ސީޓެއްގެ މައްސަލަހޫނުވެ، ރަޝިއާގެ މިކްސްޑް މާޝަލް އާޓްސް ފައިޓަރ، ޔޫއެފްސީ ލެޖެންޑް ހަބީބް ނުރުމަގޮމެދޮވް މަތިންދާބޯޓަކުން ބޭރުކޮށްލައިފިއެވެ.

މި ހާދިސާގެ ވީޑިއޯ ސޯޝަލް މީޑިއާގައި ފެތުރެމުންދާއިރު، ފުރަތަމަ ރިޕޯޓުތަކުގައި ބުނެފައިވަނީ މިކަން ހިނގާފައިވަނީ އެލާސްކަން އެއަރލައިންސްގެ ފްލައިޓެއްގައި ކަމަށެވެ.

އެހެންނަމަވެސް، ނުރުމަގޮމެދޮވް އެކްސްގައި ކުރި ޕޯސްޓެއްގައި ބުނީ މި ހާދިސާ ހިނގާފައިވަނީ ފްރޮންޓިއަރ އެއަރލައިންސްގެ ފްލައިޓެއްގައި ކަމަށާއި، މިކަން ހިނގަން މެދުވެރިވީ މަތިންދާބޯޓުގެ އިމަޖެންސީ ދޮރު ކައިރީގައި އިން ނުރުމަގޮމެދޮވް، ކުއްލި ހާލަތެއްގައި އެހެން ފަސިންޖަރުންނަށް އެހީތެރިވުމަށް ތައްޔާރަށް ހުރިތޯ ނުވަތަ އެކަމަށް ޤާބިލުތޯ ސުވާލު އުފެދުމާ ގުޅިގެންނެވެ.

އުމުރުން 36 އަހަރުގެ  ޔޫއެފްސީ ޗެމްޕިއަން އެކްސްގައި ކުރި ޕޯސްޓްގައި ބުނީ، އޭނާ އާއި ވާހަކަދެއްކި ފްލައިޓް އެޓެންޑެންޓް ފުރަތަމަވެސް ވާހަކަދައްކާފައިވަނީ ވަރަށް ހަރުކަށިކޮށްކަމަށާއި، އޭނާއަށް އިނގިރޭސި ބަހުން ވާހަކަދައްކައި، ހުރިހާ އެއްޗެއް ދޭހަވެ، އެހީތެރިވުމަށް އެއްބަސްވި ނަމަވެސް، އެ އެޓެންޑެންޓް އަދިވެސް އޭނާގެ ގޮނޑިން ތެދުވުމަށް އެންގިކަމަށެވެ.

އެއީ ނަސްލީ، ޤައުމީ ނުވަތަ އެހެން ތަފާތުކުރުމެއްކަމަށް ޔަގީންނުވާކަމަށް އޭނާގެ ޕޯސްޓްގައި ބުނެފައިވެއެވެ.

ނުރުމަގޮމެދޮވް ބުނީ، އެޓެންޑެންޓް އޭނާއާއި 2 މިނެޓު ވާހަކަދެއްކުމަށްފަހު ސެކިއުރިޓީއަށް ގުޅައި، އޭނާ މަތިންދާބޯޓުން ނެރެލިކަމަށެވެ.

މި ހާދިސާ ހިނގާފައިވަނީ ކޮން އިރަކުކަން އޭނާ ބުނެފައިނުވާއިރު، މި ހާދިސާއާއި ގުޅިގެން ފްރޮންޓިއަރ އެއަރލައިންސްއިން މިހާތަނަށް މިކަމާ ގުޅޭގޮތުން އެއްވެސް ކޮމެންޓެއް ކޮށްފައެއް ނުވެއެވެ.

ދައުރުވަމުންދާ ވީޑިއޯއިން ފެންނަގޮތުގައި، އެތަނުގައި އޭނާ އިނުމަށް ދެކޮޅު ހަދައި ފްލައިޓް އެޓެންޑެންޓްގެ މެނޭޖަރު ވަނީ ނުރުމަގޮމެދޮވްގެ ޖަވާބާމެދު ހިތްހަމަނުޖެހި، އޭނާއަށް އެހެން ސީޓެއް ނުވަތަ އެހެން ފްލައިޓެއްގައި ދަތުރުކުރުމުގެ ފުރުސަތު ދިނުމަށް މަސައްކަތްކުރެއެވެ.

ބެލެވޭ ގޮތުގައި ނުރުމަގޮމެދޮވް އެމެރިކާގެ ކެލިފޯނިއާއަށް ދަތުރުކުރަމުންދިޔައީ، ޖެނުއަރީ 18 ގައި ލޮސް އެންޖެލެސް، ނެވާޑާގައި ބޭއްވޭ ޔޫއެފްސީ 311 އިވެންޓުގައި އޭނާގެ ޓީމްމޭޓުންނަށް އެހީތެރިވުމަށެވެ.

ޔޫއެފްސީ ކެރިއަރގައި އެއްވެސް މެޗެއްގައި ބަލިނުވެ، (29-0) ހުރި ނުރުމަގޮމެދޮވް އަކީ ގިނަ ބަޔަކު ދެކޭގޮތުގައި އެމްއެމްއޭ ތާރީޚުގައި އުފެދުނު އެންމެ މޮޅު ފައިޓަރުންގެ ތެރެއިން އެކެކެވެ.