ޓިބެޓަށް އިއްޔެ އައި ބިންހެލުމުގައި މަރުވި މީހުންގެ އަދަދު 100 އިން މައްޗަށް އަރައިފިއެވެ.

ޓިބެޓުގެ އެކަހެރި ސަރަޙައްދަކަށް އައި މި ބިންހެލުމުގެ އަސަރު ހިމާލަޔާގެ އަވަށްޓެރި ޤައުމުތަކުގެ ތެރެއިން ނޭޕާލް، ބޫޓާން އަދި އުތުރު އިންޑިޔާގެ ބައެއް ސަރަޙައްދުތަކަށްވެސް ވަނީ ކޮށްފައެވެ.

ޔުނައިޓެޑް ސްޓޭޓްސް ޖިއޮލޮޖިކަލް ސަރވޭ (ޔޫއެސްޖީއެސް) އިން ބުނާ ގޮތުގައި، ރެކްޓަރ މިންގަނޑުން 7.1 މެގްނިޓިއުޑްގެ ބާރުމިނުގައި އައި މި ބިންހެލުން އައީ އެގައުމުގެ ގަޑިން ރޭގަނޑު 9:05 ގައި ބިމުގެ އަޑިން 10 ކިލޯމީޓަރު (6.2 މޭލު) އަޑިންނެވެ. އަދި މީގެ ފަހުން އާފްޓަރޝޮކްތަކެއް ވެސް އައިސްފައިވެއެވެ.

Advertisement

މި ހާދިސާގެ ސަބަބުން ހިމާލަޔާގެ އެކަހެރި ރަށްތަކުގައި ހުރި ގެތައް ވެއްޓި، ކައިރީގައި އޮތް ޓިބެޓުގެ އެވަރެސްޓް ފަރުބަދައިގެ ބޭސް ކޭމްޕުގައި ތިބި މީހުންނަށް ވެސް މި ބިންހެލުމުގެ އަސަރު ކޮށްފައިވެއެވެ.

ޗައިނާ ސެންޓްރަލް ޓެލެވިޜަން (ސީސީޓީވީ) އިން ބުނާ ގޮތުގައި މި ބިންހެލުމުގައި 126 މީހުން މަރުވެ، 188 މީހުން ޒަޚަމްވެފައިވެއެވެ. އަދި 3,600 އަށްވުރެ ގިނަ ގެއަށް ގެއްލުން ލިބިފައިވާ ކަމަށް އެ ޗެނަލުން ބުނެފައިވެއެވެ.

ޓިބެޓުގެ ކަމާ ބެހޭ ފަރާތްތަކާއި ޗައިނާގެ ސިފައިންގެ ރެސްކިއު އޮޕަރޭޝަންތަކުގެ ސަބަބުން ބިމާއި ހަމަވެފައިވާ ޢިމާރާތްތަކުގެ ތެރޭގައި ތާށިވެފައިވާ 400 އަށްވުރެ ގިނަ މީހުން ސަލާމަތްކުރެވިފައިވެއެވެ.

އަދިވެސް އިތުރު މީހުން ސަލާމަތްކުރުމުގެ މަސައްކަތް ކުރިއަށްދާއިރު، 30,000 އަށްވުރެ ގިނަ ރައްޔިތުން އެހެން ތަންތަނަށް ބަދަލުކުރެވިފައިވާ ކަމަށް އޮތޯރިޓީތަކުން ބުނެފައިވެއެވެ.