އިނގިރޭސީންގެ އަތްދަށުން މިނިވަންވިތާ 77 ވަނަ އަހަރީ ދުވަސް ފާހަގަކުރުމުގެ ގޮތުން، 180 ބިދޭސީންނާއިއެކު 6،000 ގައިދީން މިނިވަންކުރުމަށް މިޔަންމާގެ އަސްކަރިއްޔާއިން ނިންމައިފިއެވެ.

މިޔަންމާގެ ސަރުކާރުގެ ޓެލެވިޜަން ސްޓޭޝަން އެމްއާރްޓީވީން ބުނެފައިވާ ގޮތުގައި، ސިފައިންގެ ސަރުކާރުގެ އިސްވެރިޔާ ސީނިއަރ ޖެނެރަލް މިން އައުންގ ހްލައިންގ ވަނީ މިޔަންމާގެ 5،864 ގައިދީންނަށާއި އަދި 180 ބިދޭސީ ގައިދީންނަށް މަޢާފު ދެއްވާފައެވެ.

ނަމަވެސް، ޖަލުން ދޫކޮށްލެވޭ މީހުންގެ ތެރޭގައި އެގައުމުގެ ކާރިޖީ ވަޒީރު ކަމާއި، ސްޓޭޓް ކައުންސިލަރކަން ކުރި 79 އަހަރުގެ އާންގް ސާން ސޫ ޗީ ހިމެނޭކަމުގެ އެއްވެސް ނިޝާނެއް ނުފެނެއެވެ. 

ދޫކޮށްލެވޭ ބިދޭސީންގެ ތެރޭގައި ނޮވެމްބަރު މަހުގެ ފަހުކޮޅު މިޔަންމާގެ ކަނޑުގެ ސަރަޙައްދުގައި ހައްޔަރުކުރެވުނު ތައިލެންޑުގެ 4 މަސްވެރިން ހިމެނިދާނެކަމަށް ބެލޭއިރު، ތައިލެންޑުގެ ބޮޑުވަޒީރު ޕެއިޓޮންގްޓާން ޝިނަވަތްރާ ވަނީ މި 4 މީހުން މިނިވަން ދުވަހު ދޫކޮށްލެވޭނެ ކަމަށް އުންމީދުކުރައްވާކަމަށް ވިދާޅުވެފައެވެ.

ހޮނިހިރު ދުވަހުން ފެށިގެން ގައިދީން ދޫކޮށްލަން ފެށިނަމަވެސް، މި މަސައްކަތް ނިންމުމަށް ދުވަސްތަކެއް ނަގާނެއެވެ. 

2021 ގައި އެގައުމުގެ އުފެދުނު ސިޔާސީ ހަމަނުޖެހުމުގެ ސަބަބުން، އެސިސްޓަންސް އެސޯސިއޭޝަން ފޯ ޕޮލިޓިކަލް ޕްރިޒަނަރސް (އޭއޭޕީޕީ) ގެ ތަފާސްހިސާބުތަކުން ދައްކާގޮތުގައި 28،096 މީހުން ވަނީ ސިޔާސީ ދަޢުވާތަކުގެ ދަށުން ހައްޔަރުކުރެވިފައެވެ. އަދި މަދުވެގެން 6،106 އާންމު ރައްޔިތުން ސަލާމަތީ ބާރުތަކުން މަރާލާފައިވާ ކަމަށްވެސް އެ ޖަމްޢިއްޔާއިން ބުނެފައިވެއެވެ.

ސަރުކާރުގެ މި ނިންމުމުގެ ދަށުން ދޫކޮށްލެވޭ މީހުންނާ ބެހޭ ގޮތުން އިތުރު ތަފްޞީލުތަކެއް ހާމަކޮށްފަައި ނުވި ނަމަވެސް އޭގެ ތެރެއިން ގިނަ މީހުން ހައްޔަރުކުރެވިފައިވަނީ މުޒާހަރާތަކާ ގުޅުންހުރި ދަޢުވާތަކުގެ ދަށުންކަމަށް ބެލެވެއެވެ. މީގެ ތެރޭގައި މިޔަންމާގެ ޤާނޫނުލްޢުޤޫބާތުގެ 505(އޭ) މާއްދާގެ ދަށުން ކުރެވޭ ދަޢުވާތައް ހިމެނެއެވެ. މި މާއްދާގެ ދަށުން ޢާންމުންގެ މެދުގައި ބިރުވެރިކަން އުފެދޭފަދަ ނުވަތަ ހަމަނުޖެހުން އުފެދޭފަދަ ނުވަތަ ދޮގު ޚަބަރު ފަތުރާފަދަ ކޮމެންޓްތައް ފެތުރުމަކީ ކުށެކެވެ.

އެމްއާރްޓީވީގެ ރިޕޯޓެއްގައި ބުނެފައިވާ ގޮތުން، މިން އައުންގ ހްލައިންގ ވަނީ 144 ބަންދީންގެ އުމުރު ދުވަހުގެ ޙުކުމް 15 އަހަރަށް ކުރުކޮށްދެއްވާފައެވެ. އަދި އެހެން ހުރިހާ ބަންދީންގެ ޙުކުމްތައްވެސް ކުޑަކުރެވޭނެ ކަމަށް ބުނެފައިވެއެވެ. ނަމަވެސް މީގެ ތެރޭގައި ގޮވާ ތަކެއްޗާބެހޭ ޤާނޫނާއި، ޣައިރު ޤާނޫނީ ޖަމްޢިއްޔާތަކާބެހޭ ޤާނޫނާއި، ހަތިޔާރާބެހޭ ޤާނޫނާއި އަދި ޓެރަރިޒަމް މަނާކުރުމުގެ ޤާނޫނުގެ ދަށުން ކުށްވެރިވެފައިވާ މީހުން ނުހިމެނެއެވެ.