ޤުރްއާން ކިޔަވައި ތިލާވަތު ކުރުމާއި، އެ ފޮތަށް ޢަމަލުކުރުން މުސްލިމުންނަށް މިހާރު އުނދަގޫ ކަމަކަށްވެފައިވާ ކަމަށް އެކަމުގެ ސަބަބުން ދީނާ ދުރުވެ، ޣައިރު މުސްލިމުންގެ ކުރިމަތީގައި މުސްލިމުން ނިކަމެތި ވެފައިވާ ކަމަށް މިއަދުގެ ޚުތުބާގައި ބުނެފިއެވެ.
"ގުރުއާނުން ޒީނަތްތެރިވުން" މައުޟޫއަށް އިއްވި މި ޚުތުބާގައި، ކީރިތި ޤުރުއާނަކީ މާތްالله އެކަލާނގެ ރަސޫލާ މުޙައްމަދު ﷺ އަށް ބާވައިލެއްވި އިލާހީ ޤާނޫނުކަމާއި، މުސްލިމުން ދިރިއުޅެންވީ ގޮތުގެ މަންހަޖުކަން ފާހަގަކޮށްފައިވެއެވެ.
”އެހެންކަމުން އަހުރެމެން މުސްލިމުން ކީރިތި ޤުރްއާން ކިޔަވައި، އެފޮތާ އެއްގޮތަށް އުޅުމާއި ސުލޫކު ބައްޓަންކުރަން ޖެހެއެވެ. އަހުރެމެންގެ ދަރީންނަށް ކީރިތި ޤުރްއާން އުނގަންނައިދޭން ޖެހެއެވެ. އެކުދިންގެ ހިތްތަކުގައި ކީރިތި ޤުރްއާނުގެ ލޯބި އަށަގަންނުވައި، އެފޮތުގެ މަތިވެރިކަމާއި މާތްކަން ދަސްކޮށްދޭން ޖެހެއެވެ. ކީރިތި ޤުރްއާނަށް އިޙްތިރާމްކުރަން ދަސްކޮށްދޭން ޖެހެއެވެ.“ ޚުތުބާގައި ބުނެފައިވެއެވެ.
މިއާއެކު ޚުތުބާގައި ބުނީ، ކީރިތިޤުރްއާނަކީ އަހުރެމެން މުސްލިމުންގެ ހިތާއި ފުރާނައާއި ޟަމީރުގެ ކާނާ ކަމަށާ އަދި ޤުރްއާނަކީ ބަލިތަކަށް އޮތް ޝިފާއެއް ނަމަވެސް މިއަދު މުސްލިމުން ވަނީ ޤުރުޢާނާ ދުރުވެފައި ކަމަށެވެ.
"މިއަދު އަހުރެމެންނަށް ވަނީ ކީރިތި ޤުރްއާން ކިޔަވައި ތިލާވަތު ކުރުމާއި، އެ ފޮތަށް ޢަމަލުކުރުން އުނދަގޫ ކަމަކަށްވެފައެވެ. އެކަމުގެ ސަބަބުން އަހުރެމެން ވަނީ ދީނާ ދުރުވެފައެވެ. އަދި ޣައިރު މުސްލިމުންގެ ކުރިމަތީގައި އަހުރެމެން ވަނީ ނިކަމެތިވެފައެވެ،" ޚުތުބާގައި ބުނެފައިވެއެވެ.
ޚުތުބާގައި އިތުރަށް ބުނީ، ކީރިތި ޤުރްއާން ކިޔެވުމާއި ޤުރްއާނަށް ޢަމަލުކުރުމަކީ، އަހުރެމެންގެ މައްޗަށް ވާޖިބު ކަމަކަށްވީ ހިނދު، ޤުރްއާނުން މީހާ ޒީނަތްތެރިވުމަކީ ވެސް ވާޖިބު ކަމެއް ކަމަށެވެ.
”ޤުރުއާނުގައި މާތް الله ވަހީކުރައްވާފައިވާ ބަސްފުޅެއްގެ މާނާގައި ވެއެވެ. الله، އެންމެ ރިވެތިބަސްތައް ފޮތެއްގެ ސިފައިގައި ބާވައިލެއްވިއެވެ. (ފުރިހަމަކަމުގައި) އެއްފަދަވެގެންވާ، ތަކުރާރުކޮށް ކިޔެވޭ ފޮތަކަށްވާ حال ގައެވެ. އެ ފޮތް ކިޔެވޭހިނދު، އެއުރެންގެ ވެރިރަސްކަލާނގެއަށް ބިރުވެތިވާމީހުންގެ ގައިގެހަންތައް ތުރުތުރުއަޅައިގެންދެއެވެ. ދެން އެއުރެންގެ ގައިގެހަންތަކާއި، ހިތްތައް الله ހަނދުމަކުރުމަށް މަޑުމޮޅިވެދެތެވެ. އެއީ الله ގެ ތެދުމަގެވެ. އެކަލާނގެ އިރާދަކުރައްވާމީހަކަށް، އެއިން މަގުދައްކަވަތެވެ. އަދި الله މަގުފުރައްދަވާ މީހަކަށް، ފަހެ ތެދުމަގު ދައްކާނޭ ހަމައެކަކުވެސް ނުވެތެވެ."
ހުތުބާގައި ބުނީ ކީރިތި ޤުރްއާނުގެ އަޚުލާޤުން ޒީނަތްތެރިވުމަކީ އެކަމުގެ ސަބަބުން ގިނަގުނަ ދަރުމައާއި ޘަވާބު ލިބޭނެކަމެއް ކަމަށާ އެއީ ދެދުނިޔޭގެ ބާއްޖަވެރިކަން ލިބޭނެ ކަމެއް ކަމަށެވެ.
އަދި މުސްލިމުން ޤުރުއާން ކިޔަވައި، އެއާ އެއްގޮތަށް އުޅުމާއި ސުލޫކު ބައްޓަންކުރުމުގެ މުހިންމުކަމާއި، ދަރީންނަށް ޤުރުއާން އުނގަންނައިދީ އެކުދިންގެ ހިތްތަކުގައި ޤުރުއާނުގެ ލޯބި އަށަގަންނުވަންޖެހޭކަން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
