މިދިޔަ އަހަރު މާލެސިޓީ ފުލުހުންނަށް ހުށަހެޅުނު މައްސަލަތަކުން 19.2 މިލިއަން ރުފިޔާގެ އަގުހުރި ތަކެތި ހޯދައިދީފައިވާކަމަށް ފުލުހުންގެ އިދާރާއިން ހާމަކޮށްފިއެވެ.

މިދިޔަ އަހަރު ފުލުހުން ކުރި މަސައްކަތްތަކާ ގުޅޭގޮތުން ފުލުހުންގެ މުއައްސަސާއިން ބުނީ ފާއިތުވި އަހަރު މާލެ ސިޓީ ޕޮލިހަށް ހުށަހެޅުނު އެކި މައްސަލަތަކާ ގުޅިގެން ކޮށްފައިވާ މަސައްކަތްތަކުން 19.2 މިލިއަން ރުފިޔާއަށް ވުރެ ގިނަ ތަކެތި  ރިކަވަރކޮށްފައިވާކަމަށެވެ. ފުލުހުން ބުނީ މިދިޔަ އަހަރު ޖުމްލަ 1653 އައިޓަމެއް ރިކަވަރކޮށްފައިވާއިރު މިތަކެތީގެ ޖުމްލަ އަގު 19.2 މިލިއަން ރުފިޔާއަށްވުރެ ގިނަވާނޭ ކަމަށެވެ.

މައްސަލަތަކުގައި ހޯދާފައިވާ ތަކެތި:

Advertisement

- 206 މޯބައިލް ފޯން - 1.983،564.79 މިލިއަން ރުފިޔާ

- 253 މޮޓޯ ސައިކަލް - 11،489،400 މިލިއަން ރުފިޔާ

- 107 އިލެކްޓްރޯނިކްސް އައިޓަމްސް - 986،843.42 ރުފިޔާ

- 333 އެހެނިހެން ތަކެތި  - 551،206.62 ރުފިޔާ

މީގެ އިތުރުން ފުލުހުން ބުނީ ނަގުތު ފައިސާ އާ ގުޅޭގޮތުން ހުށަހެޅުނު އެކި މައްސަލަތަކުގައި ގޮތުގައި މިދިޔަ އަހަރު 615،813.56 ރުފިޔާ ހޯދާފައިވާކަމަށެވެ.

މިދިޔަ އަހަރު ފުލުހުންނަށް ހުށަހެޅުނު މައްސަލަތަކުން 19.2 މިލިއަން ރުފިޔާގެ އަގުހުރި ތަކެތި ހޯދުނު ނަމަވެސް އެތަކެތި ރައްދުކޮށްދެވުނު މީހުންގެ ހިސާބުކިތާބެއް ފުލުހުން އާއްމުކޮށްފައެއް ނުވެއެވެ.