ވަޒީފާގެ އުޞޫލުތަކާއި ވެށި ބައްޓަންކުރަންވާނީ ފަރުޟު ނަމާދު އަދާކުރެވޭނޭ ގޮތަށް ކަމަށް މިއަދުގެ ޚުތުބާގައި ބުނެފިއެވެ.
މަސައްކަތުގެ އަޚްލާޤުގެ މައުޟޫއަށް އަލިއަޅުވާލައި އިއްވި ޚުތުބާގައި ވަނީ ވަޒީފާގެ އެއްބަސްވުމަކީ ހަމައެކަނި މުސާރަ ލިބިގަތުމަށް ޓަކައި ވެވޭ އެއްބަސްވުމަކަށް ނުހެދުމަށާއި، އެއީ ޚިދުމަތް ފޯރުކޮށްދިނުމަށް ހިފޭ އަހުދު ކަށަވަރެއްކަން ހަނދާންކޮށްދީފައެވެ.
ޚުތުބާގައި، ވަޒީފާގެ ތެރެއިން ޚިދުމަތަށް އެދޭ ފަރާތްތަކަށް ފަރުވާތެރިކަމާއެކު އެ ޚިދުމަތެއް ވީއެންމެ ފުރިހަމައަށް އިޙްތިރާމާއި އޯގާތެރިކަމާއެކު ފޯރުކޮށްދިނުމަށް އިލްތިމާސްކުރިއެވެ. އަދި ކީރިތި ރަސޫލާ ޞޢވގެ ޙަދީޘްފުޅުގެ އަލީގައި، މަސައްކަތެއް ކުރާނަމަ އެކަމެއް ވީ އެންމެ ފުރިހަމައަށް ކުރުމަށް މާތްالله ލޯބިވެވޮޑިގަންނަވާކަން ބަޔާންކުރިއެވެ.
އޮފީހުގެ ވަސީލަތްތަކާއި ވަގުތަކީ އަމާނާތެއްކަން ފާހަގަކޮށް، މި އަމާނާތްތަކަށް ރައްކާތެރިވުމަށް ޚުތުބާގައި އިރުޝާދުދީފައިވެއެވެ.
އޮފީހުގެ ކަރަންޓާއި ފެނަކީ ވެސް އަމާނާތެކެވެ. ފޯނާއި ކަރުދާހާ ދެއްޔަކީވެސް އަމާނާތެކެވެ. އޮފީހުގެ މެޝިނަރީތަކަކީވެސް އަމާނާތެކެވެ. ވަޒީފާއަށް ކަނޑައެޅިފައިވާ ވަގުތަކީ ވެސް އަމާނާތެކެވެ. މުއައްސަސާގެ މުހިއްމު މަސައްކަތްތަކާ ގުޅޭ ވަޒީފާގެ ސިއްރުތައް ހިފެހެއްޓުމަކީވެސް އަމާނާތެކެވެ. އެހެންކަމުން މި އަމާނާތްތަކަށް ރައްކާތެރިވާށެވެ! ވަޒީފާގެ މުހިއްމު ވަގުތުތައް އޮފީހުން ބޭރުގައި އަމިއްލަ ކަންކަމަށް ހޭދަކުރާއިރު، ޙަވާލުވި އަމާނާތުގެ މަތިން ހަނދުމަކުރާށެވެ! އޮފީހުގެ ތަކެތި ނަހަމަ ގޮތުގައި ބޭނުން ކުރާއިރު، މާތް الله ބައްލަވައިވޮޑިގެންވާކަން ހަނދުމަކުރާށެވެ! އޮފީހުގެ ސިއްރުތައް މީސްމީޑިއާގެ މަންސަތަކުގައި ފަތުރާއިރު، ފަހުން ހިތާމަކުރަންޖެހޭނެކަން ވެސް ހަނދުމަކުރާށެވެ
ޚުތުބާ
ވަޒީފާގެ ވެށި ތަހުޒީބު އަމާން ވެށްޓަކަށް ހެދުމަކީ ކޮންމެ މުވައްޒަފެއްގެ ވާޖިބެއްކަމަށާ މުވައްޒަފުންގެ މެދުގައި އޮންނަންޖެހޭ އަޚުވަންތަ ގުޅުންތަކަށް ބުރޫއަރާފަދަ އަމަލުތަކުން ދުރުހެލިވުމަށް އިލްތިމާސްކޮށްފައިވެއެވެ.
ވަޒީފާ ދޭ ފަރާތުގެ މައްޗަށްވާ ޙައްޤުތަކަށް އަލިއަޅުވާލައި ޚުތުބާގައި ވަނީ، މުވައްޒަފުންގެ ސަލާމަތާއި ރައްކާތެރިކަމަށް ސަމާލުވެ، ކަނޑައެޅިފައިވާ މުސާރައާއި އިނާޔަތްތައް ޤަވާއިދުން ދިނުމަށާއި، މުވައްޒަފުންގެ މެދުގައި އަދުލުއިންޞާފު ޤާއިމުކުރުމަށް އިރުޝާދުދީފައެވެ.
ޚުތުބާ ނިންމަވާލައްވަމުން، ވަޒީފާގެ ވެށީގައި ކުރެވޭ މަސައްކަތްތަކުގައި މާތްالله ބަރަކާތްލައްވާނީ އިޚްލާޞްތެރިކަމާއެކު އެކަންކަން ކޮށްގެންކަން ފާހަގަކޮށްފައިވެއެވެ.
”ވަޒީފާގެ ވެއްޓާއި ނިޒާމު އޮންނަންވާނީ، މާތް الله ގެ ރުއްސެވުމާއި ފުއްސެވުން ލިބިގަނެވޭނެ ގޮތަށް ރާވައި ތަރުތީބު ކުރެވިފައެވެ. ވަޒީފާގެ އުޞޫލުތަކާއި ވެށި ބައްޓަންކުރަންވާނީ، ފަރުޟު ނަމާދު އަދާކުރެވޭނޭ ގޮތަށެވެ.“ ޚުތުބާގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
