ސަރުކާރުން ދިވެހި ކުންފުނިތަކަށް ދޭންޖެހޭ 500 މިލިއަން ރުފިޔާ އަންނަ ހަފްތާގައި ދޫކުރުމަށް ހަމަޖެހިފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުޢިއްޒު މިފަދައިން ވިދާޅުވީ، އެމަނިކުފާނު ހުވަދުއަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ގދ..ހޯނޑެއްދޫ އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ދެއްކެވި ވާހަަކަފުޅުގައެވެ.
މިގޮތުން ރައީސް ޑރ.މުޢިއްޒު ވިދާޅުވީ، ސަރުކާރުން ކޮށްފައި ހުރި މަސައްކަތްތަކަށް މި ހިނގާ ހަފްތާގެ ތެރޭގައިވެސް 500 މިލިއަނަށްވުރެ ގިނަ ރުފިޔާ ދިވެހި އެކި އެކި ކުންފުނިތަކަށް ދޫކުރަމުންދާކަމަށާއި، މިދިޔަ މަސްތަކުގެ ތެރޭގައިވެސް މި މަސައްކަތްކޮށްފައިވާކަމަށެވެ.
ކުރީ ސަރުކާރުގެ ދުވަސްވަރު ފެނަކަ، އާރުޑީސީ، އެމްޓީސީސީ، ވެމްކޯ ފަދަ ކުންފުނިތަކުން ރަށްރަށުގައި ހުންނަ ކުދި ކުދި ކުންފުނިތައް ލައްވާ މަސައްކަތްކުރުވާފައި ބޮޑު އަދަދެއްގެ ފައިސާ ނުދީހުރިކަން ރައީސް ޑރ.މުޢިއްޒު ފާހަގަކުރެއްވިއެވެ.
"އޭގެވެސް ބޮޑު އިންސައްތައެއް މިބަލަނީ މި ދެމަސްތެރޭގައި، ރޯދަމަސް އަންނަން ވާއިރަށް،ޖެނުއަރީ ފެބްރުއަރީ މަސްތެރޭގައި ދީ ނިންމޭތޯ،"
ރައީސް ޑރ.މުޢިއްޒު ވިދާޅުވިއެވެ.
މިއާއިއެކު، ރައީސް ޑރ.މުޢިއްޒު ވިދާޅުވީ، ގައުމު ދަރަނިވެރިވިޔަ ނުދީ ފައިސާ ޗާޕުނުކޮށް ފައިސާގެ އަގު ހިފަހައްޓައިގެން ރައްޔިތުންނަށް ދޭން ހުރި ފައިސާ ދެއްވަމުން، ރާއްޖޭން ބޭރަށް ދައްކަން ޖެހޭ ފައިސާވެސް ދައްކަމުން، ތަރައްގީގެ ކަންކަން ގެނެސްދިނުމަށް މަސައްކަތްކުރަމުންދާކަމަށެވެ.
Advertisement
This content is created and paid for by advertisers and does not involve Voice Journalists
