝަލް ލޯ އިއުލާނު ކުރުމާއި ގުޅިގެންނެވެ. މި އަމުރު ނެރުމާއިއެކު ޔޫން ވެގެން ގޮސްފައިވަނީ އެގައުމުގައި ހައްޔަރުކުރުމުގެ އަމުރު ނެރުނު ފުރަތަމަ ރައީސަށެވެ.
މީގެ އިތުރުންވެސް ޔޫން އާއި ގުޅޭ ގިނަ މައްސަލަތަކެއް ތަހުގީގުކުރަމުން އަންނައިރު، އޭނާ ވަނީ 3 ފަހަރަށް މައްސަލައިގެ ތަހުގީގަށް ސުވާލުކުރުމަށް ވެސް ހާޒިރުކޮށްފައެވެ.
އިންވެސްޓިގޭޓަރުންނަށް އެ އަމުރު ތަންފީޒު ކުރުމަށް ޖެނުއަރީ މަހުގެ 6 ވަނަ ދުވަހުގެ ނިޔަލަށް ލިބިފައިވާއިރު، މުއްދަތު އިތުރު ކުރުމަށް އެދި ހުށަހެޅުމަށް ވެސް ވަނީ ފުރުސަތުދީފައެވެ.
ޔޫންގެ ސެކިއުރިޓީ ޓީމާއި އޭނާއަށް ތާއީދުކުރާ ފަރާތްތައް މިކަމަށް ހުރަސްއެޅުން އެކަށީގެންވާއިރު، މީގެ ކުރިން އެގައުމުގެ ރިޔާސީ ސެކިއުރިޓީ ސާވިސް އިން ވަނީ ރިޔާސީ އޮފީސް ގޯތިތެރެއަށާއި ޔޫންގެ އަމިއްލަ ގެއަށް ވަނުމަށް އިންވެސްޓިގޭޓަރުންނަށް ހުރަސް އަޅާފައެވެ.
ޔޫން ވީ ތަނެއް އާއްމުންނަށް ނޭނގުނު ނަމަވެސް، އޭނާ ގައުމުން ފުރައިގެން ދިޔުން ވަނީ މަނާކޮށްފައެވެ.
ގާނޫނު ހަދާ މަޖިލީހުގެ މެމްބަރުންގެ ވޯޓާއިއެކު ޑިސެމްބަރު މަހުގެ 14 ވަނަ ދުވަހުން ފެށިގެން ރައީސްގެ މަގާމުން ޔޫން ސަސްޕެންޑް ކޮށްފައިވާއިރު، އޭނާ މަގާމުން ވަކިކުރެވޭނީ އެގައުމުގެ ދުސްތޫރީ ކޯޓުން މަޖިލީހުގެ މި ނިންމުން ދަމަހައްޓައިފިނަމައެވެ.
ޔޫންގެ ފަހުން އެގައުމުގެ ވަގުތީ ރައީސްކަމާއި ހަވާލުވި ހަން ޑަކް ސޫ ވެސް މަގާމުން ވަކިކޮށްފައިވާއިރު، މިހާރު އެގައުމުގެ ވަގުތީ ރައީސް ކަމާއި، ވަގުތީ ބޮޑު ވަޒީރުކަން ކުރައްވަމުން އަންނަ ޗޮއި ސަންގް މޮކް ވެސް ވަކިކުރާނެ ކަމުގެ އިންޒާރު އެގައުމުގެ ގާނޫނު ހަދާ މަޖިލީހުގައި ތިބި އިދިކޮޅު ފަރާތްތަކުން އަންނަނީ ދެމުންނެވެ.
Advertisement
This content is created and paid for by advertisers and does not involve Voice Journalists
