އުސޫލުތަކާއި ޚިލާފަށް ގިނަ އަދަދަކަށް ވެލި ނަގާނަމަ ފިޔަވަޅު އަޅާނެކަމަށް އެންވަރަމެންޓް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.

އީޕީއޭއިން ނެރުނު ބަޔާނެއްގައި ބުނީ، ރައްޔިތުންގެ ޒަރޫރީ ބޭނުންތަކަށް ވެލި ނެގުމަށް ކަނޑައަޅާފައިވާ ސަރަޙައްދުތަކަކީ މެޝިނަރީ ބޭނުންނުކޮށް، ހަމައެކަނި ޒަރޫރީ ބޭނުމަށް ވެލިނެގުމަށް ކަނޑައަޅާފައިވަ ސަރަހައްދުތަކަށްވީ ނަމަވެސް، މިފަދަ ސަރަހައްދުތަކުން، ހެދިފައިވާ އުސޫލުތަކާއި ޚިލާފަށް ގިނަ އަދަދަކަށް ވެލި ނަގާ ކަމުގެ ޝަކުވާ ލިބެމުންދާކަމަށާއި، މެޝިނަރީ ބޭނުންކޮށްގެން އަދި ވިޔަފާރި އުސޫލުން އެކި އެކި ބޭނުމަށް ވެލި ނަގަމުންދާކަން ފާހަގަވެފައިވާކަމަށެވެ.

މީގެ އިތުރުންވެސް ކޮންމެ އަތޮޅެއްގައިވެސް، މެޝިނަރީ ބޭނުންނުކޮށް، ރައްޔިތުންގެ ޒަރޫރީ ބޭނުމަށް ވެލި ނެގުމަށް ވަކި ޚާއްޞަ ސަރަޙައްދުތަކެއް ވަނީ ކަނޑައަޅާފައިވާކަން ފާހަގަކުރަމުން އެ އެޖެންސީން ބުނީ، މެޝަނަރީ ބޭނުންކޮށްގެން ފަޅުފުންކުރުމާއި ވެލިނެގުމުގެ މަސައްކަތްތަކަކީ، ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓުގެ ގަވާއިދުގެ ދަށުން، އީއައިއޭ މަރުހަލާ ފުރިހަމަކޮށްގެން ކުރިއަށްގެންދަން ޖެހޭ މަސައްކަތެއްކަމަށެވެ.

އެހެންކަމުން  މެޝިނަރީ ބޭނުންކޮށްގެން ވެލި ނަގަން ޖެހިއްޖެ ހިނދެއްގައި، އަތޮޅު ކައުންސިލާއި އަދި ކަމާގުޅޭ އެހެން ސަރުކާރުގެ އިދާރާތަކާއިއެކު މަޝްވަރާކޮށް، އެކަމަށް ޚާއްސަ ފަޅެއް ކަނޑައަޅައި، ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދާ އެއްގޮތަށް އީ.އައި.އޭ މަރުހަލާ ފުރިހަމަކުރުމަށް އީޕީއޭއިން ވަނީ އެދިފައެވެ.

މިއާއިއެކު، އީޕީއޭއިން ބުނީ، އެ އެޖެންސީއިން ތަންފީޒުކުރަމުންދާ ގަވާއިދުތަކާއި އުސޫލުތަކާއި އެއްގޮތަށް މަސައްކަތްތައް ކުރިއަށްގެންދިއުމަށް އިލްތިމާސްކުރާކަމަށާއި، އެ އެޖެންސީގެ ގަވާއިދުތަކާއި އުސޫލާއި ޚިލާފަށް އަމަލުކުރާ ފަރާތްތަކާއި މެދު ފިޔަވަޅު އަޅަމުންގެންދާނެކަމަށެވެ.