ސަސްޕެންޑް ކުރެވިފައިވާ ރައީސް ޔޫން ސުކް-ޔޯލް ހައްޔަރުކުރުމަށް އެގައުމުގެ ކޯޓުން ނެރުނު އަމުރުގެ މުއްދަތު އިތުރުކޮށްފިއެވެ.

ފާއިތުވި ހަފްތާގައި ރައީސް ޔޫން ހައްޔަރުކުރުމަށް ކުރި މަސައްކަތަށް ގާތްގަނޑަކަށް 200 ސިފައިންނާއި ރައީސްގެ ސެކިއުރިޓީ ޓީމުން ހުރަސްއެޅުމާއި ގުޅިގެން މި ހަފްތާގެ ހޯމަ ދުވަހު މުއްދަތު ހަމަވާގޮތަށް އޮތް އަމުރުގެ މުއްދަތު އިތުރުކޮށްދިނުމަށް ތަޙުޤީޤުކުރާ ފަރާތްތަކުން ވަނީ އެދިފައެވެ.

ސިއޯލް ވެސްޓަރން ޑިސްޓްރިކްޓް ކޯޓުން ފުރަތަމަ ދޫކޮށްފައިވަނީ ޔޫން ހައްޔަރުކުރުމަށް އަމުރެއް އަދި އޭނާގެ ގެ ބަލާ ފާސްކުރުމަށް ވަކި އަމުރެކެވެ. މިއީ ޑިސެމްބަރު 3 ވަނަ ދުވަހު އޭނާ ކުއްލި ގޮތަކަށް މާޝަލް ލޯ އިއުލާނު ކުރުމާއި ގުޅިގެން ނެރުނު އަމުރެކެވެ.

ގާނޫނު ހަދާ މަޖިލީހުގެ މެމްބަރުންގެ ވޯޓާއިއެކު ޑިސެމްބަރު މަހުގެ 14 ވަނަ ދުވަހުން ފެށިގެން ރައީސްގެ މަގާމުން ޔޫން ސަސްޕެންޑް ކޮށްފައިވާއިރު، އޭނާ މަގާމުން ވަކިކުރެވޭނީ އެގައުމުގެ ދުސްތޫރީ ކޯޓުން މަޖިލީހުގެ މި ނިންމުން ދަމަހައްޓައިފިނަމައެވެ.

ޔޫންގެ ފަހުން އެގައުމުގެ ވަގުތީ ރައީސްކަމާއި ހަވާލުވި  ހަން ޑަކް ސޫ ވެސް މަގާމުން ވަކިކޮށްފައިވާއިރު، މިހާރު އެގައުމުގެ ވަގުތީ ރައީސް ކަމާއި، ވަގުތީ ބޮޑު ވަޒީރުކަން ކުރައްވަމުން އަންނަ ޗޮއި ސަންގް މޮކް ވެސް ވަކިކުރާނެ ކަމުގެ އިންޒާރު އެގައުމުގެ ގާނޫނު ހަދާ މަޖިލީހުގައި ތިބި އިދިކޮޅު ފަރާތްތަކުން އަންނަނީ ދެމުންނެވެ.