މިއިން ޒަމާނަކުވެސް ޣައްޒާއިން ދެކެފައި ނުވާފަދަ ވަރުގަދަ ހަމަލާއެއް ދޭނެ ކަމުގެ އިންޒާރު އިސްރާއީލުން ދީފިއެވެ. 

އިސްރާއީލުގެ ދިފާއީ ވަޒީރު އިސްރާއިލް ކަޓްޒް މިފަދަ އިންޒާރެއް، ޣައްޒާގެ މިނިވަންކަމަށްޓަކައި ޖިހާދު ކުރަމުންދާ ހަމާސް ޖަމާއަތަށް ދީފައިވަނީ ހަމާސްއިން އިސްރާއީލަށް ދޭ ހަމަލާތައް ހުއްޓާލައި، ޣައްޒާގައި ބަންދުކޮށްފައިވާ އިސްރާއީލީ ރަހީނުން ދޫކޮށްލުމަށް ޑިމާންޑު ކޮށެވެ. 

އިސްރާޢީލުން މިފަދަ އިންޒާރު ދީފައިވާއިރު، އިސްރާޢީލުން ވަނީ ފަލަސްތީނުގެ ކުޑަކުދިންނާއި އަންހެނުން ހިމެނޭހެން، އެތައް ބަޔަކު އަސީރުންގެ ގޮތުގައި ޖަލަށްލާފައެވެ. އޭގެތެރެއިން އެއް ބަޔަކު ވީނުވީއެއް ނޭނގި ”ގެއްލިފައި“ ވާއިރު އަނެއް ބަޔަކަށް ޖިންސީ އަދި ޖިސްމާނީ އަނިޔާތައްދީ ޝަހީދުކޮށްލާފައިވެއެވެ.

މީގެ އިތުރުން ރޭގެ ވަގުތެއްގައި އިސްރާއީލުގެ ސިފައިން ވަނީ ޣައްޒާގެ ދެކުނުގައިވާ އަލް-މަވާސީ ސަރަހައްދަށް ބޮން އަޅާފައެވެ. މި ސަރަހައްދަކީ "އިންސާނީ ސަރަހައްދު" ނުވަތަ ”ސޭފް ޒޯން“ ގެ ގޮތުގައި ކަނޑައަޅާފައިވާ ތަނެކެވެ. މި ހަމަލާގައި މަދުވެގެން 11 ފަލަސްތީނު ރައްޔިތުން ވަނީ ޝަހީދުވެފައެވެ.

އިސްރާއީލުގެ ހަމަލާތަކާއެކު، ވާރޭވެހި ފިނިކަން އިތުރުވެ، ކާބޯތަކެތި މަދުވުމުގެ ސަބަބުން ޣައްޒާގެ އިންސާނީ ހާލަތު އިތުރަށް ދަށަށް ގޮސްފައިވެއެވެ. ފަލަސްތީނުގެ ސިއްހީ އޮފިޝަލެއް ބުނާ ގޮތުގައި ފިނިކަމުގެ ސަބަބުން މިހާތަނަށް 8 ކުޑަކުދިން ވަނީ މަރުވެފައެވެ.

2023 ވަނަ އަހަރުގެ އޮކްޓޯބަރ 7 އިން ފެށިގެން އިސްރާއީލުން ޣައްޒާއަށް ދޭ ހަމަލާތަކުގައި މަދުވެގެން 45,553 ފަލަސްތީނު ރައްޔިތުން ވަނީ ޝަހީދުވެފައެވެ. އަދި 108,379 މީހުންނަށް ވަނީ އަނިޔާވެފައެވެ.

އޮކްޓޯބަރ 7 ގައި ހަމާސްއިން އިސްރާއީލަށް ދިން ހަމަލާގައި 1,139 އިސްރާއީލީން މަރުވެ، 200 އަށްވުރެ ގިނަ މީހުން ވަނީ ރަހީނުންގެ ގޮތުގައި ގެންގޮސްފައެވެ.